టాటా హారియర్​ ఈవీ బుక్​ చేశారా? ఈ లాంగ్​ రేంజ్​ ఎలక్ట్రిక్​ కారు డెలివరీ ఎప్పటి నుంచి అంటే..

ఇటీవలే మార్కెట్​లోకి అడుగుపెట్టిన టాటా హారియర్​ ఈవీని బుక్​ చేసుకుని, డెలివరీ కోసం ఎదురుచూస్తున్న వారికి బిగ్​ అప్డేట్​! టాటా మోటార్స్​కి చెందిన ఈ సరికొత్త లాంగ్​ రేంజ్​ ఎలక్ట్రిక్​ కారు ప్రొడక్షన్​ మహారాష్ట్రలోని పుణె ప్లాంట్‌లో ప్రారంభమైంది. టాటా మోటార్స్ ఎలక్ట్రిక్ వాహన శ్రేణిలో ఈ కొత్త మోడల్​ ఒక కీలకంగా నిలవనుంది. దీని ధర వేరియంట్‌ను బట్టి రూ. 21.49 లక్షల నుంచి రూ. 30.23 లక్షల (ఎక్స్-షోరూమ్) వరకు ఉంది. ఈ కొత్త హారియర్ ఈవీకి మార్కెట్ నుంచి అద్భుతమైన స్పందన లభించిందని, బుకింగ్‌లు భారీగా ఉన్నాయని టాటా మోటార్స్ తెలిపింది. త్వరలోనే డీలర్‌షిప్‌లకు ఈ వాహనం చేరుకుంటుందని, ఈ నెలాఖరులో డెలివరీలు ప్రారంభం అవుతాయని సమాచారం!

టాటా హారియర్ ఈవీ ప్రొడక్షన్​ ప్రారంభం..

కొత్త టాటా హారియర్ ఈవీ acti.ev+ ఆర్కిటెక్చర్‌పై ఆధారపడి ఉంది. ఇది ఇంటర్నల్ కంబషన్ ఇంజిన్ వెర్షన్ ప్లాట్‌ఫారమ్‌కు ఆప్టిమైజ్ చేసిన రూపం. ఈ ఎలక్ట్రిక్ ఎస్​యూవీ రేర్-వీల్ డ్రైవ్, క్వాడ్-వీల్ డ్రైవ్ కాన్ఫిగరేషన్‌లలో లభిస్తుంది. ఆర్​డబ్ల్యూడీ వెర్షన్‌లో వెనుక యాక్సిల్‌పై ఒకే ఎలక్ట్రిక్ మోటార్ ఉంటుంది. అయితే క్యూడబ్ల్యూడీ వెర్షన్‌లో మాత్రం రెండు యాక్సిల్స్‌పై రెండు ఎలక్ట్రిక్ మోటార్లు ఉంటాయి!

టాటా హారియర్ ఈవీ: పవర్​, బ్యాటరీ అండ్​ రేంజ్..

టాటా హారియర్ ఈవీ ఆర్​డబ్ల్యూడీ వేరియంట్‌లు 235 బీహెచ్‌పీ (బ్రేక్ హార్స్‌పవర్) పవర్​ని, 315 ఎన్ఎమ్ (న్యూటన్ మీటర్) టార్క్‌ను ఉత్పత్తి చేసే సింగిల్ మోటార్‌తో వస్తాయి. ఇక క్యూడబ్ల్యూడీ డ్యూయల్-మోటార్ సెటప్ అయితే 391 బీహెచ్‌పీ పవర్​ని, 504 ఎన్ఎమ్ పీక్ టార్క్‌ను అందిస్తుంది.

ఈ ఎస్​యూవీ రెండు బ్యాటరీ ఆప్షన్లలో అందుబాటులో ఉంది. తక్కువ వేరియంట్‌లకు 65 కేడబ్ల్యూహెచ్​ బ్యాటరీ ప్యాక్ లభిస్తుంది. ఇది సింగిల్​ ఛార్జ్​తో 538 కి.మీ రేంజ్‌ను అందిస్తుంది. హై-ఎండ్ వేరియంట్‌లకు 75 కేడబ్ల్యూహెచ్​ బ్యాటరీ ప్యాక్ ఉంటుంది. ఇది పూర్తి ఛార్జింగ్‌తో ఆర్​డబ్ల్యూడీలో 627 కి.మీ, క్యూడబ్ల్యూడీలో 622 కి.మీ. రేంజ్‌ను ఇస్తుంది.

టాటా హారియర్ ఈవీ: ఫీచర్లు..

ఫీచర్ల విషయానికొస్తే, హారియర్ ఈవీ అనేక అధునాతన ఫీచర్లతో నిండి ఉంది. ఇందులో డిజిటల్ కన్సోల్, హర్మాన్ నుంచి శాంసంగ్​ నియో క్యూఎల్​ఈడీ డిస్‌ప్లే, డాల్బీ అట్మోస్ సౌండ్ సిస్టెమ్, పార్కింగ్ చేసేటప్పుడు బ్లైండ్-స్పాట్‌లను తగ్గించే 540-డిగ్రీల సరౌండ్ వ్యూ సిస్టమ్ ఉన్నాయి. ఈ మోడల్‌లో డిజిటల్ ఇంటీరియర్ రేర్ వ్యూ మిర్రర్ కూడా ఉంది. అంతేకాకుండా, కఠినమైన రహదారులపై వెళ్లేటప్పుడు వాహనం కింద ఉన్న ప్రాంతాన్ని చూసేందుకు వీలు కల్పించే ట్రాన్స్‌పరెంట్ ఫీచర్ కూడా ఇందులో ఉంది.

హారియర్ ఎలక్ట్రిక్​ కారు నాలుగు రంగులలో అందుబాటులో ఉంది. అవి.. నైనిటాల్ నాక్టర్న్, ఎంపావర్డ్ ఆక్సైడ్, ప్రిస్టీన్ వైట్, ప్యూర్ గ్రే. ప్రారంభం నుంచే ఆల్-బ్లాక్ స్టెల్త్ ఎడిషన్ కూడా లభిస్తుంది.