Elon Musk apple tweet : ఎలాన్​ మస్క్​- యాపిల్​ మధ్య 'ట్విట్టర్​' వార్​..!

Elon Musk apple tweet : ప్రముఖ టెక్​ కంపెనీ యాపిల్​పై అపర కుబేరుడు, టెస్లా సీఈఓ ఎలాన్​ మస్క్​ తీవ్రస్థాయిలో మండిపడ్డారు. యాపిల్​ విధానాలకు వ్యతిరేకంగా వరుస ట్వీట్లు చేశారు. ఐఫోన్​ తయారీ సంస్థ.. తన యాప్​ స్టోర్​ నుంచి ట్విట్టర్​ను తప్పిస్తానని బెదిరిస్తున్నట్టు ఆరోపించారు.

"యాప్​ స్టోర్​ నుంచి ట్విట్టర్​ను తీసేస్తామని యాపిల్​ బెదిరిస్తోంది. కారణాలు మాత్రం చెప్పడం లేదు," అని ఎలాన్​ మస్క్​ ట్వీట్​ చేశారు.

యాప్​ స్టోర్​ లావాదేవీల్లో యాపిల్​కు 30శాతం ఫీజు చెల్లించాలన్ని నిబంధనపై ఇప్పటికే వ్యతిరేకత ఉంది. తాజాగా ఈ జాబితాలోకి మస్క్​ కూడా చేరినట్టు కనిపిస్తోంది. తాజా పరిణామాలపై యాపిల్​ ఇంకా స్పందించలేదు.

Elon Musk vs Apple : మరోవైపు.. ట్విట్టర్​కు యాపిల్​ యాడ్​లు ఇవ్వడం తగ్గించేసిందని మస్క్​ అన్నారు.

"ట్విట్టర్​లో యాడ్​లను యాపిల్​ చాలా వరకు తగ్గించేసింది. అమెరికాలో ఫ్రీ స్పీచ్​ ఉండటం ఆ సంస్థకు నచ్చదా? ఏం జరుగుతోంది టిమ్​ కుక్​?" అని ట్వీట్​ చేశారు ఎలాన్​ మస్క్​. టిమ్​ కుక్​.. ప్రస్తుత యాపిల్​ సీఈఓ.

వాషింగ్టన్​ పోస్ట్​ నివేదిక ప్రకారం.. 2022 తొలి మూడు నెలల్లో.. ట్విట్టర్​లో యాడ్స్​ కోసం 48మిలియన్​ డాలర్లను ఖర్చు పెట్టింది యాపిల్​ సంస్థ. ట్విట్టర్​ యాడ్స్​లో యాపిల్​ వాటా 4శాతంగా ఉంది. మొత్తం మీద.. ట్విట్టర్​కు టాప్​ అడ్వర్టైజర్​గా కొనసాగింది ఈ టెక్​ సంస్థ. కానీ ఇప్పుడు పరిస్థితులు మారినట్టు కనిపిస్తోంది.

Elon Musk twitter latest news : ట్విట్టర్​ను సొంతం చేసుకున్న ఎలాన్​ మస్క్​.. సంస్థలో కీలక మార్పులు చేపట్టారు. ఉద్యోగాలను భారీగా తొలగించారు. అదే సమయంలో సంస్థ విధానాల్లో భారీ మార్పులు తీసుకొచ్చారు. ఈ పరిణామాలతో నిత్యం వార్తల్లో నిలుస్తోంది ట్విట్టర్​. చాలా మంది.. మస్క్​ చర్యలను వ్యతిరేకిస్తుండటం గమనార్హం. అయితే.. ఎలాన్​ మస్క్​ చర్యలు పెట్టుబడిదారులకు సంతృప్తికరంగా ఉండవని విశ్లేషకులు అభిప్రాయపడుతున్నారు.

"ట్విట్టర్​ కోసం ఎలాన్​ మస్క్​.. ఇప్పటికే టెస్లా షేర్లు చాలా అమ్మేశారు. ఇప్పుడు ట్విట్టర్​ను నడిపించేందుకు.. ఇంకా అమ్మకాలు చేయక తప్పేడట్టు లేదు! ఈ సమయంలో.. యాపిల్​తో ఎలాన్​ మస్క్​ యుద్ధానికి దిగుతుండటం అంతా మంచిది కాదు. పెట్టుబడిదారులు ఈ పరిణామాలతో సంతృప్తికరంగా ఉండరు. వాల్​ స్ట్రీట్​కు తక్కువ డ్రామా కావాలి. కానీ ట్విట్టర్​, ఎలాన్​ మస్క్​ను చూస్తుంటే.. బేర్లకు ప్రతి రోజు పండుగ వాతావరణంగానే ఉంది," అని వెడ్​బుష్​ సంస్థకు చెందిన డాన్​ ఇవెస్​ తెలిపారు.