Tata Harrier Electric Car : త్వరలో రోడ్లపైకి టాటా కొత్త ఎలక్ట్రిక్ కారు.. 500 కి.మీ రేంజ్‌తో దూసుకెళ్లనుంది!
Tata Harrier EV : భారత్‌లో ఎలక్ట్రిక్ వాహనాల డిమాండ్ రోజురోజుకు పెరుగుతుంది. దీనికి తగ్గట్టుగా కంపెనీలు కూడా కొత్త మోడళ్లను తీసుకొస్తున్నాయి. ఇప్పటికే టాటా మోటర్స్‌కు చెందిన ఎలక్ట్రిక్ కార్లు రోడ్లుపై తిరుగుతున్నాయి. మరికొన్ని రోజుల్లో హారియర్ ఈవీని కూడా ఈ కంపెనీ తీసుకురానుంది.
టాటా మోటార్స్ నమ్మకమైన ఆటోమొబైల్ తయారీదారుగా గుర్తింపు పొందింది. దేశీయ ఎలక్ట్రిక్ కార్ల మార్కెట్‌ను శాసిస్తోంది. ఇది Tiago EV, Tigor EV, పంచ్ EV, Nexon EV, కర్వ్ EVలను విక్రయిస్తుంది. రాబోయే నెలల్లో సరికొత్త హారియర్ EVని విడుదల చేయడానికి సన్నాహాలు చేస్తోంది. కొత్త ఎలక్ట్రిక్ కారు అంచనా ధర, పనితీరు, ఫీచర్లు ఏంటి అనే దాని గురించి చూద్దాం..
ఉత్పత్తికి సిద్ధంగా ఉన్న టాటా హారియర్ ఈవీ వచ్చే 2025 జనవరిలో జరిగే భారత్ మొబిలిటీ గ్లోబల్ ఎక్స్‌పోలో ఆవిష్కరించే అవకాశం ఉంది. అన్నీ అనుకున్నట్లు జరిగితే ఈ కొత్త ఎలక్ట్రిక్ కారు మరికొద్ది నెలల్లో దేశీయ వినియోగదారుల ఇళ్ల ముందుకు వెళ్లనుంది.
కొత్త టాటా హారియర్ ఈవీ ధరలో వినియోగదారులకు అందుబాటులో ఉంటుందని భావిస్తున్నారు. దీని ఎక్స్-షోరూమ్ ధర రూ.25 నుంచి రూ.35 లక్షలుగా ఉండే అవకాశం ఉంది. ఈ కారు అతి త్వరలో అమ్మకానికి రానున్న అనేక ఎలక్ట్రిక్ కార్లకు గట్టి పోటీని ఇవ్వనుంది. మహీంద్రా XUVE9, హ్యుందాయ్ క్రెటా EVలు అతిపెద్ద ప్రత్యర్థులుగా ఉంటాయి.
సరికొత్త టాటా హారియర్ ఈవీ భారీ బ్యాటరీని కలిగి ఉంటుందని తెలుస్తోంది. దీని ప్రకారం ఒకసారి పూర్తిగా ఛార్జ్ చేస్తే 500 కి.మీ కంటే ఎక్కువ రేంజ్ ఇవ్వగలదని చెబుతున్నారు. ఇందులోని మోటార్ మరింత పవర్, పీక్ టార్క్ ఉత్పత్తి చేసే అవకాశం ఉందని, AWD (ఆల్ వీల్ డ్రైవ్) టెక్నాలజీని కలిగి ఉండవచ్చని అంటున్నారు.
టాటా హారియర్ EV డిజైన్ పెట్రోల్ పవర్డ్ మోడల్‌ను పోలి ఉండే అవకాశం ఉంది. అయితే ఇది వినూత్న అల్లాయ్ వీల్స్, బంపర్‌లను పొందే అవకాశం ఉంది. ఇది 5-సీటర్ ఆప్షన్ సిస్టమ్‌లో అందుబాటులో ఉంటుంది. ప్రయాణికులు సుదూర పట్టణాలకు సౌకర్యవంతంగా వెళ్లవచ్చు. ఈ కారులో వైద్యులు, ఇంజనీర్లు సహా అన్ని వర్గాలను ఆకర్షించే ఫీచర్లు ఉంటాయని భావిస్తున్నారు.
12.3-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆల్-డిజిటల్ ఇన్‌స్ట్రుమెంట్ క్లస్టర్, ట్విన్-స్పోక్ స్టీరింగ్ వీల్, స్టీరింగ్-మౌంటెడ్ కంట్రోల్స్, డ్యూయల్-జోన్ క్లైమేట్ కంట్రోల్, వైర్‌లెస్ ఛార్జర్, యాంబియంట్ లైటింగ్, 10-స్పీకర్ JBL సెటప్, సన్‌రూఫ్, వెంటిలేటెడ్ ఫ్రంట్ సీట్లు ఉంటాయి.
సరికొత్త టాటా హారియర్ ఈవీ ప్రయాణికులకు గరిష్ట రక్షణను కూడా అందిస్తుంది. భద్రత పరంగా ఇది 6-ఎయిర్‌బ్యాగ్‌లు, ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్), ESC (ఎలక్ట్రానిక్ స్టెబిలిటీ కంట్రోల్), క్రూయిజ్ కంట్రోల్ మరియు 360-డిగ్రీ కెమెరాను పొందవచ్చు.