Cheaper flight tickets : ఈ క్రెడిట్​ కార్డులతో తక్కువ ధరకే విమాన టికెట్లు పొందొచ్చు!

మీరు తరచుగా విమాన ప్రయాణాలు చేస్తుంటారా? మీ దగ్గర క్రెడిట్​ కార్డులు ఉన్నాయా? లేక కొత్తది తీసుకుందాం అనుకుంటున్నారా? అయితే ఇది మీకోసమే! క్రెడిట్​ కార్డు రివార్డ్ పాయింట్లను ఉపయోగించి విమాన టిక్కెట్లపై భారీ డిస్కౌంట్లను లేదా ఉచిత ప్రయాణాలను పొందవచ్చని మీకు తెలుసా? అన్ని క్రెడిట్ కార్డులు ఈ ప్రయోజనాలు ఇవ్వవు కానీ ప్రత్యేకంగా ట్రావెల్ బెనిఫిట్స్ అందించే కార్డులు కొన్ని ఉన్నాయి. ఈ నేపథ్యంలో తరచుగా ప్రయాణాలు చేసేవారికి బాగా ఉపయోగపడే కొన్ని ఉత్తమమైన క్రెడిట్ కార్డుల వివరాలను ఇక్కడ అందిస్తున్నాం.

ప్రయాణ ప్రయోజనాల కోసం ఉత్తమ క్రెడిట్ కార్డులు..

1. యాక్సిస్ బ్యాంక్ అట్లాస్ క్రెడిట్ కార్డ్:

ఈ కార్డుతో మీరు ఏ విమానయాన సంస్థను ఎంచుకున్నా, ప్రతి ప్రయాణంపై రివార్డ్ పాయింట్లు లభిస్తాయి.

ప్రయాణ ఖర్చులపై ప్రతి రూ. 100 ఖర్చుకు 5 EDGE మైల్స్ వస్తాయి. ఇక్కడ 1 EDGE మైల్ ఒక రూపాయికి సమానం!

కార్డు తీసుకున్న 37 రోజుల్లోపు మొదటి లావాదేవీ చేస్తే, అదనంగా 2,500 EDGE మైల్స్ వెల్కమ్​ గిఫ్ట్​గా లభిస్తాయి.

2. అమెరికన్ ఎక్స్‌ప్రెస్ ప్లాటినం ట్రావెల్ క్రెడిట్ కార్డ్:

ఈ కార్డులో నిర్దిష్ట ఖర్చు పరిమితిని చేరుకున్న తర్వాత రివార్డ్ పాయింట్లు వస్తాయి.

ఉదాహరణకు: ఒక సంవత్సరంలో మీరు రూ. 1.90 లక్షలు ఖర్చు చేస్తే, మీకు 15,000 మెంబర్‌షిప్ రివార్డ్ పాయింట్లు వస్తాయి. వీటిని 'ప్లాటినం ట్రావెల్ కలెక్షన్'లో రిడీమ్ చేసుకోవచ్చు.

ఒక సంవత్సరంలో రూ. 4 లక్షలు ఖర్చు పరిమితిని దాటితే, అదనంగా మరో 25,000 రివార్డ్ పాయింట్లు లభిస్తాయి!

3. ఎస్బీఐ కార్డ్ మైల్స్ ఎలైట్:

ఎస్బీఐ కార్డ్ అందించే ఈ క్రెడిట్​ కార్డులో వెల్కమ్​ గిఫ్ట్​గా 5,000 ట్రావెల్ క్రెడిట్స్ ఇస్తారు. ప్రయాణానికి సంబంధించిన ప్రతి రూ. 200 ఖర్చుకు 6 ట్రావెల్ క్రెడిట్‌లు లభిస్తాయి.

ఈ ట్రావెల్ క్రెడిట్లను ఎయిర్ మైల్స్/హోటల్ పాయింట్లుగా లేదా నేరుగా ప్రయాణ బుకింగ్‌ల కోసం మార్చుకోవచ్చు.

4. హెచ్‌డీఎఫ్‌సీ 6ఈ రివార్డ్స్ ఇండిగో క్రెడిట్ కార్డ్:

ఇండిగో యాప్ లేదా వెబ్‌సైట్‌లో విమాన టిక్కెట్లు బుక్ చేసుకుంటే, ప్రతి రూ. 100 ఖర్చుపై 2.5 6E రివార్డ్‌లు వస్తాయి.

ఈ కార్డుతో రూ. 1,500 విలువైన ఒక కాంప్లిమెంటరీ విమాన టికెట్ వోచర్ లభిస్తుంది.

ప్రతి నెలాఖరులో రివార్డులు ఆటోమేటిక్‌గా ఇండిగో ఖాతాకు బదిలీ అవుతాయి.

5. యాక్సిస్ బ్యాంక్ హారిజన్ క్రెడిట్ కార్డ్:

యాక్సిస్ బ్యాంక్ ట్రావెల్ EDGE పోర్టల్, నేరుగా విమానయాన సంస్థల వెబ్‌సైట్లలో చేసే ప్రతి రూ. 100 ఖర్చుపై 5 EDGE మైల్స్ లభిస్తాయి.

కార్డు జారీ అయిన 30 రోజుల్లోపు రూ. 1,000 లేదా అంతకంటే ఎక్కువ విలువైన మొదటి లావాదేవీపై 5,000 EDGE మైల్స్ క్రెడిట్ అవుతాయి.

6. ఐసీఐసీఐ బ్యాంక్ ఎమిరేట్స్ స్కైవార్డ్స్ క్రెడిట్ కార్డ్:

ఈ క్రెడిట్ కార్డుపై చేసే ఖర్చుల ద్వారా స్కైవార్డ్స్ మైల్స్ లభిస్తాయి. వీటిని విమాన టిక్కెట్లపై రిడీమ్ చేసుకోవచ్చు.

అదనంగా, ఈ కార్డుదారులు ఎయిర్‌పోర్ట్ లాంజ్ యాక్సెస్ సౌకర్యాన్ని కూడా పొందవచ్చు.

ఈ స్కైవార్డ్స్ క్రెడిట్ కార్డులో ఎమరాల్డే, సప్పిరో, రూబిక్స్ వంటి వివిధ వేరియంట్‌లు అందుబాటులో ఉన్నాయి.

(గమనిక- ఇది సమాచారం కోసం రూపొందించిన కథనం మాత్రమే. క్రెడిట్​ కార్డ్​ వినియోగం రిస్కీ అని గుర్తుపెట్టుకోవాలి.)