రూ. 40వేల లోపు ధరలో లభించే బెస్ట్​ బ్రాండెడ్​ స్మార్ట్​ఫోన్స్​ ఇవి- ఏది బెస్ట్​?

రియల్‌మీ భారతదేశంలో తన జీటీ 7 సిరీస్‌కు కొత్త స్మార్ట్​ఫోన్‌ని ఇటీవలే విడుదల చేసింది. ఫ్లాగ్‌షిప్ మోడల్ అయిన రియల్‌మీ జీటీ 7 ప్రోతో మంచి గుర్తింపు పొందిన తర్వాత, ఇప్పుడు కంపెనీ ఈ సిరీస్ కింద రియల్‌మీ జీటీ 7 అనే మిడ్-రేంజ్ స్మార్ట్‌ఫోన్‌ను తీసుకొచ్చింది. ఈ స్మార్ట్‌ఫోన్ సరికొత్త మీడియాటెక్ డైమెన్సిటీ 9400ఈ చిప్‌తో పర్ఫార్మెన్స్ విభాగంలోకి ప్రవేశించింది. అయితే, సుమారు రూ. 40,000 ధరలో ప్రీమియం ఫీచర్లు, పర్ఫార్మెన్స్‌ను అందించే పలు స్మార్ట్‌ఫోన్‌లు మార్కెట్లో ఉన్నాయి. అటువంటి ప్రముఖ మిడ్-రేంజ్ ఫోన్‌లలో ఒకటి.. ఈ ఏడాది జనవరిలో విడుదలైన కొత్త వన్‌ప్లస్ 13ఆర్. ఈ నేపథ్యంలో కొత్త రియల్‌మీ జీటీ 7 అంచనాలకు తగ్గట్టుగా ఉందా లేదా అని తెలుసుకోవడానికి, వన్‌ప్లస్ 13ఆర్ స్మార్ట్‌ఫోన్‌తో పోల్చి చూద్దాము..

రియల్‌మీ జీటీ 7 వర్సెస్​ వన్‌ప్లస్ 13ఆర్: డిజైన్- డిస్‌ప్లే..

రియల్‌మీ జీటీ 7 స్మార్ట్​ఫోన్​ దాని ఫ్లాగ్‌షిప్ మోడల్ రియల్‌మీ జీటీ 7 ప్రో నుంచి స్ఫూర్తి పొంది, స్క్వేర్ షేప్​ కెమెరా మాడ్యూల్‌తో వస్తుంది. ఇది ఐస్‌సెన్స్ గ్రాఫేన్ బ్యాక్ ప్యానెల్, లేజర్-ఎచెడ్ ఫ్రేమ్‌ను కలిగి ఉండి, ప్రీమియం లుక్‌ను ఇస్తుంది. ఇది నీటి నుంచి రక్షణ కోసం ఐపీ69 రేటింగ్‌ను, ఆర్మర్ షెల్ ప్రొటెక్షన్‌ను కూడా కలిగి ఉంది. మరోవైపు, వన్‌ప్లస్ 13ఆర్ మ్యాట్-ఫినిష్డ్ గ్లాస్ బ్యాక్ ప్యానెల్, అల్యూమినియం ఫ్రేమ్‌ను కలిగి ఉంది. ఇది దాని ఫ్లాగ్‌షిప్ ఫోన్‌ల మాదిరిగానే ఉంటుంది. అయితే, తక్కువ ఐపీ65 రేటింగ్ కారణంగా ఇది రియల్‌మీ జీటీ 7 అంత మన్నికైనది కాదు!

