Best bike : ఓలా ఎలక్ట్రిక్​ బైక్​ కొనాలా? లేక హోండా షైన్​ 125 బెస్ట్​ ఆ? పూర్తి వివరాలు..

ఎలక్ట్రిక్ ద్విచక్ర వాహన మార్కెట్​లో చాలా కాలంగా ఎలక్ట్రిక్ స్కూటర్ల ఆధిపత్యం కొనసాగుతోంది. అయితే ఇప్పుడు ఓలా ఎలక్ట్రిక్ సంస్థ రంగంలోకి దిగుతోంది. ఈ ఎలక్ట్రిక్ ద్విచక్ర వాహన తయారీ సంస్థ ఓలా రోడ్​స్టర్​ సిరీస్ ఎలక్ట్రిక్ బైక్లను ఇటీవల విడుదల చేసింది. ఇది ఈవీ తయారీదారు నుంచి మొదటి ఎలక్ట్రిక్ బైక్​గా వస్తోంది. అలాగే దేశంలో అత్యంత సరసమైన ఎలక్ట్రిక్ బైక్స్​లో ఒకటిగా నిలిచింది ఓలా రోడ్​స్టర్​ ఎక్స్​.

ఓలా రోడ్​స్టర్ ఎక్స్, రివోల్ట్ ఆర్​వీ 1 వంటి ఎలక్ట్రిక్​ మోడళ్లతో పాటు ఐసీఈ విభాగంలో స్థిరపడిన దిగ్గజ ప్లేయర్లకు సైతం గట్టి పోటీని ఇస్తోంది. ముఖ్యంగా ఎంట్రీ లెవల్ సెగ్మెంట్​లో మంచి పోటీ కనిపిస్తోంది. ఈ నేపథ్యంలో ఓలా రోడ్​స్టర్​ ఎక్స్​ని హోండా షైన్​ 125తో పోల్చి, ఏది బెటర్​? వంటి వివరాలను ఇక్కడ తెలుసుకుందాము..

ఓలా రోడ్​స్టర్​ ఎక్స్ వర్సెస్ హోండా షైన్ 125: ధర

ఓలా రోడ్​స్టర్ ఎక్స్ ఎలక్ట్రిక్​ బైక్​ తొలుత రూ .75,000 - రూ .95,000 (ఎక్స్-షోరూమ్) వద్ద అందుబాటులో ఉండగా.. ఫిబ్రవరి 1 తర్వాత దీనిని రూ .90,000 - రూ .1.10 లక్షలకు (ఎక్స్-షోరూమ్) పెంచారు. ఓలా రోడ్​స్టర్ ఎక్స్ మూడు విభిన్న బ్యాటరీ ప్యాక్ ఆప్షన్స్​లో అందుబాటులో ఉంటుంది. అవి.. 2.5 కిలోవాట్, 3.5 కిలోవాట్, 4.5 కిలోవాట్​.

బేస్ వేరియంట్ ధర గతంలో రూ .75,000 (ఎక్స్-షోరూమ్) కాగా, ఇప్పుడు దీని ధర రూ .90,000 (ఎక్స్-షోరూమ్) గా ఉంది. మిడ్ వేరియంట్ 3.5 కిలోవాట్ల బ్యాటరీ ప్యాక్​తో పనిచేస్తుంది. దీని ధర రూ .1 లక్ష (ఎక్స్-షోరూమ్). టాప్-ఎండ్ వేరియంట్ 4.5 కిలోవాట్ల బ్యాటరీ ప్యాక్​తో పనిచేస్తుంది. దీని ధర రూ .1.10 లక్షలు (ఎక్స్-షోరూమ్).

ఇక 2025 హోండా షైన్ 125 డ్రమ్ వేరియంట్ ధర రూ .84,493, డిస్క్ వేరియంట్ ధర రూ .89,245 (ఎక్స్-షోరూమ్).

ఓలా రోడ్​స్టర్ ఎక్స్ వర్సెస్ హోండా షైన్ 125: స్పెసిఫికేషన్లు..

ఓలా రోడ్​స్టర్ ఎక్స్ ఎలక్ట్రిక్ బైక్​ 7 కిలోవాట్​ మోటార్​తో కనెక్ట్​ చేసి ఉంటుంది. బేస్ వేరియంట్ టాప్​ స్పీడ్​ గంటకు 105 కిలోమీటర్లు. ఒక్కసారి ఛార్జ్ చేస్తే 117 కిలోమీటర్ల రేంజ్​ని ఇస్తుంది. మిడ్ వేరియంట్ గరిష్టంగా గంటకు 117 కిలోమీటర్ల వేగాన్ని అందుకోగా, టాప్ ఎండ్ వేరియంట్ టాప్​ స్పీడ్​ గంటకు 124 కిలోమీటర్లు. ఈ రెండు వేరియంట్లు ఫుల్ ఛార్జ్ చేస్తే వరుసగా 159 కిలోమీటర్లు, 200 కిలోమీటర్లు ప్రయాణిస్తాయి.

హోండా షైన్ 125 బైక్​ ఇప్పుడు ఓబీడీ-2బీ కంప్లైంట్ ఇంజిన్​ని పొందుతుంది. ఈ బైక్ 123.94 సీసీ, సింగిల్ సిలిండర్, ఫ్యూయల్-ఇంజెక్టెడ్, ఎయిర్-కూల్డ్ మోటారును ఉపయోగిస్తుంది. ఇది 7,500 ఆర్​పీఎం వద్ద 10.6 బీహెచ్​పీ పవర్​ని, 6,000 ఆర్​పీఎమ్ వద్ద 11 ఎన్ఎమ్ పీక్​ టార్క్​ని జనరేట్​ చేస్తుంది.