Cars price hike : తక్కువ ధరకు కారు కొనాలనుకుంటే ఈరోజే లాస్ట్​ ఛాన్స్​! రేపటి నుంచి ఇక బాదుడే..

కొత్త కారు కొనాలని భావిస్తున్న వారికి కీలక అలర్ట్​! ఇయర్​ ఎండ్​ కారణంగా వివిధ ఆటోమొబైల్​ సంస్థలు తమ ప్రాడక్ట్స్​పై ఈ నెలలో భారీ డిస్కౌంట్లు ఇచ్చాయి. కానీ ఈ పరిస్థితులు రేపు, అంటే జనవరి 1, 2025తో పూర్తిగా మారిపోబోతున్నాయి. ఆఫర్స్​, డిస్కౌంట్స్​ అందుబాటులో ఉండకపోవడమే కాదు.. అనేక ఆటోమొబైల్​ సంస్థలు తమ వాహనాలపై ధరలను భారీగా పెంచేందుకు కూడా రెడీ అవుతున్నాయి. ఈ నేపథ్యంలో మీకు అర్జెంటుగా కొత్త కారు అవసరమని మీకు ఖచ్చితంగా అనిపిస్తే, రిజర్వేషన్ మొత్తాన్ని చెల్లించి మీ వాహనాన్ని బుక్ చేసుకోవడానికి ఈరోజే లాస్ట్​ ఛాన్స్​ అని గుర్తుపెట్టుకోవాలి!

ధరల బాదుడుకు ఆటోమొబైల్​ సంస్థలు సిద్ధం..

దేశవ్యాప్తంగా, చాలా బ్రాండ్లలో డీలర్లు ఇప్పటికే ఉన్న ఇన్వెంటరీలను క్లియర్ చేయడానికి ప్రత్యేక ఇయర్ ఎండ్ డీల్స్, డిస్కౌంట్లను అందిస్తున్నారు. మునుపటి సంవత్సరాల మాదిరిగా కాకుండా, ఈ సంవత్సరం ఇన్వెంటరీ స్థాయిలు ఎక్కువగా ఉండటంతో పెద్దగా వెయిటింగ్​ పీరియడ్​ లేకుండానే కారును సులభంగా పొందొచ్చు. కానీ జనవరి 1 నుంచి పరిస్థితులు ఒక్కసారిగా మారిపోతాయి.

ఆసక్తికరమైన విషయం ఏమిటంటే, ప్రధాన కార్ బ్రాండ్లు (మాస్ మార్కెట్లో, లగ్జరీ స్పేస్​లో) - జనవరి 1 నుంచి అమల్లోకి వచ్చే ధరల పెంపును ప్రకటించాయి. ఈ ధరల పెరుగుదల రెండు శాతం నుంచి ఆరు శాతం వరకు ఉంటుంది!

• హోండా కార్స్ ఇండియా తన అన్ని మోడళ్లైన అమేజ్, ఎలివేట్, సిటీలపై ధరల పెంపును వెల్లడించింది. మోడల్, సంబంధిత వేరియంట్​ని బట్టి రెండు శాతం వరకు ధరల పెంపు ఉంటుంది.
• స్కోడా ఆటో ఇండియా తన స్లావియా, కుషాక్, కొడియాక్ ధరలను జనవరి 1 నుంచి మూడు శాతం వరకు పెంచడానికి పెరుగుతున్న ఇన్​పుట్​, నిర్వహణ ఖర్చులు కారణమని పేర్కొంది.
• దేశంలో జీప్, సిట్రోయెన్ మోడళ్ల ధరలు రెండు శాతం వరకు పెరగనున్నాయి.
• కియా ఇండియా కార్లు కూడా జనవరి 1 నుంచి సవరించిన ధరలను పొందనున్నాయి. సోనెట్, సెల్టోస్, కారెన్స్, కార్నివాల్, ఈవీ6 వంటి కార్ల ధరలు కూడా పెరుగుతాయి. ఇటీవల విడుదలైన సైరోస్ కోసం బుకింగ్స్ జనవరి 3 నుంచి ప్రారంభమవుతాయని గుర్తుంచుకోండి.

• టాటా కారు కావాలా? దేశంలోని టాటా మోటార్స్ మొత్తం శ్రేణి ధరలు పెరుగుతాయి. ఇది ఇంటర్నల్ కంబషన్ ఇంజిన్ (ఐసీఈ) మోడళ్లతో పాటు ఎలక్ట్రిక్ వాహనాల ధరలపై ప్రభావం చూపనుంది.
• థార్, ఎక్స్​యూవీ 700, స్కార్పియో-ఎన్ వంటి వాటితో మహీంద్రా ఎస్​యూవీలు కూడా ఖరీదైనవిగా మారనున్నాయి. ధరల పెంపు మూడు శాతం వరకు ఉంటుంది.
• జేఎస్​బ్ల్యూ ఎంజీ మోటార్ కూడా కొత్త సంవత్సరం మొదటి రోజు నుంచి తన అన్ని కార్ మోడళ్ల ధరలను మూడు శాతం వరకు పెంచుతున్నట్లు ప్రకటించింది.
• హ్యుందాయ్ మోటార్ ఇండియా కూడా జనవరి 1 నుంచి తమ కార్ మోడళ్ల ధరలను పెంచుతోంది. ఇది దాని ఐసీఈ, ఈవీ శ్రేణిని కవర్ చేస్తుంది.
• దేశంలోని అతిపెద్ద కార్ల తయారీ సంస్థ మారుతీ సుజుకీ తన మోడళ్లపై నాలుగు శాతం వరకు ధరలను పెంచుతున్నట్లు ప్రకటించింది.
• జర్మనీకి చెందిన మూడు ప్రధాన లగ్జరీ కార్ల బ్రాండ్లు మెర్సిడెస్ బెంజ్, బీఎమ్​డబ్ల్యూ, ఆడి కూడా తమ తమ మోడళ్ల ధరలను పెంచనున్నాయి.