TCS Q3 results: క్యూ 3 లో టీసీఎస్ లాభాలు రూ. 12,380 కోట్లు; ఇన్వెస్టర్లకు భారీగా డివిడెండ్ కూడా..

TCS Q3 results and dividend: టాటా కన్సల్టెన్సీ సర్వీసెస్ (TCS) తన మూడో మధ్యంతర డివిడెండ్ ఇష్యూతో పాటు ప్రత్యేక డివిడెండ్ ఇష్యూను గురువారం ప్రకటించింది. ఈక్విటీ షేరుకు రూ.10 మధ్యంతర డివిడెండ్ ఇష్యూతో పాటు రూ.1 ముఖ విలువ కలిగిన ఈక్విటీ షేరుకు రూ.66 ప్రత్యేక డివిడెండ్ ను కంపెనీ ప్రకటించింది. "ఈ రోజు జరిగిన బోర్డు సమావేశంలో, డైరెక్టర్లు కంపెనీ యొక్క రూ .1 ఈక్విటీ షేరుకు రూ .10 మూడవ మధ్యంతర డివిడెండ్ మరియు రూ .66 ప్రత్యేక డివిడెండ్ ప్రకటించారని మేము మీకు తెలియజేయాలనుకుంటున్నాము’’ అని బిఎస్ఇ ఫైలింగ్ లో టీసీఎస్ తెలిపింది.

డివిడెండ్ రికార్డు డేట్

TCS బోర్డు ఒక్కో షేరుకు రూ.10 డివిడెండ్ మరియు రూ.66 ప్రత్యేక డివిడెండ్ ప్రకటించింది. గతంలో టీసీఎస్ FY25 లో Q1 లో రూ. 10, Q2లో రూ. 10 డివిడెండ్ లను ప్రకటించింది. మూడవ మధ్యంతర డివిడెండ్, ప్రత్యేక డివిడెండ్‌ను ఫిబ్రవరి 3, 2025 సోమవారం చెల్లిస్తామని కంపెనీ చెప్పింది. ఈ డివిడెండ్ (dividends) చెల్లింపునకు రికార్డు డేట్ శుక్రవారం, జనవరి 17, 2025 అని వెల్లడించింది.

12 వేల కోట్ల లాభాలు

భారత ఐటీ దిగ్గజం టాటా కన్సల్టెన్సీ సర్వీసెస్ (TCS) డిసెంబర్ త్రైమాసికం (Q3) గణాంకాలను గురువారం ప్రకటించింది. టీసీఎస్ క్యూ3 ఫలితాలు మార్కెట్ అంచనాలకు అనుగుణంగానే వచ్చాయి. ఈ క్యూ 3 లో టీసీఎస్ రూ. 12,380 కోట్ల నికర లాభాలను ఆర్జించింది. క్యూ 3 ఐటి కంపెనీలకు సీజన్ పరంగా బలహీనమైన త్రైమాసికం అయినప్పటికీ, టీసీఎస్ గణనీయ లాభాలను సాధించగలిగింది.

టీసీఎస్ క్యూ3 హైలైట్స్

• కార్యకలాపాల నుంచి కంపెనీ కన్సాలిడేటెడ్ ఆదాయం ఏడాది ప్రాతిపదికన 5.6 శాతం పెరిగి రూ. 60,583 కోట్ల నుంచి రూ.63,973 కోట్లకు పెరిగింది. స్థిర కరెన్సీ (సీసీ) పరంగా చూస్తే కంపెనీ ఆదాయం 4.5 శాతం పెరిగింది.
• క్యూ3 లో నికర లాభం రూ.11,058 కోట్ల నుంచి 12 శాతం పెరిగి రూ.12,380 కోట్లకు చేరింది.
• ఆపరేటింగ్ మార్జిన్ 50 బేసిస్ పాయింట్లు తగ్గి 24.5 శాతంగా నమోదైంది. అయితే క్వార్టర్ ఆన్ క్వార్టర్ (క్యూఓక్యూ)లో 40 బేసిస్ పాయింట్లు మెరుగుపడింది.
• కీలక డొమైన్లలో గత త్రైమాసికంలో సీసీ పరంగా 0.1 శాతం వృద్ధిని సాధించిన బీఎఫ్ఎస్ఐ 0.9 శాతం వృద్ధిని సాధించింది. సీసీ పరంగా కన్జ్యూమర్ బిజినెస్ సెగ్మెంట్ 1.1 శాతం వృద్ధి సాధించింది.
• కమ్యూనికేషన్, మీడియా విభాగం 10.6 శాతం, లైఫ్ సైన్సెస్ అండ్ హెల్త్ కేర్ విభాగం 4.3 శాతం వృద్ధిని నమోదు చేశాయి.