డిస్‌ప్లే విషయానికి వస్తే, రియల్‌మీ జీటీ 7 6.78-ఇంచ్​ అమోఎల్​ఈడీ డిస్‌ప్లేను 120హెచ్​జెడ్​ రిఫ్రెష్ రేట్, 6000 నిట్స్​ పీక్ బ్రైట్‌నెస్‌తో కలిగి ఉంది. కాగా, వన్‌ప్లస్ 13ఆర్ 6.78-ఇంచ్​ ఎల్​టీపీఓ 4.1 అమోఎల్​ఈడీ డిస్‌ప్లేను 120హెచ్​జెడ్​ రిఫ్రెష్ రేట్, 4500నిట్స్​ పీక్ బ్రైట్‌నెస్‌తో అందిస్తుంది.

రియల్‌మీ జీటీ 7 వర్సెస్​ వన్‌ప్లస్ 13ఆర్: కెమెరా..

రియల్‌మీ జీటీ 7 ట్రిపుల్ కెమెరా సెటప్‌ను కలిగి ఉంది. ఇందులో 50ంఎంపీ సోనీ ఐఎంఎక్స్​906 మెయిన్ కెమెరా, 8ఎంపీ అల్ట్రావైడ్ కెమెరా, 2ఎక్స్​ ఆప్టికల్ జూమ్‌తో 50ఎంపీ శాంసంగ్ S5KJN5 టెలిఫోటో లెన్స్ ఉన్నాయి. మరోవైపు, వన్‌ప్లస్ 13ఆర్ కూడా ట్రిపుల్ కెమెరా సెటప్‌తో వస్తుంది. ఇందులో 50ఎంపీ సోనీ ఎల్​వైటీ700 మెయిన్ కెమెరా, 2ఎక్స్​ ఆప్టికల్ జూమ్‌తో 50ఎంపీ శాంసంగ్ S5KJN5 టెలిఫోటో లెన్స్, 8ఎంపీ అల్ట్రావైడ్ కెమెరా ఉన్నాయి. సెల్ఫీలు- వీడియో కాల్స్ కోసం, రియల్‌మీ జీటీ 7 స్మార్ట్​ఫోన్​ 32ఎంపీ ఫ్రెంట్​ కెమెరాను కలిగి ఉండగా, వన్‌ప్లస్ 13ఆర్​లో 16ఎంపీ సెల్ఫీ షూటర్‌ ఉంది.

రియల్‌మీ జీటీ 7 వర్సెస్​ వన్‌ప్లస్ 13ఆర్: పర్ఫార్మెన్స్- బ్యాటరీ..

రియల్‌మీ జీటీ 7 మీడియాటెక్ డైమెన్సిటీ 9400ఈ ప్రాసెసర్‌తో పనిచేస్తుంది. ఇది 12జీబీ వరకు ర్యామ్, 512GB వరకు స్టోరేజ్‌తో కనెక్ట్​ చేసి ఉంటుంది. వన్‌ప్లస్ 13ఆర్ ఫ్లాగ్‌షిప్ స్నాప్‌డ్రాగన్ 8 జెన్ 3 ప్రాసెసర్‌తో నడుస్తుంది. ఇది 16జీబీ వరకు ఎల్​పీడీడీఆర్​5ఎక్స్​ ర్యామ్, 512జీబీ స్టోరేజ్‌తో వస్తుంది. కాబట్టి, రెండు ఫోన్‌లు ప్రీమియం పర్ఫార్మెన్స్‌ను, రోజూవారీ వాడకంలో సాఫీగా పనిచేసే అనుభవాన్ని అందిస్తాయి.

చివరగా, రియల్‌మీ జీటీ 7 స్మార్ట్​ఫోన్​ 7000ఎంఏహెచ్​ బ్యాటరీతో వస్తుంది. కాగా వన్‌ప్లస్ 13ఆర్ 6000ఎంఏహెచ్​ బ్యాటరీతో వస్తుంది. రియల్‌మీ 120వాట్​ ఫాస్ట్ ఛార్జింగ్‌కు మద్దతు ఇస్తుంది, వన్‌ప్లస్ 80వాట్​ ఛార్జింగ్‌కు మద్దతు ఇస్తుంది.