సింగిల్​ ఛార్జ్​తో 331 కి.మీ రేంజ్​- ఈ కొత్త ఎలక్ట్రిక్​ కారు ధర రూ. 10లక్షల కన్నా తక్కువే!

ఇండియాలో బెస్ట్​ సెల్లింగ్​ ఎలక్ట్రిక్​ కారుగా పేరొందిన ఎంజీ విండ్సర్​ ఈవీలో లిమిటెడ్​ ఎడిషన్​ మోడల్​ని సంస్థ తాజాగా లాంచ్​ చేసింది. దాని పేరు ఎంజీ విండ్సర్​ ఈవీ ఇన్​స్పైర్​. ఈ సరికొత్త ఈవీ ప్రారంభ ధర రూ. 16.65 లక్షలు (ఎక్స్-షోరూమ్)గా ఉంది. అయితే, బ్యాటరీ-యాజ్-ఏ-సర్వీస్ (బీఏఏఎస్​) ఆప్షన్‌ను ఎంచుకునే వినియోగదారులు ఈ వాహనాన్ని కేవలం రూ. 9.99 లక్షలు (ఎక్స్-షోరూమ్)కే సొంతం చేసుకోవచ్చు. ఇది లిమిటెడ్ ఎడిషన్ కావడంతో.. దేశవ్యాప్తంగా 300 యూనిట్లు మాత్రమే అందుబాటులో ఉంటాయని గమనించాలి. విజువల్ అప్‌గ్రేడ్స్‌తో ఈ ప్రత్యేక ఎడిషన్ కారును తీర్చిదిద్దారు. ఈ నేపథ్యంలో ఈ మోడల్​ వివరాలను ఇక్కడ తెలుసుకోండి..

ఎంజీ విండ్సర్​ ఈవీ ఇన్​స్పైర్​- డిజైన్, లుక్స్..

ఎంజీ విండ్సర్ ఈవీ ఇన్‌స్పైర్ ఎడిషన్ పర్ల్ వైట్, స్టార్రీ బ్లాక్ రంగుల కలయికతో, డ్యూయల్-టోన్ ఎక్స్‌టీరియర్‌తో వస్తుంది. దీనికి రోజ్ గోల్డ్ క్లాడింగ్‌తో కూడిన ఆల్‌-బ్లాక్ అల్లాయ్ వీల్స్, బ్లాక్ ఓఆర్‌వీఎంలు, ఇన్‌స్పైర్ బ్రాండింగ్ ప్రత్యేక ఆకర్షణను ఇస్తాయి. ఈ స్పెషల్ ఎడిషన్‌లో యాక్సెసరీ ప్యాక్ కూడా ఉంది. దీనిలో భాగంగా ముందు గ్రిల్‌పై, బంపర్ కార్నర్ ప్రొటెక్టర్లపై రోజ్ గోల్డ్ డిజైన్ ఎలిమెంట్స్‌ను జోడించారు.

ఎంజీ విండ్సర్​ ఈవీ ఇన్​స్పైర్​- ఇంటీరియర్..

ఇన్‌స్పైర్ ఎలక్ట్రిక్​ కారు లోపలి భాగంలో కూడా అదే థీమ్‌ను కొనసాగించారు. లోపల సాంగ్రియా రెడ్, బ్లాక్ లెదర్ అప్‌హోల్‌స్టరీ ఉంటుంది. హెడ్‌రెస్ట్‌లపై ఎంబ్రాయిడరీ చేసిన 'ఇన్‌స్పైర్' లోగో, లోపలంతా గోల్డ్ యాక్సెంట్స్ కంటికి ఇంపుగా ఉంటాయి. థీమ్‌కు సరిపోయే మ్యాట్లు, కుషన్లు, వెనుక విండో సన్‌షేడ్లు, లెదర్ కీ కవర్ వంటి ఫీచర్లు కూడా ఇందులో ఉన్నాయి. కస్టమర్లు కోరుకుంటే, స్కైలైట్ ఇన్ఫినిటీ వ్యూ గ్లాస్ రూఫ్, వైర్‌లెస్ ఇల్యూమినేటెడ్ సిల్ ప్లేట్స్ వంటి ఆప్షనల్ యాక్సెసరీలను ఎంజీ డీలర్‌షిప్‌ల వద్ద కొనుగోలు చేసుకోవచ్చు.

ఎంజీ విండ్సర్​ ఈవీ ఇన్​స్పైర్- రేంజ్​..

ఎంజీ విండ్సర్ ఈవీ ఇన్‌స్పైర్ ఎడిషన్‌లో 38 కేడబ్ల్యూహెచ్​ బ్యాటరీని అమర్చారు. దీనికి పెర్మనెంట్ మాగ్నెట్ సింక్రోనస్ మోటార్న్​ను జత చేశారు. ఇది ముందు చక్రాలకు పవర్​ని అందిస్తుంది. ఈ మోటార్ 134 బీహెచ్‌పీ పవర్​ని, 200 ఎన్ఎమ్ టార్క్‌ను ఉత్పత్తి చేస్తుంది. ఒక్కసారి పూర్తిగా ఛార్జ్ చేస్తే ఈ కారు 331 కిలోమీటర్ల వరకు ప్రయాణించగలదని ఎంజీ కంపెనీ చెబుతోంది. అంతేకాకుండా, డీసీ ఫాస్ట్ ఛార్జింగ్ సదుపాయంతో కేవలం 40 నిమిషాల్లో బ్యాటరీని 80 శాతం వరకు ఛార్జ్ చేసుకోవచ్చు!

ఎంజీ విండ్సర్​ ఈవీ ఇన్​స్పైర్- బుకింగ్స్, డెలివరీ తేదీ..

ఈ మోడల్ విడుదల, విండ్సర్ ఈవీ తొలి వార్షికోత్సవాన్ని కూడా సూచిస్తుంది. ఈ కాలంలోనే కంపెనీ ఈ మోడల్‌కు సంబంధించి 40,000 యూనిట్లను విక్రయించింది. ఇన్‌స్పైర్ ఎడిషన్ కోసం బుకింగ్‌లు ఇప్పటికే ప్రారంభమయ్యాయి. ఈ ఎలక్ట్రిక్ వాహనం డెలివరీలు అక్టోబర్ 15, 2025 నుంచి మొదలవుతాయి.