ముహూరత్ ట్రేడింగ్: ఈసారి మధ్యాహ్నమే.. స్టాక్ మార్కెట్ వ్యూహం ఏంటి?

భారతీయ స్టాక్ ఎక్స్ఛేంజీలు నేడు, అంటే మంగళవారం, అక్టోబర్ 21న ప్రత్యేకమైన ముహూరత్ ట్రేడింగ్ సెషన్‌ను నిర్వహించబోతున్నాయి. దివాలి పండుగ సందర్భంగా హిందూ క్యాలెండర్ ప్రకారం కొత్త సంవత్సరం, సంవత్ 2082 ప్రారంభాన్ని సూచిస్తూ ఈ సాంప్రదాయక ట్రేడింగ్‌ను నిర్వహిస్తారు.

సాధారణంగా సాయంత్రం వేళల్లో జరిగే ఈ శుభ ముహూర్త ట్రేడింగ్ సమయాలు ఈసారి మారాయి. అనేక దశాబ్దాల తర్వాత తొలిసారిగా, దీనిని మధ్యాహ్నం 1:45 PM నుండి 2:45 PM వరకు నిర్వహించాలని బాంబే స్టాక్ ఎక్స్ఛేంజ్ (BSE), నేషనల్ స్టాక్ ఎక్స్ఛేంజ్ (NSE) నిర్ణయించాయి. ఈ మార్పు కార్యాచరణపరంగానే కాకుండా, కొత్త సంవత్ ప్రారంభంలో ఇది ఒక ప్రత్యేక సంకేతం.

ముహూరత్ ట్రేడింగ్: తేదీ, సమయం, ప్రత్యేకత

ట్రేడర్లు, పెట్టుబడిదారులు అత్యంత శుభప్రదంగా భావించే ముహూర్త ట్రేడింగ్ కోసం ఈసారి నిర్దేశించిన సమయాలు, ఇతర సెషన్‌ల వివరాలు ఇక్కడ ఉన్నాయి:

• ప్రీ-ఓపెన్ సెషన్: మధ్యాహ్నం 1:30 PM నుంచి 1:45 PM వరకు
• ప్రధాన ట్రేడింగ్ విండో: మధ్యాహ్నం 1:45 PM నుంచి 2:45 PM వరకు
• బ్లాక్ డీల్ సెషన్: మధ్యాహ్నం 1:15 PM నుంచి 1:30 PM వరకు
• క్లోజింగ్ సెషన్: మధ్యాహ్నం 2:55 PM నుంచి 3:05 PM వరకు

దీని ప్రత్యేకత ఏమిటి?

ముహూరత్ ట్రేడింగ్‌ను సంపదకు, అదృష్టానికి చిహ్నంగా చూస్తారు. ఈ శుభ సమయంలో చేసే ట్రేడ్‌లు లేదా కొనుగోళ్లు ఏడాది పొడవునా మంచి రాబడిని, అదృష్టాన్ని తెస్తాయని చాలా మంది నమ్ముతారు. సంప్రదాయబద్ధంగా వ్యాపార సంస్థలు ఈ సమయంలో చోప్డా పూజన్ (ఆర్థిక ఖాతాల పూజ) చేసి, ఆ తర్వాతే మొదటి ట్రేడ్‌ను లేదా ఒక సింబాలిక్ కొనుగోలును చేస్తారు.

ట్రేడింగ్ పరంగా చూస్తే, ఇది వాస్తవమైన ట్రేడింగ్ సెషన్ అయినప్పటికీ (సెటిల్‌మెంట్ బాధ్యతలు దీనికి వర్తిస్తాయి), ట్రేడింగ్ వాల్యూమ్ సాధారణంగా తక్కువగా ఉంటుంది. చాలా మంది ట్రేడర్లు ఊహాజనిత లావాదేవీలకు బదులుగా, దీన్ని కేవలం దీర్ఘకాలిక పెట్టుబడులు లేదా శుభసూచకంగా కొనుగోళ్లు చేయడానికి మాత్రమే ఉపయోగిస్తారు.

