ఎంజీ విండ్సర్ ఈవీ ప్రో వర్సెస్ విండ్సర్ ఈవీ- రెండింటిలో దేని రేంజ్​ ఎక్కువ? ధర తక్కువ?

ఇండియాలో బెస్ట్​ సెల్లింగ్​ ఎలక్ట్రిక్​ కారుగా దూసుకెళుతున్న ఎంజీ విండ్సర్​ ఈవీలో కొత్త వేరియంట్​ తాజాగా లాంచ్​ అయ్యింది. దీని పేరు ఎంజీ విండ్సర్​ ఈవీ ప్రో. ఈ నేపథ్యంలో కొత్త ఎంజీ విండ్సర్​ ఈవీ ప్రోని, ఇప్పటికే మార్కెట్​లో ఉన్న విండ్సర్​ ఈవీతో పోల్చి.. ఈ రెండింటిలో ఏది బెస్ట్​? అన్నది ఇక్కడ తెలుసుకుందాము..

ఎంజీ విండ్సర్ ఈవీ ప్రో వర్సెస్ ఎంజీ విండ్సర్ ఈవీ: ధర

ఎంజీ విండ్సర్ ఈవీ ప్రో ఎక్స్​షోరూమ్ ధర రూ.17.50 లక్షలు. ఈ కొత్త వేేరియంట్​లో బ్యాటరీ-యాస్-ఏ-సర్వీస్ (బీఏఎస్) ఫీచ్​ని ఎంచుకునే వినియోగదారులు విండ్సర్ ఈవీ ప్రో ఎలక్ట్రిక్​ కారును రూ .12.50 లక్షల నుంచి కొనుగోలు చేసుకోవచ్చు. బ్యాటరీ అద్దె కిలోమీటరుకు రూ .4.5 వద్ద లభిస్తుంది. అయితే ఇవి ఇంట్రొడక్టరీ ప్రైజ్​ అని గుర్తుపెట్టుకోవాలి. మొదటి 8వేల కస్టమర్స్​కి మాత్రమే ఇవి వర్తిస్తాయి.

కొత్త ఎంజీ విండ్సర్ ఈవీ ప్రో బుకింగ్స్ మే 8, 2025న ప్రారంభమవుతాయి.

మరోవైపు స్టాండర్డ్ మోడల్ ఎంజీ విండ్సర్​ ఈవీ ఎలక్ట్రిక్​ కారు బేస్ ఎక్సైట్ వేరియంట్ ధర రూ .13.99 లక్షలు. ఎక్స్​క్లూజివ్​, ఎసెన్స్ వేరియంట్స్​ ఎక్స్​షోరూం ధరలు వరుసగా రూ .14.99 లక్షలు, రూ .15.99 లక్షలు. ఈ ధరలు పూర్తిగా కొనుగోలు చేయడానికి. బీఏఎస్ విషయానికి వస్తే విండ్సర్ ఈవీ ధర కిలోమీటరుకు రూ.3.5 చొప్పున రూ.9.99 లక్షల నుంచి ప్రారంభమవుతోంది. బీఏఎస్​తో ఎక్స్​క్లూజివ్​, ఎసెన్స్ ట్రిమ్ లెవల్ ఎక్స్​షోరూం ధరలు వరుసగా రూ.10.99 లక్షలు, రూ.11.99 లక్షలుగా ఉన్నాయి.

ఎంజీ విండ్సర్ ఈవీ ప్రో వర్సెస్ ఎంజీ విండ్సర్ ఈవీ: స్పెసిఫికేషన్లు

ఎంజీ విండ్సర్ ఈవీ ప్రోలో అతిపెద్ద మార్పు కొత్త బ్యాటరీ ప్యాక్! కొత్త ఎలక్ట్రిక్​ కారులో 52.9 కిలోవాట్ల బ్యాటరీ ప్యాక్ ఉంటుంది. ఇది ఒక్కసారి ఛార్జ్ చేస్తే 449 కిలోమీటర్ల రేంజ్​ని ఇస్తుంది. అయితే, ఎంజీ విండ్సర్ ఈవీ ప్రో పవర్ ఔట్​పుట్​లో ఎటువంటి మార్పు లేదు. ఇది 134 బీహెచ్​పీ, 200 ఎన్ఎమ్ గరిష్ట టార్క్​ను జనరేట్​ చేసే అదే ఫ్రంట్-యాక్సిల్-మౌంటెడ్ ఎలక్ట్రిక్ మోటారును ఉపయోగిస్తుంది.

