Electric scooters : ఓలా ఎలక్ట్రిక్ నుంచి కొత్త హై పర్ఫార్మెన్స్, లాంగ్ రేంజ్ ఈ-స్కూటర్లు..
Ola Electric : ఓలా ఎలక్ట్రిక్ ఆరు ఎలక్ట్రిక్ ద్విచక్ర వాహనాలను సిద్ధం చేస్తోందని సమాచారం. ఇందులో హై పెర్ఫార్మెన్స్, లాంగ్ రేంజ్ ఈవీలు ఉంటాయని తెలుస్తోంది. ఇవి ఎఫ్వై26 రెండో భాగంలో లాంచ్ అవ్వొచ్చు.
ఓలా ఎలక్ట్రిక్కి సంబంధించి ఒక బిగ్ అప్డేట్ మార్కెట్లోకి వచ్చింది! ఏథర్ ఎనర్జీ, హీరో మోటోకార్ప్ యాజమాన్యంలోని విడా, టీవీఎస్ మోటార్ కంపెనీ, హోండా వంటి ప్రత్యర్థుల నుంచి తీవ్ర పోటీ ఎదుర్కొంటున్న ఈ సంస్థ.. భారత ఎలక్ట్రిక్ ద్విచక్ర వాహన మార్కెట్లో ఎక్కువ భాగాన్ని కైవసం చేసుకోవాలని లక్ష్యంగా పెట్టుకుంది. ఇందులో భాగంగా, ఈ ఈవీ స్టార్టప్ తన అమ్మకాల పరిమాణం, మార్కెట్ వాటాను పెంచుకోవడానికి కొత్త మోడల్స్ని తీసుకొస్తోంది. ఇవి 2026 ఆర్థిక సంవత్సరం రెండవ త్రైమాసికం తర్వాత విడుదల అవుతాయని తెలుస్తోంది.
కొత్త ఎలక్ట్రిక్ స్కూటర్లు..
ప్రస్తుతం ఎలక్ట్రిక్ స్కూటర్లు, ఎలక్ట్రిక్ మోటార్ సైకిళ్ల శ్రేణిని విక్రయిస్తున్న ఎలక్ట్రిక్ ద్విచక్ర వాహన తయారీ సంస్థ దేశంలో కనీసం ఆరు కొత్త ఎలక్ట్రిక్ ద్విచక్ర వాహనాలను విడుదల చేయాలని యోచిస్తోంది. ఓలా ఎలక్ట్రిక్ ఈ రాబోయే ఎలక్ట్రిక్ ద్విచక్ర వాహనాలను 2025 ఆగస్టు 15 స్వాతంత్ర్య దినోత్సవం రోజున ఆవిష్కరించే అవకాశం ఉంది!
రాబోయే ఈ మోడళ్లతో ఓలా ఎలక్ట్రిక్ పట్టణ ప్రయాణికుల నుంచి అడ్వెంచర్ రైడర్ల వరకు దేశంలోని విస్తృత శ్రేణి వినియోగదారుల అవసరాలను తీర్చాలని లక్ష్యంగా పెట్టుకుంది. ఓలా ఎలక్ట్రిక్ ఇప్పటికే స్పోర్ట్స్టర్, క్రూయిజర్, రోడ్స్టర్ ప్రో, అడ్వెంచర్, డైమండ్హెడ్ వంటి అనేక ఎలక్ట్రిక్ బైక్స్ని ఆవిష్కరించింది. ఇప్పుడు ఎలక్ట్రిక్ మోటార్ సైకిల్ లైనప్ని మరింత విస్తరించాలని కంపెనీ లక్ష్యంగా పెట్టుకుంది. వీటితో పాటు ఓలా ఎలక్ట్రిక్ కొత్త ఎలక్ట్రిక్ మోటార్ సైకిళ్ల శ్రేణిని కూడా లాంచ్ చేయాలని యోచిస్తోంది.
ఓలా ఎలక్ట్రిక్ హై పర్ఫార్మెన్స్ స్కూటర్లు..
ఓలా ఎలక్ట్రిక్ ఆరు కొత్త ఎలక్ట్రిక్ ద్విచక్ర వాహనాలను పైప్లైన్లో ఉంచింది. ఇవి 2026 ఆర్థిక సంవత్సరం రెండవ త్రైమాసికం తర్వాత భారత మార్కెట్లోకి వస్తాయి. వాటిలో ఒకటి ఎస్1 స్పోర్ట్స్. ఇది హై-పెర్ఫార్మెన్స్ ఎలక్ట్రిక్ స్కూటర్గా వస్తుంది. ఇది ప్రస్తుతం ఉన్న ఓలా ఎస్ 1 ప్లాట్ఫామ్పై ఆధారపడి ఉంటుందని భావిస్తున్నారు. ఇది ఎస్1 శ్రేణిలో అత్యంత శక్తివంతమైన ఎలక్ట్రిక్ స్కూటర్ అయ్యే అవకాశం ఉంది.
కొత్త ప్లాట్ఫామ్ ఎస్2 ఆధారంగా కొత్త మోడళ్ల శ్రేణి ఉంటుంది. ఓలా ఎస్2 శ్రేణిలో ఎస్2 సిటీ, ఎస్2 స్పోర్ట్స్, ఎస్2 టూరర్ వంటి ఎలక్ట్రిక్ స్కూటర్లు ఉన్నాయి. ఎస్1 సిటీ కమ్యూటర్ మోడల్ కాగా, ఎస్2 స్పోర్ట్స్ హై పెర్ఫార్మెన్స్ మోడల్గా ఉంటుంది. మరోవైపు, ఎస్ 2 టూరర్ లాంగ్ డిస్టెన్స్ ఫోకస్ మోడల్గా వస్తుంది. ఇది మరింత రేంజ్ని అందిస్తుంది.
వీటితో పాటు మరో కొత్త ప్లాట్ఫామ్ ఎస్3 సైతం సిద్ధమవుతోంది! ఇది మ్యాక్సీ స్కూటర్ కోసం ఉంటుంది. ఇదే ప్లాట్ఫామ్ ఆధారంగా ఓలా ఎస్3 గ్రాండ్ అడ్వెంచర్ని లాంచ్ చేయాలని యోచిస్తోంది. ఇది సుదూర ఈవీ కోసం ఉద్దేశించినది. అలాగే ఎస్3 గ్రాండ్ టూరర్ కూడా ఉంటుంది. ఇది హై-స్పీడ్ క్రూయిజింగ్కు అనుకూలంగా ఉంటుంది.
నష్టాలు, సర్వీస్పై విపరీతమైన ఫిర్యాదుల నేపథ్యంలో ఓలా ఎలక్ట్రిక్పై వచ్చిన ఈ అప్డేట్ ఆసక్తికరంగా మారింది.
సంబంధిత కథనం