Mahindra XUV 3XO EV : మహీంద్రా ఎక్స్​యూవీ 3ఎక్స్​ఓకి ‘ఈవీ’ టచ్- టాటా నెక్సాన్​ ఈవీకి పోటీగా..!

ఇండియా మార్కెట్​లో ఈవీ సెగ్మెంట్​కి మంచి డిమాండ్​ ఉంది. దానిని క్యాష్​ చేసుకునేందుకు ఆటోమొబైల్​ సంస్థలు కొత్త కొత్త మోడల్స్​ని తీసుకొస్తున్నాయి. ఇంకొన్ని సంస్థలు, తమ ఐసీఈ వెహికిల్స్​కి ఈవీ టచ్​ ఇస్తున్నాయి. ఇక ఇప్పుడు మహీంద్రా అండ్​ మహీంద్రా సంస్థ కూడా ఈ జాబితాలో చేరింది. మహీంద్రా ఎక్స్​యూవీ300కి ఫేస్​లిఫ్ట్​ వర్షెన్​గా ఇటీవలే లాంచ్​ అయిన ఎక్స్​యూవీ 3ఎక్స్​ఓలో ఈవీ వర్షెన్​ని తీసుకొచ్చేందుకు ప్లాన్​ చేస్తోంది. ఈ ఎలక్ట్రిక్​ వెహికిల్​ టెస్ట్​ డ్రైవ్​ ఫొటోలు ఆన్​లైన్​లో ప్రత్యక్షమయ్యాయి. ఈ నేపథ్యంలో ఈ మోడల్​పై ఇప్పటివరకు ఉన్న వివరాలను ఇక్కడ తెలుసుకుందాము..

మహీంద్రా ఎక్స్​యూవీ 3ఎక్స్​ఓ ఈవీ..

మహీంద్రా ఎక్స్​యూవీ 3ఎక్స్ఓ ఈవీని ప్రవేశపెట్టడం ద్వారా సంస్థ తన ఎలక్ట్రిక్ వాహనాల లైనప్​ని విస్తరించే పనిలో పడింది. కాంపాక్ట్ ఎస్​యూవీ ఎలక్ట్రిక్ వర్షెన్ ఇటీవల భారత రోడ్లపై కనిపించింది. ఎక్స్​యూవీ 3ఎక్స్ఓ మహీంద్రా లైనప్​లోని ఎక్స్​యూవీ400 కంటే దిగువన ఉంటుంది. అంతేకాదు ఈవీ సెగ్మెంట్​లో భారీ మార్కెట్​ షేరు కలిగిన టాటా నెక్సాన్ ఈవీకి ఈ కొత్త మోడల్​ పోటీగా ఉంటుంది.

స్పై షాట్స్​లో ఎక్స్​యూవీ 3ఎక్స్ఓ ఈవీ కామోఫ్లాజ్​తో కనిపించింది. ఈవీ వర్షెన్ నుంచి ఐసీఈ వర్షెన్​ను వేరు చేయడంలో సహాయపడే కొన్ని డిజైన్ మార్పులు ఉంటాయని ఆశించవచ్చు.

హెడ్​ల్యాంప్ సెటప్, ఎల్​ఈడీ డేటైమ్ రన్నింగ్ ల్యాంప్ వంటివి ఎక్స్​యూవీ300 మాదిరిగానే ఉంటాయి. రీడిజైన్ చేసిన గ్రిల్, కొంచెం భిన్నమైన బ్యాడ్జింగ్, భిన్నమైన బంపర్ల సెట్ కూడా ఉండవచ్చు. ఎక్స్​యూవీ పొడవు ఎక్స్​యూవీ400 కంటే 200 మిమీ చిన్నది. దీనికి చిన్న బూట్ స్పేస్ ఉంటుంది. ఎక్స్​యూవీ400 బూట్ స్పేస్ 378 లీటర్లు. ఏరోడైనమిక్స్​ను మెరుగుపరచడానికి ఏరో ఇన్సర్ట్​లతో పాటు కొత్త అలాయ్ వీల్స్ ఉండవచ్చు.

ఎక్స్​యూవీ 400లో 34.5 కిలోవాట్ల సామర్థ్యం, 39.5 కిలోవాట్ల బ్యాటరీని అందించారు. మహీంద్రా ఎక్స్​యూవీ 3ఎక్స్ఓ ఈవీని చిన్న 34.5 కిలోవాట్ల బ్యాటరీ ప్యాక్​తో మాత్రమే లాంచ్​ చేయవచ్చు. కాబట్టి, ఎలక్ట్రిక్ ఎస్​యూవీ క్లెయిమ్ రేంజ్​ సుమారు 375 కిలోమీటర్లు ఉంటుందని అంచనాలు ఉన్నాయి. ఇది ఏసీ, డిసి ఫాస్ట్ ఛార్జింగ్​ను సపోర్ట్ చేయొచ్చు. ప్రస్తుతానికి ఎలక్ట్రిక్ మోటార్ స్పెసిఫికేషన్లపై ఎటువంటి అధికారిక సమాచారం లేదు. ఎక్స్​యూవీ 400లోని ఎలక్ట్రిక్ మోటార్ గరిష్టంగా 148బీహెచ్​పీ పవర్, 310ఎన్ఎమ్ టార్క్​ని ప్రొడ్యూస్ చేస్తుంది. ఎక్స్​యూవీ 3ఎక్స్ ఓ కోసం, మహీంద్రా అదే మోటార్ రీట్యూన్డ్ వర్షెన్​ను ఉపయోగించే అవకాశం ఉంది. ఫలితంగా పవర్​, టార్క్​ తగ్గొచ్చు.

ఈ మహీంద్రా ఎక్స్​యూవీ300 లాంచ్​, ఫీచర్స్​, ధరపై ప్రస్తుతానికి సమాచారం అందుబాటులో లేదు. త్వరలోనే అప్డేట్స్​ రావొచ్చు.

మరోవైపు మహీంద్రాకు ప్రస్తుతం ఒక్కటే ఈవీ ఉంది. అది ఎక్స్​యూవీ400. కానీ పలు కీలక మోడల్స్​ని సంస్థ తన లైనప్​లో తీసుకొచ్చేందుకు ఏర్పాట్లు చేసుకుంటోంది. ప్రస్తుత మహీంద్రా ఎక్స్​యూవీ 3ఎక్స్​ఓతో పాటు ఎక్స్​యూవీ700 ఈవీ, థార్​ ఈవీ, స్కార్పియో ఈవీకి సంబంధించిన ప్రాజెక్ట్స్​పై సంస్థ పనిచేస్తోంది. వీటి లాంచ్​పై అప్డేట్స్​ అందాల్సి ఉంది.