బజాజ్ చేతక్‌ ఈవీని వెనక్కు నెట్టిన టీవీఎస్.. ఎలక్ట్రిక్ స్కూటర్ల అమ్మకాల్లో టాప్!

లక్ట్రిక్ ద్విచక్ర వాహన విభాగంలో ఏప్రిల్ మరోసారి కొన్ని కంపెనీలకు షాకింగ్ ఫలితాలతో ప్రారంభమైంది. వాస్తవానికి, మార్చి 2025లో బజాజ్ ఆటో అన్ని కంపెనీలను వెనక్కి నెట్టి నంబర్ -1 స్థానాన్ని ఆక్రమించింది. ఇప్పుడు అంటే 2025 ఏప్రిల్‌లో మూడో స్థానానికి పడిపోయింది. అదే సమయంలో టీవీఎస్ మోటార్ నెం.1 కిరీటాన్ని దక్కించుకోగలిగింది.

ఓలా ఎలక్ట్రిక్‌కు కూడా కొంత ఊరట కలిగించే వార్త వచ్చింది. కంపెనీ మూడో స్థానం నుంచి రెండో స్థానానికి ఎగబాకింది. టీవీఎస్ ఏప్రిల్లో 19,736 యూనిట్ల అమ్మకాలతో నంబర్ 1 గా ఉంది. అయితే ఏ కంపెనీ కూడా 20,000 యూనిట్ల అమ్మకాల మార్కును దాటలేకపోయింది.

ఏప్రిల్ 2025లో ఎలక్ట్రిక్ ద్విచక్ర వాహనాల అమ్మకాల గురించి చూస్తే.. టీవీఎస్ మోటార్ కంపెనీ 19,736 యూనిట్లు, ఓలా ఎలక్ట్రిక్ 19,709 యూనిట్లు, బజాజ్ ఆటో 19,001 యూనిట్లు, ఏథర్ ఎనర్జీ 13,167 యూనిట్లు, హీరో మోటోకార్ప్ 6,123 యూనిట్లు, గ్రీవ్స్ ఎలక్ట్రిక్ 4,000 యూనిట్లు, పర్ ఎనర్జీ 1,449 యూనిట్లు, బగాస్ ఆటో 1311, కైనిటిక్ గ్రీన్ 1306, రివర్ ఎనర్జీ 1,449 యూనిట్లు విక్రయించాయి.

టీవీఎస్ ముందువరుసలో దూసుకెళ్లింది. టీవీఎస్ తన ఎలక్ట్రిక్ స్కూటర్ ఐక్యూబ్ అప్డేట్ వేరియంట్‌ను విడుదల చేయడానికి సన్నద్ధమవుతోంది. ఇండియన్ మార్కెట్లో ఐక్యూబ్ మంచి విజయాన్ని అందుకుంది. ఇది దేశంలో అత్యధికంగా అమ్ముడైన రెండో ఎలక్ట్రిక్ స్కూటర్ గా నిలిచింది.

కంపెనీ ప్రస్తుతం భారతదేశంలో మొత్తం 5 ఐక్యూబ్ వేరియంట్లను విక్రయిస్తోంది. ఇవి వేర్వేరు బ్యాటరీ ప్యాక్ ఆప్షన్లతో వస్తాయి. ఈ ఎలక్ట్రిక్ స్కూటర్ ప్రారంభ ఎక్స్-షోరూమ్ ధర రూ .1.04 లక్షలు. టాప్ వేరియంట్ ధర రూ.1.60 లక్షల వరకు ఉంటుంది.