మార్కెట్ పనితీరు: ఈసారి పరిస్థితి ఏంటి?

గత దశాబ్దంలో, నిఫ్టీ 50 సూచీ ఈ సంవత్ కాలాల్లో సగటున ఏటా 12% నుంచి 15% వరకు రాబడిని సాధించింది. అయితే, దివాలి 2024 నుంచి దివాలి 2025 వరకు భారతీయ స్టాక్ మార్కెట్ సాధారణ వృద్ధిని మాత్రమే నమోదు చేసింది. నిఫ్టీ 50 సుమారు 5% పెరగగా, సెన్సెక్స్ దాదాపు 4% మాత్రమే పెరిగింది.

నిపుణుల అభిప్రాయం ప్రకారం, ఇది గత ఏడాదితో పోలిస్తే నిదానమైన పనితీరు. దీనికి ప్రపంచవ్యాప్త అనిశ్చితులు, దేశీయ సవాళ్ల నేపథ్యంలో మార్కెట్ ఏకీకరణ (Consolidation) దశలో ఉండటమే కారణంగా చెప్పవచ్చు.

యాక్సిస్ డైరెక్ట్ నివేదిక ప్రకారం, సంవత్ 2080లో నిఫ్టీ 50, సెన్సెక్స్‌లు వరుసగా 26,277, 85,978 వద్ద రికార్డు గరిష్ట స్థాయిలను చేరుకున్నాయి. అయినప్పటికీ, సంవత్ 2081లో ఈ రెండు సూచీలు 15% కంటే ఎక్కువ పతనాన్ని చవిచూశాయి. ఇది దీర్ఘకాలిక పెట్టుబడిదారులకు ఆకర్షణీయమైన ఎంట్రీ పాయింట్లను సృష్టించింది. నిఫ్టీ 21,743, సెన్సెక్స్ 71,425 కనిష్ట స్థాయిలకు పడిపోయినప్పటికీ, మార్కెట్లు పుంజుకొని, స్థిరపడటం తదుపరి వృద్ధి దశకు మార్గం సుగమం చేస్తోంది.

సంవత్ 2082కి పెట్టుబడి వ్యూహం

మనం ఇప్పుడు సంవత్ 2082లోకి అడుగుపెడుతున్నందున, మార్కెట్ యొక్క సాంకేతిక దృక్పథం బలంగా కనిపిస్తోంది.

నిఫ్టీ లక్ష్యం: నిఫ్టీ 50 సూచీ 26,300 నుంచి 27,000 వరకు పెరిగే అవకాశం ఉందని అంచనా వేస్తున్నారు. అయితే, 24,500–24,000 వద్ద కీలకమైన మద్దతు స్థాయిలు (Support Levels) ఉన్నాయని నిపుణులు పేర్కొన్నారు.

స్మాల్‌క్యాప్, మిడ్‌క్యాప్ స్టాక్స్‌కు ఊతం: ఈ సమయంలో మిడ్‌క్యాప్, స్మాల్‌క్యాప్ స్టాక్‌లు కూడా పుంజుకునే అవకాశం ఉంది.

వ్యూహం: అందుకే, పెట్టుబడిదారులు దీర్ఘకాలిక దృక్పథంతో స్టాక్‌లను కొనుగోలు చేయడంపై దృష్టి సారించాలని ఆర్థిక నిపుణులు సూచిస్తున్నారు.

(ముఖ్య గమనిక: ఈ కథనంలో పేర్కొన్న అభిప్రాయాలు, సిఫార్సులు కేవలం వ్యక్తిగత విశ్లేషకులు లేదా బ్రోకింగ్ సంస్థలకు సంబంధించినవి. ఏదైనా పెట్టుబడి నిర్ణయం తీసుకునే ముందు ధృవీకరించబడిన నిపుణులను సంప్రదించడం మంచిది.)