భారత్ పై మళ్లీ విషం కక్కిన ట్రంప్; భారత్ లో ఆపిల్ ఉత్పత్తుల తయారీ అవసరం లేదని టిమ్ కుక్ కు సలహా
రెండో సారి అమెరికా అధ్యక్షుడిగా పదవీబాధ్యతలు చేపట్టిన నాటి నుంచి భారత్ పై విషం కక్కుతున్న డొనాల్డ్ ట్రంప్ మరోసారి అదే పని చేశారు. భారత్ లో ఆపిల్ ఉత్పత్తుల తయారీ అవసరం లేదని ఆపిల్ సీఈఓ టిమ్ కుక్ కు సలహా ఇచ్చారు. ప్రపంచంలోనే అత్యధిక టారిఫ్ అవరోధాలు భారత్ లో ఉన్నాయనిట్రంప్ ఆరోపించారు.
ఆపిల్ ఐఫోన్ ఉత్పత్తిని భారతదేశానికి తరలించవద్దని, అమెరికాలో తయారీపై దృష్టి పెట్టాలని ఆపిల్ సిఇఒ టిమ్ కుక్ ను కోరినట్లు అమెరికా అధ్యక్షుడు డొనాల్డ్ ట్రంప్ గురువారం పేర్కొన్నారు. గత ఆర్థిక సంవత్సరంలో 12 నెలల్లో 22 బిలియన్ డాలర్ల విలువైన ఆపిల్ స్మార్ట్ ఫోన్లను తయారు చేసి, ఆపిల్ ఐఫోన్ల అతిపెద్ద తయారీదారులలో భారతదేశం ఒకటిగా అవతరించింది. అమెరికాకు చెందిన ఈ సంస్థ గత ఏడాదితో పోలిస్తే భారత్ లో 60 శాతం ఎక్కువ ఐఫోన్లను ఉత్పత్తి చేసింది.
భారత్ లో వద్దు..
తన టారిఫ్ దాడితో ప్రపంచ మార్కెట్లను కుదిపేసిన ట్రంప్ ఖతార్ లో మాట్లాడుతూ ఆపిల్ ఉత్పత్తులను భారత్ లో తయారు చేయడం తనకు ఇష్టం లేదన్నారు. ఆపిల్ సీఈఓ టిమ్ కుక్ తో తనకు నిన్న చిన్న సమస్య వచ్చిందని ట్రంప్ ఖతార్ పర్యటన సందర్భంగా మీడియాకు తెలిపారు. ‘‘మీరు భారత్ లో మీ స్మార్ట్ ఫోన్లను ఉత్పత్తి చేయడం నాకు ఇష్టం లేదు’’ అని టిమ్ కుక్ తో చెప్పినట్లు ట్రంప్ వెల్లడించారు. ఆపిల్ తన ఉత్పత్తిని అమెరికాలో పెంచుకోవాలని సూచించానని చెప్పారు.
చైనా నుంచి ఇతర దేశాలకు..
భౌగోళిక రాజకీయ ఉద్రిక్తతలతో పాటు కరోనా వైరస్ మహమ్మారి వ్యాప్తి చెందినప్పటి నుండి ఆపిల్ ప్రొడక్ట్ ల ఉత్పత్తిని చైనా నుండి ఇతర దేశాలకు విస్తరించాలని ఆపిల్ యోచిస్తోంది. తాజాగా, ట్రంప్ విధించిన సుంకాల యుద్ధం కారణంగా చైనా నుంచి వైదొలగాలని యోచిస్తోంది. అయితే అమెరికా, చైనాలు ఈ వారం ప్రారంభంలో ఒక వాణిజ్య ఒప్పందాన్ని కుదుర్చుకున్నాయి, సుంకాల విషయంలో తమ విభేదాలను చాలావరకు పరిష్కరించుకున్నాయి.
భారత్ పై ట్రంప్ ఆరోపణలు
ప్రపంచంలోనే అత్యధిక టారిఫ్ అవరోధాలు భారత్ లో ఉన్నాయని ట్రంప్ ఆరోపించారు. ప్రపంచంలోనే అత్యధిక జనాభా కలిగిన దేశంలో అమెరికన్ ఉత్పత్తులను విక్రయించడం చాలా కష్టమని ఆయన పేర్కొన్నారు. ఆపిల్ తన ఉత్పత్తులను ఎక్కువగా చైనాలోనే తయారు చేస్తుంది. భారతదేశంలో, ఐఫోన్లను ఫాక్స్ కాన్ టెక్నాలజీ గ్రూప్ ప్లాంట్ లో, టాటా గ్రూప్ నడుపుతున్న ప్లాంట్ లో అసెంబుల్ చేస్తారు.
ఇండియా జీరో టారిఫ్ ఆఫర్
అమెరికా వస్తువులపై సుంకాలను పూర్తిగా ఎత్తివేస్తామని భారత్ ఆఫర్ ఇచ్చిందని ట్రంప్ పేర్కొన్నారు. గురువారం ఖతార్ లో వ్యాపార ప్రముఖులతో జరిగిన కార్యక్రమంలో ట్రంప్ మాట్లాడుతూ.. భారత ప్రభుత్వం తమకు ఎలాంటి సుంకం విధించడానికి సిద్ధంగా లేని ఒప్పందాన్ని ఆఫర్ చేసిందని అన్నారు.
