5ఏళ్లల్లో 1970శాతం పెరిగిన రూ. 14 స్టాక్​ ఇది- ఇప్పుడు బిగ్​ అప్డేట్​తో అప్పర్​ సర్క్యూట్​!

వెల్​క్యూర్​ డ్రగ్స్ అండ్ ఫార్మాస్యూటికల్స్ (Welcure Drugs and Pharmaceuticals) షేరు ధర మంగళవారం ట్రేడింగ్ సెషన్‌లో 5 శాతం పెరిగి రూ. 14.28 వద్ద అప్పర్ సర్క్యూట్​ని తాకింది. సుమారు రూ. 85.6 కోట్ల (ఒక్కోటి ₹42.8 కోట్లు) విలువైన రెండు ఎక్స్​పోర్ట్​ సోర్సింగ్ ఆర్డర్‌లను పొందినట్లు కంపెనీ ప్రకటించడంతో స్టాక్​ ఇంతలా పెరిగింది.

వెల్​క్యూర్​ డ్రగ్స్​ అండ్​ ఫార్మాస్యూటికల్స్​ షేర్​ ప్రైజ్​ హిస్టరీ..

మంగళవారం ట్రేడింగ్​ సెషన్​లో రూ. 14.28 వద్ద ఉన్న వెల్​క్యూర్​ డ్రగ్స్​ అండ్​ ఫార్మా షేరు.. ఐదు రోజుల్లో 0.07శాతం పడింది. కానీ నెల రోజుల్లో 26.7శాతం పెరిగింది. ఈ స్మాల్​ క్యాప్​ స్టాక్​ ఆరు నెలల్లో 28.7శాతం, ఏడాదిలో 184.46శాతం వృద్ధి చెందింది. కాగా ఐదేళ్లల్లో ఈ స్టాక్​ ఏకంగా 1969.5శాతం వృద్ధి చెందింది. రూ. 0.69 నుంచి రూ. 14.28కి పెరిగింది.

వెల్​క్యూర్​ డ్రగ్స్ అండ్ ఫార్మాస్యూటికల్స్ కొత్త ఆర్డర్ వివరాలు..

వివిధ రకాల ఫార్మాస్యూటికల్ ప్రాడక్ట్స్​ ఉత్పత్తి, మార్కెటింగ్‌లో పాలుపంచుకుంటున్న వెల్​క్యూర్​ డ్రగ్స్ & ఫార్మాస్యూటికల్స్ లిమిటెడ్, అంతర్జాతీయ భాగస్వాములైన జెయింట్ ఎక్సిమ్, రవీనా ఇంటర్నేషనల్​తో సుమారు రూ.85.6 కోట్ల విలువైన రెండు ప్రధాన ఎక్స్​పోర్ట్​-సోర్సింగ్ ఒప్పందాలపై సంతకం చేసినట్లు ప్రకటించింది.

ఆదాయ నమూనా & ఆర్థిక ప్రభావం:

ఈ ఆర్డర్‌లు ఫీజు ఆధారిత ఆదాయాన్ని అందిస్తాయి. కంపెనీకి ఎలాంటి ఇన్వెంటరీ లేదా లాజిస్టిక్స్ నష్టం ఉండదు! ప్రతి లాట్ రవాణా చేసినప్పుడు కమీషన్ ఆదాయం వస్తుంది. ప్రస్తుత త్రైమాసికంలో మార్జిన్‌లను పెంచుతుందని భావిస్తున్నారు.

భవిష్యత్ ప్రణాళికలు:

కంపెనీ అదనపు అంతర్జాతీయ కొనుగోలుదారులతో ఇలాంటి ఎక్స్​పోర్ట్​ సోర్సింగ్ ఆర్డర్స్​ కోసం చర్చలు జరుపుతోంది. వాణిజ్య లాంఛనాలను బట్టి, ప్రస్తుత త్రైమాసికంలో రూ. 200 మిలియన్లు లేదా అంతకంటే ఎక్కువ విలువైన ఆర్డర్‌లను ఖరారు చేయాలని భావిస్తోంది.

కంపెనీ తన రుణం లేని మూలధన నిర్మాణాన్ని కొనసాగిస్తూ, తన ఫీజు-ఆధారిత ఎక్స్​పోర్ట్​ పోర్ట్‌ఫోలియోను విస్తరించడంపై దృష్టి సారించింది.

వెల్​క్యూర్​ డ్రగ్స్ అండ్ ఫార్మాస్యూటికల్స్- క్యూ4 ఫలితాలు..

2025 మార్చ్​ త్రైమాసికంలో వెల్​క్యూర్​ డ్రగ్స్ అండ్ ఫార్మాస్యూటికల్స్ రూ. 2.54 కోట్ల నికర లాభాన్ని నివేదించింది. మునుపటి త్రైమాసికంలో రూ. 0.02 కోట్ల నికర నష్టం నుంచి ఇది గణనీయమైన పురోగతి.

కంపెనీ అమ్మకాలలో కూడా గణనీయమైన పెరుగుదలను సాధించింది. మార్చ్​ 2025 త్రైమాసికంలో అమ్మకాలు రూ. 21.21 కోట్లుగా నమోదయ్యాయి. పూర్తి సంవత్సరానికి, కంపెనీ రూ. 2.17 కోట్ల నికర లాభాన్ని నివేదించింది. గత సంవత్సరంలో రూ. 0.17 కోట్ల నికర నష్టాన్ని చవిచూసింది.

1992లో స్థాపించిన వెల్​క్యూర్​ డ్రగ్స్ అండ్​ ఫార్మాస్యూటికల్స్, న్యూ ఢిల్లీ కేంద్రంగా పనిచేస్తున్న ఒక భారతీయ ఔషధ సంస్థ. ఇది టాబ్లెట్లు, క్యాప్సూల్స్, డ్రై సిరప్‌లు సహా వివిధ రకాల ఔషధ ఉత్పత్తులు వంటి ఫార్మాస్యూటికల్ ఫార్ములేషన్లను ఉత్పత్తి చేయడంలో, మార్కెటింగ్ చేయడంలో ప్రత్యేకత కలిగి ఉంది.

(గమనిక- ఇది సమాచారం కోసం రూపొందించిన కథనం మాత్రమే. హిందుస్థాన్​ టైమ్స్​ తెలుగు ఎలాంటి సంబంధం లేదు. ఏదైనా స్టాక్​లో ఇన్వెస్ట్​ చేసే ముందు సెబీ రిజిస్టర్డ్​ ఫైనాన్షియల్​ అడ్వైజర్​ని సంప్రదించడం శ్రేయస్కరం.)