బెస్ట్​ సెల్లింగ్​ టీవీఎస్​ రైడర్​ బైక్​లో కొత్త వేరియంట్లు- ధర రూ. 1లక్ష కన్నా తక్కువే!

టీవీఎస్ మోటార్ కంపెనీ తమ అత్యంత ప్రజాదరణ పొందిన టీవీఎస్ రైడర్ బైక్‌లో సరికొత్త వేరియంట్‌లను మార్కెట్‌లోకి విడుదల చేసింది. ఈ కొత్త మోడల్స్‌లో డ్యుయెల్ డిస్క్ బ్రేక్‌లు (ముందు, వెనుక డిస్క్ బ్రేకులు), సింగిల్-ఛానెల్ ఏబీఎస్​ (యాంటీ-లాక్ బ్రేకింగ్ సిస్టమ్) వంటి ఫీచర్‌లతో పాటు ఈ సెగ్మెంట్‌లో తొలిసారిగా అందిస్తున్న మరిన్ని అద్భుతమైన ఫీచర్లను జోడించింది.

టీవీఎస్ రైడర్ ధరలు..

బెస్ట్​ సెల్లింగ్​ టీవీఎస్​ రైడర్​ బైక్​లో కొత్తగా వచ్చిన ఈ వేరియంట్లలో, ఎస్​ఎక్స్​సీ డ్యుయల్ డిస్క్ వేరియంట్ ధర రూ. 93,800గా, టీఎఫ్​టీ డ్యుయల్ డిస్క్ వెర్షన్ ధర రూ. 95,600గా (రెండూ ఎక్స్-షోరూమ్ ధరలు) నిర్ణయించారు. ఇవి రైడర్ మోడల్స్‌లో ఇప్పటివరకు వచ్చిన వాటిల్లోకెల్లా అత్యంత అధునాతన వెర్షన్స్‌గా టీవీఎస్ పేర్కొంది.

సెగ్మెంట్-ఫస్ట్ ఫీచర్లు..

ఈ కొత్త 125 సీసీ కమ్యూటర్ సెగ్మెంట్ బైక్‌లలో ‘బూస్ట్ మోడ్’, 'గ్లైడ్-త్రూ-టెక్నాలజీ' వంటి ఫీచర్లను అందిస్తున్నారు.

పవర్, ఇంజిన్: రైడర్ బైక్ యథావిధిగా 125 సీసీ, 3-వాల్వ్ ఇంజిన్‌తో వస్తుంది. ఇది 5-స్పీడ్ గేర్‌బాక్స్ ద్వారా 6,000 ఆర్‌పీఎమ్ వద్ద 11.2 ఎన్ఎమ్ టార్క్ ఉత్పత్తి చేస్తుంది.

'బూస్ట్ మోడ్'తో iGO అసిస్ట్: ఇంజిన్‌కు ఇప్పుడు "బూస్ట్ మోడ్" తో పాటు iGO అసిస్ట్ అనే ఫీచర్ అదనమైంది. ఇది ఈ సెగ్మెంట్‌లో మొట్టమొదటిది. ఈ మోడ్ ద్వారా బైక్‌కు ఇన్​స్టెంట్​ పవర్ పెరుగుతుంది, టార్క్ 6,000 ఆర్‌పీఎమ్ వద్ద 11.75 ఎన్ఎమ్​కి చేరుకుంటుంది.

జీటీటీ (గ్లైడ్-త్రూ-టెక్నాలజీ): ఈ ఫీచర్ సహాయంతో, రైడర్ బైక్ రైడర్ థ్రాటిల్ ఇవ్వకుండానే తక్కువ వేగంతో సులువుగా ముందుకు కదులుతుంది. ముఖ్యంగా రద్దీగా ఉండే ట్రాఫిక్‌లో ఇది ఎంతో ఉపయోగపడుతుంది, అంతేకాక ఇంధన సామర్థ్యం (మైలేజ్) కూడా మెరుగుపడుతుంది.

హార్డ్‌వేర్ అప్‌డేట్స్: భద్రతకు పెద్ద పీట..

భద్రత విషయంలో టీవీఎస్ రైడర్‌కు మెరుగైన అప్‌డేట్స్ చేశారు.

డ్యుయల్ డిస్క్ బ్రేకులు, ఏబీఎస్​: టీవీఎస్ రైడర్‌కు ఇప్పుడు ముందు, వెనుక భాగాలలో డిస్క్ బ్రేక్‌లు లభించాయి. ఈ సెగ్మెంట్‌లో ఇలా వెనుకవైపు కూడా డిస్క్ బ్రేక్‌ను ఇవ్వడం ఇదే తొలిసారి. మెరుగైన కంట్రోల్ కోసం దీనికి సింగిల్-ఛానెల్ ఏబీఎస్​ జతచేశారు.

వెడల్పైన టైర్లు: టైర్లను కూడా వెడల్పు చేశారు. ముందు టైరు కొలత 90/90-17 కాగా, వెనుక టైరు 110/80-17. దీనివల్ల వివిధ రకాల రోడ్లపైనా గ్రిప్, కార్నరింగ్ స్టెబిలిటీ (మలుపుల్లో పట్టు) మెరుగుపడతాయి.

కాస్మెటిక్, డిజైన్ అప్‌డేట్స్..

కొత్త స్టైలింగ్: రైడర్ స్టైలింగ్‌లో మార్పులు చేస్తూ, కొత్తగా మెటాలిక్ సిల్వర్ ఫినిషింగ్‌తో పాటు స్పోర్టీ రెడ్ అల్లాయ్ వీల్స్‌ను అందించారు.

డిస్‌ప్లే ఆప్షన్లు: రైడర్లకు రెండు రకాల డిస్‌ప్లే సెటప్‌లలో ఎంచుకునే అవకాశం ఉంది.

టీఎఫ్​టీ కన్సోల్: ఇందులో 99కు పైగా కనెక్టెడ్ ఫీచర్లు ఉంటాయి.

రివర్స్ ఎల్​సీడీ: ఇందులో 85 ఫీచర్లు ఉంటాయి.

TVS SmartXonnect: ఈ రెండు డిస్‌ప్లేలూ TVS SmartXonnect ప్లాట్‌ఫారమ్‌పై పనిచేస్తాయి, ఇందులో బ్లూటూత్ కనెక్టివిటీ ఉంటుంది. దీని ద్వారా వాయిస్ అసిస్ట్, టర్న్-బై-టర్న్ నావిగేషన్, కాల్స్ హ్యాండిలింగ్, నోటిఫికేషన్ మేనేజ్‌మెంట్ వంటి ఫీచర్లను ఉపయోగించుకోవచ్చు.