టాటా మోటార్స్ సరికొత్త రికార్డు.. ఒక్కరోజే 10,000 కార్ల డెలివరీ

జీఎస్టీ 2.0 కింద కార్ల ధరలు తగ్గించడంతో పాటు, పండుగ ఆఫర్లను ప్రకటించిన టాటా మోటార్స్ సరికొత్త రికార్డు సృష్టించింది. నవరాత్రుల మొదటి రోజే దేశవ్యాప్తంగా ఏకంగా 10,000 కార్లను డెలివరీ చేసి, ఆటోమొబైల్ పరిశ్రమలో ఒక మైలురాయిని అధిగమించింది. ఈ డెలివరీలతో పాటు, డీలర్‌షిప్‌లలో 25,000కి పైగా కార్ల కోసం ఎంక్వైరీలు రావడం విశేషం.

జీఎస్టీ ధరల తగ్గింపును పూర్తిగా వినియోగదారులకు బదిలీ చేస్తామని టాటా మోటార్స్ ఇటీవల ప్రకటించింది. దీనికి తోడు, అదనంగా పండుగ ఆఫర్లను కూడా ప్రకటించడంతో కార్ల అమ్మకాలు భారీగా పుంజుకున్నాయి. బడ్జెట్ చూసుకుంటూ, సరైన సమయం కోసం ఎదురుచూస్తున్న వినియోగదారులకు ఈ తగ్గింపులు చాలా ఉపయోగపడ్డాయి. ఈ ఆఫర్లు, ధరల తగ్గింపుల తర్వాత వివిధ మోడళ్లపై ఎంత మేర లబ్ధి పొందవచ్చో చూద్దాం.

మోడల్ వారీగా తగ్గిన ధరల వివరాలు

టియాగో (Tiago): ఈ మోడల్‌పై ఏకంగా రూ. 75,000 వరకు ధర తగ్గింది. పండుగ ఆఫర్లను కలుపుకుని మొత్తం రూ. 1.20 లక్షల వరకు ఆదా చేసుకోవచ్చు.

టిగోర్ (Tigor): కాంపాక్ట్ సెడాన్ అయిన ఈ కారుపై రూ. 1.04 లక్షల వరకు తగ్గింపు లభించింది.

ఆల్ట్రోజ్ (Altroz): ఈ ప్రీమియం హ్యాచ్‌బ్యాక్‌పై ధర రూ. 1.31 లక్షల వరకు తగ్గింది. పండుగ ఆఫర్లను కలుపుకుంటే మొత్తం ఆదా రూ. 1.7 లక్షలకు పైగా ఉంది.

పంచ్ (Punch): బెస్ట్ సెల్లర్ మోడళ్లలో ఒకటైన పంచ్ ధర రూ. 1.25 లక్షల వరకు తగ్గింది. ఈ మోడల్‌పై కూడా రూ. 1.7 లక్షలకు పైగా ఆదా చేసుకోవచ్చు.

నెక్సాన్ (Nexon): టాటాకు అత్యంత కీలకమైన ఎస్‌యూవీ నెక్సాన్‌పై రూ. 1.55 లక్షల భారీ తగ్గింపు లభించింది. పండుగ ఆఫర్లను కలుపుకుంటే మొత్తం లబ్ధి రూ. 2 లక్షలకు చేరువైంది.

హారియర్ & సఫారి (Harrier & Safari): ఈ రెండు మోడళ్లపై రూ. 1.48 లక్షలు (హారియర్), రూ. 1.50 లక్షలు (సఫారి) వరకు ధరలు తగ్గాయి. ఈ కార్లపైనా పండుగ ఆఫర్లను కలుపుకుంటే రూ. 1.9-2 లక్షల వరకు లబ్ధి పొందవచ్చు.

ఈ ఆఫర్లు సెప్టెంబర్ చివరి వరకు మాత్రమే అందుబాటులో ఉన్నాయి. టాటా మోటార్స్ ఈ నిర్ణయంతో భారత మార్కెట్లో తన స్థానాన్ని మరింత బలోపేతం చేసుకుంది.