ఆర్‌బీఐ రెపో రేటు: 50 బేసిస్ పాయింట్ల మేర వడ్డీ రేట్ల తగ్గింపు

ఆర్‌బీఐ కీలక నిర్ణయం: వృద్ధి మందగమనం, ద్రవ్యోల్బణం తగ్గుముఖం పట్టిన నేపథ్యంలో, భారతీయ రిజర్వ్ బ్యాంక్ (ఆర్‌బీఐ) ఒక ఆశ్చర్యకరమైన చర్యతో శుక్రవారం, జూన్ 6న అంచనాలకు మించి 50 బేసిస్ పాయింట్ల రెపో రేటును తగ్గించింది. వడ్డీ రేట్లు అరశాతం తగ్గనున్న నేపథ్యంలో రుణ గ్రహీతలకు ఈఎంఐల భారం తగ్గనుంది.

ఇది వరుసగా మూడోసారి కోత కావడం గమనార్హం. గవర్నర్ సంజయ్ మల్హోత్రా నేతృత్వంలోని ఆరుగురు సభ్యుల ద్రవ్య విధాన కమిటీ (ఎంపీసీ) విధాన రేటును 5.50 శాతానికి తగ్గించింది.

నేటి కోతతో కలిపి, ప్రపంచ వాణిజ్య యుద్ధం వంటి ప్రతికూల పరిస్థితుల మధ్య ఆర్థిక వ్యవస్థకు మద్దతు ఇవ్వడానికి 2025లో ఆర్‌బీఐ ఎంపీసీ వడ్డీ రేట్లను మొత్తం 100 బేసిస్ పాయింట్లు తగ్గించింది. ఫిబ్రవరిలో పావు శాతం (25 బేసిస్ పాయింట్లు) తగ్గింపుతో ఇది ప్రారంభమైంది, ఇది మే 2020 తర్వాత మొదటి కోత. ఏప్రిల్‌లో కూడా ఇదే స్థాయిలో తగ్గించింది.

జూన్ ఎంపీసీ సమావేశం నుండి కీలక అంశాలు:

• రెపో రేటు 50 బేసిస్ పాయింట్లు తగ్గించింది.
• తాజా కోతతో రెపో రేటు 5.50 శాతానికి చేరుకుంది.
• ఇది వరుసగా మూడోసారి వడ్డీ రేట్ల తగ్గింపు.
• ప్రపంచ ప్రతికూల పరిస్థితుల మధ్య ఆర్థిక వ్యవస్థకు మద్దతు ఇవ్వడం లక్ష్యం.
• 2025లో ఇప్పటివరకు వడ్డీ రేట్లు మొత్తం 100 బేసిస్ పాయింట్లు తగ్గాయి.
• భారతీయ రిజర్వ్ బ్యాంక్ వాస్తవ GDP వృద్ధిని 6.5% వద్ద కొనసాగించింది.
• ద్రవ్యోల్బణం గణనీయంగా తగ్గిందని, ద్రవ్యోల్బణం 4% గా ఉండటం వల్ల కొంత ఊరట లభిస్తుందని సంజయ్ మల్హోత్రా అన్నారు. ప్రధాన ద్రవ్యోల్బణం కూడా అనుకూలంగా ఉంటుందని భావిస్తున్నారు.
• భారతదేశం ఇప్పటికే వేగంగా అభివృద్ధి చెందుతోంది. కానీ అధిక వేగంతో వృద్ధి చెందాలని కోరుకుంటోందని మల్హోత్రా అన్నారు.
• రిటైల్ ద్రవ్యోల్బణం ఇటీవలి నెలల్లో ఊహించిన దానికంటే వేగంగా మందగించింది.
• ఏప్రిల్‌లో దాదాపు 6 సంవత్సరాల కనిష్ట స్థాయి 3.16%కి పడిపోయింది. ఇది RBI యొక్క మధ్య కాలిక లక్ష్యం 4% కంటే చాలా తక్కువగా ఉంది.
• జనవరి-మార్చి త్రైమాసికంలో GDP వృద్ధి 7.4%కి పెరగడంతో భారతదేశ ఆర్థిక వ్యవస్థ స్థితిస్థాపకంగా ఉంది.
• సంజయ్ మల్హోత్రా మాట్లాడుతూ, “ఈ సంవత్సరం 2025-2026 సంవత్సరానికి వాస్తవ GDP వృద్ధి రేటు 6.5%గా అంచనా వేశాం. ఇది మా మునుపటి అంచనాతో కొనసాగుతోంది. Q1 6.5%, Q2 6.7%, Q3 6.6% మరియు Q4 6.4%..’ అని చెప్పారు.