Best Maruti car : అవసరం ఏదైనా- ఈ ఒక్క వ్యాన్ ఉంటే చాలు! మారుతీ సుజుకీ 'ఈకో'కు 15ఏళ్లు..
ఇండియాలో అన్ని అవసరాలకు ఉపయోగించగలిగే వ్యాన్గా గుర్తింపు పొందిన మారుతీ సుజుకీ ఈకోకు 15ఏళ్లు నిండాయి! ఈ మోడల్ ఎందుకు ప్రత్యేకం? వంటి వివరాలను ఇక్కడ తెలుసుకోండి..
మారుతీ సుజుకీ ఈకో 15 సంవత్సరాలు పూర్తి చేసుకుంది! ఈకోకి సంబంధించి ఇప్పటివరకు 12 లక్షలకుపైగా యూనిట్లను విక్రయించినట్టు సంస్థ ప్రకటించింది. 2010 లో లాంచ్ అయిన తరువాత ఈ మైక్రోవాన్కి భారతదేశంలో మంచి డిమాండ్ కనిపించింది. చాలా కాలం వరకు ఈ మోడల్ హాట్ కేకుల్లా అమ్ముడుపోయింది. ఈ నేపథ్యంలో మారుతీ సుజుకీ ఈకో ఎందుకు ప్రత్యేకం? ధర ఎంత? పూర్తి వివరాలను ఇక్కడ తెలుసుకుందాము..

మారుతీ సుజుకీ ఈకోకి 15ఏళ్లు..
వివిధ అవసరాల కోసం వాడుకునే విధంగా ఉండటం ఈ మారుతీ సుజుకీ ఈకో ప్రత్యేకత! #HarSafarBaneKhaas (ప్రతి ప్రయాణాన్ని ప్రత్యేకంగా చేయండి) అన్న మార్కెటింగ్ ట్యాగ్ లైన్తో ఈ వ్యాన్ ప్రజల్లోకి వెళ్లింది. ఈ ఈకో వ్యాన్ పెట్రోల్, డ్యూయల్-ఫ్యూయల్ ఎస్-సీఎన్జీ వంటి ఆప్షన్స్లో అందుబాటులో ఉంది.
ఇప్పటికీ పెట్రోల్, సీఎన్జీ మోడల్స్ అమ్మకాలు దాదాపు సమానంగా ఉందని తయారీదారు తమ ప్రకటనలో హైలైట్ చేసింది. అమ్మకాల్లో పెట్రోల్ ఇంజిన్ వాటా 57 శాతం కాగా, 43శాతం సీఎన్జీ యూనిట్లో సీఎన్జీని అమర్చినట్టు పేర్కొంది.
“మారుతీ సుజుకీ ఈకోను గ్రామీణ ప్రాంతాల్లో ప్రముఖంగా విక్రయిస్తున్నాము. భారతదేశానికి అత్యంత ప్రియమైన వ్యాన్గా పరిగణిస్తున్న ఈకో పట్టణ మార్కెట్లలోనే కాకుండా గ్రామీణ ప్రాంతాలలో కూడా తన సామర్థ్యాన్ని నిరూపించుకుంది,” అని మారుతీ సుజుకీ ఇండియా లిమిటెడ్ మార్కెటింగ్ అండ్ సేల్స్ సీనియర్ ఎగ్జిక్యూటివ్ ఆఫీసర్ పార్థో బెనర్జీ తన ప్రకటనలో తెలిపారు.
మారుతీ సుజుకీ ఈకో: వేరియంట్లు..
మారుతీ సుజుకీ ఈకో 13 విభిన్న వేరియంట్లలో లభిస్తుంది! వీటిలో 5-సీటర్, 7-సీటర్, కార్గో, టూర్, అంబులెన్స్ వంటి అత్యవసర వాహన కాన్ఫిగరేషన్లు ఉన్నాయి.
మారుతీ సుజుకీ ఈకో: ఇంజిన్, పనితీరు..
మారుతీ సుజుకీ ఈకోలో 1200 సీసీ, కే-సిరీస్ డ్యూయల్ జెట్, డ్యూయల్ వీవీటీ ఇంజిన్ ఉంది. ఈ ఇంజిన్ 6,000 ఆర్పీఎమ్ వద్ద 79.5 బీహెచ్పీ పవర్, 3,000 ఆర్పీఎమ్ వద్ద 104.4 ఎన్ఎమ్ పీక్ టార్క్ని జనరేట్ చేస్తుంది.
మారుతీ సుజుకీ ఈకో: సేఫ్టీ కూడా..!
ఈ మారుతీ సుజుకీ మైక్రోవాన్లో డ్రైవర్ ఎయిర్ బ్యాగ్, ఏబీఎస్ విత్ ఈబీడీ, రివర్స్ పార్కింగ్ సెన్సార్లు, డ్రైవర్- కో-డ్రైవర్ ఇద్దరికీ సీట్ బెల్ట్ రిమైండర్లు, హై-స్పీడ్ అలర్ట్ సిస్టమ్ వంటి కొన్ని భద్రతా ఫీచర్లు కూడా ఉన్నాయి.
ఇండియాలో మారుతీ సుజుకీ ఈకో ధర రూ. 6.49 లక్షల నుంచి రూ. 8 లక్షల వరకు ఉంది.
సంబంధిత కథనం