Electric car : సింగిల్ ఛార్జ్తో 400 కి.మీ రేంజ్- ఈవీ అంటే ఈ మారుతీ సుజుకీ ఎస్యూవీలా ఉండాలి!
భారత్ మొబిలిటీ గ్లోబల్ ఎక్స్ పో 2025 లో మారుతీ సుజుకీ ఇండియా-స్పెక్ ఈ విటారాని ఆవిష్కరించనుంది. ఈ మోడల్పై లేటెస్ట్ అప్డేట్స్తో పాటు రేంజ్ తదితర వివరాలను ఇక్కడ తెలుసుకోండి..
దిగ్గజ ఆటోమొబైల్ సంస్థ మారుతీ సుజుకీ నుంచి వస్తున్న తొలి ఎలక్ట్రిక్ కారుపై భారీ అంచనాలే ఉన్నాయి. ఈ మారుతీ సుజుకీ ఈ విటారాని ఈ నెలలో జరిగే భారత్ మొబిలిటీ గ్లోబల్ ఎక్స్పోలో ప్రదర్శించనున్నారు. ఇక ఇప్పుడు, కొత్త ఎలక్ట్రిక్ ఎస్యూవీకి సంబంధించిన మరికొన్ని వివరాలు అందుబాటులోకి వచ్చాయి. సంస్థకు చెందిన ప్రీమియం నెక్సా డీలర్షిప్స్ ద్వారా ఈ ఈవీని విక్రయించనున్నట్లు ధృవీకరిస్తూ తయారీదారు తన నెక్సా అకౌంట్ ద్వారా కొత్త టీజర్ని సోషల్ మీడియాలో విడుదల చేసింది. ఈ నేపథ్యంలో ఈ మోడల్పై ఇప్పటివరకు ఉన్న వివరాలను ఇక్కడ తెలుసుకుందాము..
మారుతీ సుజుకీ ఈ విటారా స్పెసిఫికేషన్లు ఏంటి?
ఈ విటారా ఎలక్ట్రిక్ ఎస్యూవీ ప్రపంచవ్యాప్తంగా రెండు బ్యాటరీ ప్యాక్ ఆప్షన్స్తో లభిస్తుంది. అవి. 49 కిలోవాట్, 61 కిలోవాట్. అయితే రెండు ఆప్షన్స్ భారతీయ వినియోగదారులకు అందుబాటులో ఉంటాయో లేదో తయారీదారు ఇంకా ధృవీకరించలేదు. ఈ శ్రేణికి సంబంధించిన నిర్దిష్ట వివరాలు వెల్లడించనప్పటికీ, ఈ వాహనం ఒక్కసారి ఛార్జ్ చేస్తే సుమారు 400 కిలోమీటర్లు ప్రయాణిస్తుందని అంచనాలు ఉన్నాయి.
49 కిలోవాట్ల బ్యాటరీ 142బీహెచ్పీ పవర్, 189ఎన్ఎమ్ టార్క్ని ప్రొడ్యూస్ చేస్తుంది. 2 డబ్ల్యూడీ మోడ్లో 61 కిలోవాట్ల బ్యాటరీ 172 బీహెచ్పీ పవర్ని, 189 ఎన్ఎమ్ టార్క్ని ఉత్పత్తి చేయగలదు, అదే బ్యాటరీతో 4డబ్ల్యూడీ వేరియంట్ 300 ఎన్ఎమ్ టార్క్ని ఉత్పత్తి చేస్తుంది. మోటార్, ఇన్వర్టర్లను లిథియం ఐరన్-ఫాస్ఫేట్ బ్యాటరీలతో మిళితం చేసే అత్యంత సమర్థవంతమైన ఈయాక్సిల్ని పవర్ట్రెయిన్ కలిగి ఉందని సుజుకి సూచించింది. ప్రస్తుతానికి భారత మార్కెట్లో విడుదలయ్యే మారుతీ సుజుకీ తొలి ఎలక్ట్రిక్ కారు స్పెసిఫికేషన్లు తెలియరాలేదు.
మారుతీ సుజుకీ ఈ విటారా- డైమెన్షన్స్..
మారుతీ సుజుకీ ఈ విటారా పొడవు 4,275 ఎంఎం. వెడల్పు 1,800 ఎంఎం. ఎత్తు 1,635 ఎంఎం. ఇది 2,700 ఎంఎం పొడవైన వీల్బేస్ను కలిగి ఉంది. ఎంచుకున్న వేరియంట్ను బట్టి 18-ఇంచ్ లేదా 19-ఇంచ్ అల్లాయ్ వీల్స్పై ప్రయాణిస్తుంది. ఇది 180 ఎంఎం గ్రౌండ్ క్లియరెన్స్, 5.2 మీటర్ల టర్నింగ్ రేడియస్ కలిగి ఉంది.
మారుతీ సుజుకీ ఈ విటారా ప్రత్యర్థులు ఎవరు?
ఈ విటారా ఇటీవల ఆవిష్కరించిన హ్యుందాయ్ క్రెటా ఎలక్ట్రిక్, ఎంజీ జెడ్ఎస్ ఈవీ, టాటా కర్వ్ ఈవీలకు పోటీగా ఉంటుంది.
మారుతీ సుజుకీ ఈ విటారా ఏ ప్లాట్ఫామ్ను ఉపయోగిస్తుంది?
మారుతీ సుజుకీ ఈ విటారా హియర్టెక్ట్-ఇ ప్లాట్ఫామ్పై ఆధారపడి ఉంటుంది. ఇది బ్యాటరీ ఎలక్ట్రిక్ వాహనాల కోసం ప్రత్యేకంగా తయారైంది. ఈ ప్లాట్ఫామ్ హై-వోల్టేజ్ రక్షణ, కాంపాక్ట్ ఓవర్ హాంగ్ లను కలిగి ఉన్న తేలికపాటి నిర్మాణాన్ని కలిగి ఉంది. ఇది విశాలమైన ఇంటీరియర్ను పొందుతుంది.
ఈ నెలలో ఈ విటారా లాంచ్ ఉన్న నేపథ్యంలో మారుతీ సుజుకీ నుంచి ఇంకొన్ని రోజుల పాటు మరిన్ని అప్డేట్స్ వెలువడే అవకాశం ఉంది. అప్పుడు ఇండియాకు చెందిన ఈ మారుతీ సుజుకీ ఈ విటారా ఎలక్ట్రిక్ ఎస్యూవీపై పూర్తి వివరాలు తెలుస్తాయి.
