భారతదేశంలో ఎలక్ట్రిక్ కార్ల అమ్మకాలు 2025లో 40 శాతం పెరగవచ్చు! పరిశోధనలో కీలక విషయాలు

భారత్‌లో ఎలక్ట్రిక్ కార్లకు రోజురోజుకు డిమాండ్ పెరుగుతుంది. ఈ ఏడాది ఎలక్ట్రిక్ కార్ల అమ్మకాలు 40 శాతం పెరుగుతాయని తాజా పరిశోధనలో తేలింది. ఫ్రాస్ట్ అండ్ సుల్లివన్ తాజా పరిశోధన ప్రకారం.. ఈ సంవత్సరం భారతదేశంలో కొత్త కార్ల అమ్మకాలలో 1,38,606 యూనిట్లను కలిగి ఉంటాయని భావిస్తున్నారు. ప్రభుత్వ వాహన పోర్టల్ డేటా ప్రకారం గత సంవత్సరం భారత మార్కెట్లో 99,004 ఎలక్ట్రిక్ కార్లు అమ్ముడయ్యాయి.

ఎలక్ట్రిక్ కార్లు భారతదేశంలో అత్యంత ప్రజాదరణ పొందుతున్నాయి. గత ఏడాది టాటా పంచ్ ఈవీ, టాటా టియాగో ఈవీ, టాటా నెక్సాన్ ఈవీ, ఎంజీ కామెట్, ఎంజీ విండ్సర్ భారత మార్కెట్లో అత్యధికంగా అమ్ముడైన ఐదు ఎలక్ట్రిక్ కార్లుగా నిలిచాయి. వీటితో పాటు పలు కొత్త బ్రాండ్లు కూడా ఈవీ మార్కెట్లోకి ప్రవేశించేందుకు సిద్ధమవుతున్నాయి. వీటిలో వియత్నామీస్ ఆటోమొబైల్ దిగ్గజం విన్ ఫాస్ట్ కూడా ఉంది.

మారుతి సుజుకి తన మొదటి ఈవీ ఇ-విటారా ఎస్‌యూవీని కూడా ఈ ఏడాది చివర్లో విడుదల చేయాలని యోచిస్తోంది. స్పోర్టీ సైబర్‌స్టర్ రోడ్‌స్టర్, విలాసవంతమైన ఎం9 ఎలక్ట్రిక్ ఎంపీవీతో సహా రెండు కొత్త ఎలక్ట్రిక్ వాహనాలను విడుదల చేయడానికి ఎంజీ ఇండియా సిద్ధంగా ఉంది. ఫ్రాస్ట్ అండ్ సుల్లివన్ పరిశోధన ప్రకారం 2030 నాటికి భారతదేశంలో ఎలక్ట్రిక్ కార్ల అమ్మకాలు ఏడు లక్షల యూనిట్లకు పెరుగుతాయి.

ప్రస్తుతం ఎస్‌యూవీలు, సబ్ కాంపాక్ట్ ఎస్‌యూవీలు భారతదేశంలో ఈవీ అమ్మకాల వృద్ధిని పెంచుతున్నాయని నివేదిక పేర్కొంది. సాంప్రదాయ కాంపాక్ట్ కార్ల కంటే పెద్ద ఎలక్ట్రిక్ వాహనాలకు వినియోగదారులు ప్రాధాన్యత ఇస్తున్నారు.

పెరుగుతున్న ఈవీ కార్లకు మద్దతుగా ఛార్జింగ్ మౌలిక సదుపాయాలు వేగంగా విస్తరిస్తున్నాయి. ప్రస్తుతం దేశవ్యాప్తంగా 25,500 కంటే ఎక్కువ పబ్లిక్ ఈవీ ఛార్జింగ్ స్టేషన్లు ఉన్నాయి. వీటిలో సుమారు 60,000 కనెక్టర్లు ఉన్నాయి. 301,000 ఈవీలు రోడ్డుపైకి వస్తున్నాయి. ప్రస్తుత నిష్పత్తి ప్రతి 7 ఈవీలకు 1 కనెక్టర్‌గా ఉంది. అయితే నిపుణులు 2030 నాటికి ప్రతి 5 ఈవీలకు 1 కనెక్టర్‌ను సాధించాలని చెబుతున్నారు.