ఓలా జీరో కమీషన్ మోడల్.. ఎన్ని రైడ్‌లు కొట్టినా మెుత్తం సంపాదన డ్రైవర్లకే!

క్యాబ్ సర్వీస్ అందించే ఓలా జీరో కమిషన్ మోడల్‌ను ప్రారంభించింది. దీని కింద డ్రైవర్లకు ప్రతి రైడ్‌కు ఎటువంటి కమీషన్ వసూలు అవ్వదు. ఈ మోడల్ డ్రైవర్ల ఆదాయాన్ని 20-30 శాతం పెంచుతుందని, ఇది వారి ఆర్థిక స్థితిని బలోపేతం చేస్తుందని ఓలా నమ్ముతుంది.

కంపెనీ దేశవ్యాప్తంగా జీరో కమిషన్ మోడల్‌ను అమలు చేసింది. దీని ప్రత్యక్ష ప్రయోజనం క్యాబ్ డ్రైవర్లకు ఉంటుంది. ఈ కొత్త మోడల్ కింద డ్రైవర్ల నుండి ఎటువంటి కమిషన్ తీసుకోరు. కంపెనీ ఈ నిర్ణయం పట్ల డ్రైవర్లు చాలా ఉత్సాహంగా ఉన్నారు. ఈ ప్రకటన రైడ్-హెయిలింగ్ పరిశ్రమలో కూడా సంచలనం సృష్టించింది.

జీరో కమీషన్ మోడల్

ఓలా, ఉబర్ వంటి అన్ని రైడ్-హెయిలింగ్ కంపెనీలు ప్రతి రైడ్‌కు డ్రైవర్ల నుండి కమీషన్ వసూలు చేస్తాయి. ఇది సాధారణంగా 20-30 శాతం వరకు ఉంటుంది. ఈ కమిషన్ కారణంగా డ్రైవర్ సంపాదన ప్రభావితమవుతుంది. డ్రైవర్‌కు మరిన్ని ప్రయోజనాలను అందించడానికి ఓలా జీరో కమీషన్ మోడల్‌ను తీసుకువచ్చింది. కొత్త మోడల్ కింద, డ్రైవర్ ప్రతి రైడ్‌కు ఎటువంటి కమిషన్ చెల్లించాల్సిన అవసరం లేదు. ఓలా ప్లాట్‌ఫామ్‌ను ఉపయోగించినందుకు డ్రైవర్ల నుండి స్థిరమైన ఫీజును చెల్లించాలి. అంటే సాఫ్ట్‌వేర్ యాజ్ ఏ సర్వీస్ విధానంపై ఫీజు చెల్లించాల్సి ఉంటుంది. ఇది రోజుకు రూ.67, నెలకు రూ.2010 వరకు ఉండొచ్చు.

మెుత్తం డ్రైవర్లకే

ఇక డ్రైవర్లు ప్రతి రైడ్ నుండి వచ్చే మొత్తం ఆదాయాన్ని ఉంచుకోగలుగుతారు. ఇది వారి ఆదాయాన్ని పెంచుతుంది. ఓలా ఈ కొత్త మోడల్ ఆటో, బైక్, క్యాబ్ సర్వీస్‌కు వర్తిస్తుంది. 10 లక్షలకు పైగా ఓలా డ్రైవర్లు దీనిని సద్వినియోగం చేసుకుంటారు. డ్రైవర్లు ఇకపై ప్రతి రైడ్‌కు కంపెనీకి ఎటువంటి వాటా చెల్లించాల్సిన అవసరం లేదు. రైడ్ మొత్తం ఛార్జీ డ్రైవర్ల ఖాతాకు వెళుతుంది.

ఈ కొత్త మోడల్ ప్రయాణికుల భద్రత, సేవను ప్రభావితం చేయదని, వారు మునుపటిలాగే ఉంటారని ఓలా తెలిపింది. ఈ నిర్ణయం డ్రైవర్ నెలవారీ ఆదాయాన్ని 20 శాతం నుండి 30 శాతం వరకు పెంచుతుందని ప్రకటించింది.

వచ్చే సమస్యలు

ఈ కొత్త జీరో కమీషన్ మోడల్ తక్కువ రైడ్‌లు వెళ్లే డ్రైవర్లకు స్థిరమైన ఫీజు భారంగా మార్చవచ్చు. ఇతర కంపెనీలు కూడా ఇలాంటి నమూనాలను అమలు చేయవచ్చు. దీని వలన ఓలా తన వ్యూహాన్ని మరింత మెరుగుపరచుకోవలసి రావచ్చు. కమీషన్ నుండి వచ్చే ఆదాయాన్ని నిలిపివేయడం ఓలా ఆర్థిక స్థితిని ప్రభావితం చేయవచ్చు.