మిడిల్​ క్లాస్​ మైండ్​సెట్​కి సూట్​ అయ్యే మ్యూచువల్​ ఫండ్స్​ ఇవి! రిస్క్​ తక్కువ- రిటర్నులు ఎక్కువ..

ద్రవ్యోల్బణంతో పోరాడాలంటే ‘ఇన్వెస్ట్​మెంట్​’ చేయాల్సిందే అని ఆర్థిక నిపుణులు చెబుతుంటారు. కానీ ఇప్పటికీ, చాలా మందికి పెట్టుబడులపై భయాలు ఉంటున్నాయి. మరీ ముఖ్యంగా స్టాక్​ మార్కెట్​ అంటే భయంతో చాలా దూరంగా ఉండిపోతుంటారు. మ్యూచువల్​ ఫండ్స్​వైపు కూడా చూడటం లేదు! మిడిల్​ క్లాస్​ వారిలో చాలా మంది ఇప్పటికీ డబ్బులను ఎఫ్​డీల్లో లేదా సేవింగ్స్​ అకౌంట్స్​లో వదిలేస్తున్నారు. వీటితో ద్రవ్యోల్బణాన్ని ఎదుర్కోవడం కష్టం. అయితే, దీర్ఘకాలంలో పెట్టుబడులపై గొప్ప రిటర్నులు ఇచ్చిన చరిత్ర మ్యూచువల్​ ఫండ్స్​కి ఉన్నాయి. మరీ ముఖ్యంగా మ్యూచువల్​ ఫండ్స్​లో రిస్క్​ తక్కువగా ఉండి, మంచి రిటర్నులు పొందాలని చూసే వారికి ‘ఇండెక్స్​ ఫండ్స్​’ ఉత్తమం! ఈ నేపథ్యంలో అసలు ఇండెక్స్​ ఫండ్స్​ అంటే ఏంటి? ఈ తరహా ఫండ్స్​తో ఉపయోగాలేంటి? వంటి వివరాలను ఇక్కడ తెలుసుకుందాము..

ఇండెక్స్​ మ్యూచువల్​ ఫండ్స్​ అంటే ఏంటి?

సెన్సెక్స్​, నిఫ్టీ వంటి స్టాక్​ మార్కెట్​ సూచీల్లో ఇన్​వెస్ట్​ చేయడాన్ని ఇండెక్స్​ మ్యూచువల్​ ఫండ్​ అంటారు. ఉదాహరణకు నిఫ్టీ 50లో.. 50 సంస్థలకు చెందిన స్టాక్స్​ ఉంటాయి కదా! అవి పెరుగుతూ ఉంటే.. నిఫ్టీ 50 వృద్ధిచెందుతుంది. ఆయా స్టాక్స్​ పడితే.. నిఫ్టీ పతనమవుతుంది. నిఫ్టీ 50 ఇండెక్స్​ మ్యూచువల్​ ఫండ్​ కూడా ఇంతే! ఇందులో నిఫ్టీ 50కి చెందిన స్టాక్స్​ ఉంటాయి. అందువల్ల.. నిఫ్టీ 50 రిటర్నుల తగ్గట్టుగానే నిఫ్టీ 50 మ్యూచువల్​ ఫండ్​లోనూ రిటర్నులు ఉంటాయి.

ఇండెక్స్​ మ్యూచువల్​ ఫండ్​ విషయంలో మేనేజర్లు పెద్దగా కష్టపడరు. ఒక ఇండెక్స్​ని ఎంచుకుని అందులోని స్టాక్స్​లో ఎప్పటికప్పుడు మదుపర్ల నగదును పెడితే సరిపోతుంటారు. ఏ స్టాక్​లో ఎంత శాతం పెట్టుబడి పెట్టాలి? అన్నది.. సెబీ నిర్ణయించే వెయిటేజ్​పై ఆధారపడి ఉంటుంది.

ఒక్క మాటలో చెప్పాలంటే ఇండెక్స్​ మ్యూచువల్​ ఫండ్స్​ అనేవి స్టాక్​ మార్కెట్​లో ఎఫ్​డీల్లాంటివి! దీర్ఘకాలంలా ఈ ఇండెక్స్​ ఫండ్స్​ 12శాతం రిటర్నులు తెచ్చుపెట్టాయి. అందుకే, స్టాక్​ మార్కెట్​లో ఈ 12శాతాన్ని ప్రామాణికంగా తీసుకుంటారు.

ఉదాహరణకు మీరు 30ఏళ్ల పాటు, ప్రతి నెలా రూ. 5వేల వరకు ఇండెక్స్​ మ్యూచువల్​ ఫండ్​లో ఇన్వెస్ట్​ చేయగలిగితే.. మీరు పెట్టుబడి పెట్టింది కేవలం రూ. 18లక్షలు అవుతుంది. కానీ మీ ఇన్వెస్ట్​మెంట్​ వాల్యూ రూ. 1,76,49,569 అవుతుంది! ఇలా తక్కువ రిస్క్​తో మీరు కోటీశ్వరులు అవ్వొచ్చు.

ఎక్కువ రిస్క్​ తీసుకోకుండా, దీర్ఘకాలంలో మంచి లాభాలు పొందాలని చూసే వారికి ఇవి కరెక్ట్​గా సూట్​ అవుతాయి.

అయితే మ్యూచువల్​ ఫండ్స్​లో పెట్టుబడి పెట్టే ముందు వాటి హిస్టరీతో పాటు ఎక్స్​పెన్స్​ రేషియో, ట్యాక్స్​ పర్సెంటేజ్​ వంటివి కూడా పరిగణలోకి తీసుకోవాలి. 

ఏదేమైనా మ్యూచువల్​ ఫండ్స్​ అనేది రిస్క్​తో కూడుకున్న వ్యవహారం అని గుర్తుపెట్టుకోవాలి.

(గమనిక:- ఇది సమాచారం రూపొందించిన కథనం మాత్రమే. హెచ్​టీ తెలుగుకు ఎలాంటి సంబంధం లేదు. ఏదైనా ఇన్వెస్ట్​మెంట్​ చేసే ముందు మీరు సెబీ రిజిస్టర్డ్​ ఫైనాన్షియల్​ అడ్వైజర్​ని సంప్రదించడం శ్రేయస్కరం.)