50 ఎంపీ కెమెరా, 6000 ఎంఏహెచ్​ బ్యాటరీతో మోటోరోలా ఎడ్జ్​ 60 సిరీస్​ లాంచ్​..

మోటోరోలా నుంచి కొత్త స్మార్ట్​ఫోన్​ సిరీస్​ అంతర్జాతీయ మార్కెట్​లో లాంచ్​ అయ్యింది. దీని పేరు మోటోరోలా ఎడ్జ్​ 60. ఇందులో మోటోరోలా ఎడ్జ్​​ 60, ఎడ్జ్​ 60 ప్రో గ్యాడ్జెట్స్​ ఉన్నాయి. ఇవి ఎడ్జ్ 50, ఎడ్జ్ 50 ప్రో మోడళ్లకు సక్సెసర్​గా మార్కెట్​లోకి అడుగుపెట్టాయి. కొత్త స్మార్ట్​ఫోన్స్​ అనేక కీలక క్వాలిటీస్​ని పంచుకుంటాయి కాని కొన్ని ఫీచర్స్​ భిన్నంగా ఉంటాయి. రెండు గ్యాడ్జెట్స్​లో వాటర్ అండ్ డస్ట్ రెసిస్టెన్స్ కోసం ఐపీ 69 రేటింగ్, 50 మెగాపిక్సెల్ ఫ్రంట్ కెమెరా, 50 మెగాపిక్సెల్ ప్రైమరీ సెన్సార్​తో ట్రిపుల్ రియర్ కెమెరా సిస్టెమ్ 3ఎక్స్ ఆప్టికల్ జూమ్​ వంటివి ఉన్నాయి.

ఇండియాలో లాంచ్ గురించి అధికారిక ధృవీకరణ లేనప్పటికీ, మోటోరోలా ఎడ్జ్​ 60 ప్రో వేరియంట్ ఈ నెలాఖరులో భారతదేశానికి వచ్చే అవకాశం ఉందని సమాచారం. ఎందుకంటే మోటోరోలా ఇప్పటికే తన అధికారిక వెబ్​సైట్స్​లో ఈ స్మార్ట్​ఫోన్​ లిస్ట్​ చేసింది. ఫ్లిప్​కార్ట్ ద్వారా దాని రాకను టీజ్ చేస్తోంది. ఈ నేపథ్యంలో ఈ ఫోన్స్​ వివరాలను చూసేయండి..

మోటోరోలా ఎడ్జ్ 60, ఎడ్జ్ 60 ప్రో స్పెసిఫికేషన్లు, ఫీచర్లు..

మోటోరోలా ఎడ్జ్ 60, ఎడ్జ్ 60 ప్రో రెండింటిలోనూ 6.7 ఇంచ్​ 1.5కే 120 హెర్ట్జ్ క్వాడ్ కర్వ్డ్ పోలెడ్ డిస్​ప్లే, హెచ్​డీఆర్10+ సపోర్ట్, 4500 నిట్స్ వరకు పీక్​ బ్రైట్​నెస్​ ఉన్నాయి. అదే 50 మెగాపిక్సెల్ సెల్ఫీ కెమెరా, ఆప్టికల్ ఇమేజ్ స్టెబిలైజేషన్ (ఓఐఎస్) తో 50 మెగాపిక్సెల్ ప్రైమరీ కెమెరా వంటివి ఉన్నాయి. అదనంగా, రెండు మోడళ్లు 3ఎక్స్ ఆప్టికల్ జూమ్, ఓఐఎస్ సామర్థ్యం ఉన్న 10 మెగాపిక్సెల్ టెలిఫోటో లెన్స్​తో వస్తాయి. రెండింటి మధ్య ఉన్న ఏకైక వ్యత్యాసం.. అల్ట్రావైడ్ కెమెరా వ్యూ. ప్రో మోడల్ 122-డిగ్రీల వ్యూ అందిస్తుంది. ప్రామాణిక మోడల్ 120-డిగ్రీల వ్యూ అందిస్తుంది.

పర్ఫార్మెన్స్​ పరంగా, మోటోరోలా ఎడ్జ్ 60 స్మార్ట్​ఫోన్​ మీడియాటెక్ డైమెన్సిటీ 7300 చిప్​సెట్ (2.5 గిగాహెర్ట్జ్), ఎడ్జ్ 60 ప్రో మరింత శక్తివంతమైన డైమెన్సిటీ 8350 ప్రాసెసర్​ (3.35 గిగాహెర్ట్జ్) కలిగి ఉన్నాయి. అదనంగా, ప్రో వేరియంట్లో 90 వాట్ ఫాస్ట్ ఛార్జింగ్ సపోర్ట్​తో 6,000 ఎంఏహెచ్ పెద్ద బ్యాటరీ ఉంది. రెగ్యులర్ మోడల్ 5,200 ఎంఏహెచ్ బ్యాటరీ, 68 వాట్ ఫాస్ట్ ఛార్జింగ్ సపోర్ట్​తో వస్తుంది. ఆండ్రాయిడ్ 15 ఆపరేటింగ్ సిస్టెమ్​పై పనిచేసే ఈ రెండు ఫోన్లలో యూఎస్బీ-సీ 2.0, ఇన్ స్క్రీన్ ఫింగర్ ప్రింట్ స్కానర్, డాల్బీ అట్మాస్​తో స్టీరియో స్పీకర్లు ఉన్నాయి. స్టాండర్డ్ మోడల్ మైక్రో ఎస్​డీ కార్డ్ ద్వారా ఎక్స్​పాండబుల్ స్టోరేజ్​కు సపోర్ట్ చేస్తుంది.

మోటోరోలా ఎడ్జ్ 60, ఎడ్జ్ 60 ప్రో: ధర

మోటోరోలా ఎడ్జ్ 60 ధర 379.99 పౌండ్లు (సుమారు రూ. 43,000), ఎడ్జ్ 60 ప్రో స్మార్ట్​ఫోన్​ ప్రారంభ ధర 599.99 పౌండ్లు (సుమారు రూ.68,000).

భారతదేశంలో మోటోరోలా ఎడ్జ్ 60 ప్రో లాంచ్​..

మోటోరోలా భారతదేశంలో రాబోయే ఎడ్జ్ 60 సిరీస్ గ్యాడ్జెట్​ లాంచ్​ను ఫ్లిప్​కార్ట్ మొబైల్ యాప్​లోని పోస్టర్ ద్వారా టీజ్ చేసింది. ఎడ్జ్ 60 ప్రో మోటోరోలా ఇండియా వెబ్​సైట్​లో పాంటోన్ షాడో, పాంటోన్ డాస్లింగ్ బ్లూ, పాంటోన్ స్పార్క్​లింగ్​ గ్రేప్​తో పాటు బహుళ రంగుల ఎంపికలలో వస్తుంది. 8 జీబీ+256 జీబీ, 12 జీబీ+256 జీబీ స్టోరేజ్ వేరియంట్లలో లభిస్తుంది. అధికారిక ధర, అమ్మకాల వివరాలు ఇంకా వెల్లడించనప్పటికీ, ఎడ్జ్ 60 ప్రో ఈ నెలాఖరులో భారతదేశంలో లాంచ్ అవుతుందని నివేదికలు సూచిస్తున్నాయి.