మరోవైపు విండ్సర్ ఈవీ స్టాండర్డ్ వెర్షన్​లో 38 కిలోవాట్ల బ్యాటరీ ప్యాక్ ఉంది. దీనిని ఒక్కసారి ఛార్జ్ చేస్తే 331 కిలోమీటర్ల రేంజ్​ని అందిస్తుంది. మోటార్ స్పెసిఫికేషన్లు ప్రో మోడల్ మాదిరిగానే ఉంటాయి.

ఎంజీ విండ్సర్ ఈవీ ప్రో వర్సెస్ ఎంజీ విండ్సర్ ఈవీ: ఫీచర్లు..

విండ్సర్ ఈవీ ప్రో క్యాబిన్ కొత్త డ్యూయెల్-టోన్ బ్లాక్, ఐవరీ ఇంటీరియర్లతో వస్తుంది. ఇది కొత్త వేరియంట్​కి ప్రీమియం టచ్​ని జోడిస్తుంది. ఇది కాకుండా క్యాబిన్ కోసం సాధారణ మోడల్ మాదిరిగానే అవే ఫీచర్లు ఉన్నాయి. అయితే ప్రో వేరియంట్లో లెవల్ 2 అటానమస్ డ్రైవింగ్ అసిస్టెన్స్ సిస్టెమ్ (ఏడీఏఎస్) విత్ ట్రాఫిక్ జామ్ అసిస్ట్, ఫార్వర్డ్ కొలిషన్ వార్నింగ్, అడాప్టివ్ క్రూయిజ్ కంట్రోల్ వంటి కొత్త ఫీచర్లు వచ్చాయి. ఈ మోడల్ లో వెహికల్-టు-లోడ్ (వీ2ఎల్) ఫంక్షన్, వెహికల్-టు-వెహికల్ (వీ2వీ) ఛార్జింగ్ ఉన్నాయి. ఇది మోడల్​కు మరింత వైవిధ్యతను తెస్తుంది.

రెగ్యులర్ మోడల్ బ్లాక్ ఇంటీరియర్ థీమ్​ని పొందుతుంది. ఏడీఏఎస్, వీ2ఎల్, వీ2వీ వంటి ఫీచర్లను కోల్పోతుంది. ఇది 6-వే అడ్జెస్టెబుల్ సీటును పొందుతుంది. ఫ్రంట్ ప్యాసింజర్ 4-వే అడ్జెస్టెబుల్ సీటును పొందుతుంది. అంతేకాకుండా, ఇది 15.6 టచ్​స్క్రీన్​ ఇన్ఫోటైన్​మెంట్ సిస్టెమ్, రేర్ ఏసీ వెంట్స్, పనోరమిక్ గ్లాస్ రూఫ్ వంటి ఫీచర్లను కూడా పొందుతుంది.

ఎంజీ విండ్సర్ ఈవీ ప్రో వర్సెస్ ఎంజీ విండ్సర్ ఈవి: డిజైన్

విండ్సర్ ఈవీ ప్రో ఎలక్ట్రిక్​ కారు కొత్త డైమండ్-కట్ అల్లాయ్ వీల్స్​ని పొందుతుంది. ఇది తక్కువ వేరియంట్లలో లభించే ఏరో వీల్స్​తో పోలిస్తే భిన్నమైన రూపాన్ని ఇస్తుంది. కొత్త ఎంజీ విండ్సర్ ఈవీ ప్రో సెలాడన్ బ్లూ, గ్లేజ్ రెడ్, అరోరా సిల్వర్ అనే మూడు కొత్త రంగులతో లభిస్తుంది.

విండ్సర్ డిజైన్​లో సొగసైన ఎల్ఈడీ డీఆర్ఎల్స్​ ఉన్నాయి. ఇవి ఒకదానికొకటి కనెక్ట్ అయ్యి ఉంటాయి. ఇవి ముందు భాగంలో నడిచే ఎల్ఈడీ స్ట్రిప్​తో అనుసంధానించి ఉంటాయి. ఈ కారులో ఇల్యూమినేటెడ్ బ్రాండ్ లోగో, ఎల్ఈడీ హెడ్- టెయిల్ ల్యాంప్స్, ఫ్లష్ ఫిట్టింగ్ డోర్ హ్యాండిల్స్ ఉన్నాయి.