Electric Car NCAP Rating : ఫ్యామిలీ సేఫ్టీలో ఈ ఎలక్ట్రిక్ కారు డైమండ్.. మాములుగా ఉండదు మరి!

టాటా మోటార్స్ కార్లు భారతీయ వినియోగదారులలో సేఫ్టీకి ప్రసిద్ది చెందాయి. ప్రస్తుతం కంపెనీ వద్ద అత్యధికంగా 5 స్టార్ సేఫ్టీ కలిగిన కారు ఉంది. ఇటీవల ఫ్యామిలీ సేఫ్టీ కోసం జరిగిన క్రాష్ టెస్ట్‌లో కంపెనీకి చెందిన టాటా హారియర్, టాటా సఫారీ, టాటా నెక్సాన్, టాటా నెక్సాన్ ఈవీ, టాటా కర్వ్, టాటా కర్వ్ ఈవీ, పంచ్ ఈవీ ఇండియా ఎన్‌సీఏపీలో 5 స్టార్ రేటింగ్ పొందాయి.

అయితే కంపెనీకి చెందిన అన్ని 5-స్టార్ సేఫ్టీ కార్లలో టాటా పంచ్ ఈవీ పెద్దల, పిల్లల భద్రతలో ఎక్కువ పాయింట్లు సాధించింది. పెద్దల భద్రతకు 32 పాయింట్లకు గాను 31.46 పాయింట్లు, పిల్లల భద్రత కోసం 49కి 45 పాయింట్లు పొందింది.

మరోవైపు టాటా హారియర్ పెద్దల భద్రతకు సంబంధించి 32 పాయింట్లకు గాను 30.08 పాయింట్లు, పిల్లల భద్రతకు సంబంధించి 49 పాయింట్లకు గాను 44.54 పాయింట్లు సాధించింది. సఫారీ పెద్దల కోసం 30.08 పాయింట్లు, పిల్లల భద్రతకు 44.54 పాయింట్లు పొందింది. టాటా నెక్సాన్ పెద్దల భద్రత కోసం 29.41 పాయింట్లు, పిల్లల భద్రత కోసం 43.8 పాయింట్లు సాధించింది. నెక్సాన్ ఈవీ వయోజన భద్రతకు 29.86 పాయింట్లు, పిల్లల భద్రతకు 44.95 పాయింట్లతో ఉంది. టాటా కర్వ్ పెద్దల భద్రతకు 29.50 పాయింట్లు, పిల్లల భద్రతకు 43.66 పాయింట్లను తీసుకొచ్చింది. టాటా కర్వ్ ఈవీ పెద్దల సేఫ్టీకి 30.81 పాయింట్లు, పిల్లల సేఫ్టీకి 44.83 పాయింట్లు సాధించింది.

ఇక టాటా పంచ్ ఈవీ గురించి చూస్తే.. ఇందులో 2 బ్యాటరీ ప్యాక్‌లు ఉన్నాయి. మొదటిది 25 కిలోవాట్ల బ్యాటరీని కలిగి ఉంది. ఇది గరిష్టంగా 82 బిహెచ్పీ శక్తిని, 114 ఎన్ఎమ్ గరిష్ట టార్క్‌ను ఉత్పత్తి చేయగలదు. మరొకటి 35 కిలోవాట్ల బ్యాటరీని కలిగి ఉంది, ఇది గరిష్టంగా 122 బిహెచ్పీ శక్తిని, 190 ఎన్ఎమ్ గరిష్ట టార్క్‌ను ఉత్పత్తి చేస్తుంది. చిన్న బ్యాటరీతో అమర్చిన మోడల్ ఒక్కసారి ఛార్జ్ చేస్తే 315 కిలోమీటర్ల రేంజ్ అందిస్తుంది. అదే సమయంలో పెద్ద బ్యాటరీ ప్యాక్ ఉన్న మోడల్ పూర్తి ఛార్జింగ్‌పై 421 కిలోమీటర్ల రేంజ్ ఇస్తుంది.

మరోవైపు ఫీచర్ల గురించి మాట్లాడితే టాటా పంచ్ ఈవీలో ఆండ్రాయిడ్ ఆటో, ఆపిల్ కార్ ప్లేతో కూడిన 10.25-అంగుళాల టచ్‌స్క్రీన్ ఇన్ఫోటైన్మెంట్ సిస్టమ్, ఎయిర్ ప్యూరిఫైయర్, సన్‌రూఫ్ ఉన్నాయి. వీటితో పాటు సేఫ్టీ కోసం 6-ఎయిర్ బ్యాగులు, ఎలక్ట్రానిక్ స్టెబిలిటీ కంట్రోల్, 360-డిగ్రీ కెమెరా వంటి ఫీచర్లు కూడా కారులో ఉన్నాయి. టాప్ మోడల్ టాటా పంచ్ ఈవీ ప్రారంభ ఎక్స్-షోరూమ్ ధర రూ .9.99 లక్షల నుండి రూ .14.29 లక్షల వరకు ఉంటుంది.