Best bike for youth : బైక్​ లవర్స్​కి క్రేజీ న్యూస్​! ఈ బెస్ట్​ సెల్లింగ్​ కేటీఎం బైక్​ ధర తగ్గింది..

బైక్​ లవర్స్​కి క్రేజీ న్యూస్​! కేటీఎం 390 డ్యూక్​ బైక్​ ధరను సంస్థ తగ్గించింది. ఇప్పటివరకు రూ. 3.13 లక్షల ఎక్స్​షోరూం ధరతో సేల్​ అయిన ఈ మోడల్​, ఇప్పుడు రూ. 2.95 లక్షలకు తగ్గింది. అంటే ఈ మోడల్​పై రూ. 18వేలను సంస్థ తగ్గించింది.

కేటీఎం 390 డ్యూక్‌ వివరాలు..

ఈ కేటీఎం 390 డ్యూక్​ బైక్ గతేడాది​ లాంచ్ అయింది. ఇది ఇన్​స్టెంట్​ హిట్​ కొట్టింది! యువతలో ఈ బైక్​కి మంచి డిమాండ్​ ఉంది. ఈ నేపథ్యంలో ఇప్పుడు ధర మరింత తగ్గించడంతో సేల్స్​ కూడా పెరుగుతాయని సంస్థ భావిస్తోంది.

అంతేకాదు న్యూ జెన్​ డ్యూక్ కోసం పర్ఫార్మెన్స్​ని 373 సీసీ నుంచి 398 సీసీకి పెంచింది సంస్థ. ఇది ఇప్పుడు 44.25 బీహెచ్​పీ పవర్​ని, 39 Nm టార్క్​ని జనరేట్​ చేస్తుంది. 6-స్పీడ్ గేర్​బాక్స్​ కొనసాగుతోంది. ఇది చాలా సున్నితంగా పనిచేసే బై- డైరెక్షనల్​ క్విక్‌షిఫ్టర్‌తో వస్తుంది.కేటీఎం 390 డ్యూక్​లోని కొత్త ఫీచర్లు ఏంటి?

న్యూ జెన్​ కేటీఎం 390 డ్యూక్‌కు అనేక కొత్త ఫీచర్లను జోడించింది సంస్థ. ఇది ఇప్పుడు బ్లూటూత్ కనెక్టివిటీతో 5-ఇంచ్​ టీఎఫ్​టీ స్క్రీన్‌తో వస్తుంది. ఇది మ్యూజిక్​ కంట్రోల్​, ఇన్‌కమింగ్ కాల్స్, టర్న్-బై-టర్న్ నావిగేషన్‌కు సపోర్ట్​ చేస్తుంది. ఈ బైక్​ లాంచ్ కంట్రోల్, రైడింగ్ మోడ్స్, కొత్త ట్రాక్ మోడ్, సూపర్‌మోటో ఏబీఎస్​, క్విక్‌షిఫ్టర్, సెల్ఫ్-క్యాన్సిలింగ్ ఇండికేటర్లు, క్రూజ్ కంట్రోల్, స్పీడ్ లిమిటర్ ఫంక్షన్‌ను కూడా పొందుతుంది.

కేటీఎం 390 డ్యూక్ ఫ్రేమ్‌ను కూడా అప్‌డేట్ చేసింది సంస్థ. ఇది ఇప్పుడు కొత్త సబ్-ఫ్రేమ్‌తో కొత్త స్టీల్ ట్రెల్లిస్ ఫ్రేమ్‌ను కలిగి ఉంది. వీటిని ప్రెషర్ డై-కాస్ట్ అల్యూమినియంతో తయారు చేశారు. దీనితో పాటు, కొత్త కర్వ్​డ్​ స్వింగ్‌ఆర్మ్ కూడా ఉంది. సస్పెన్షన్ కోసం ముందు వైపు అప్‌సైడ్ డౌన్ ఫోర్క్స్, వెనుక వైపు మోనోషాక్ ఉన్నాయి.

390 డ్యూక్ బ్రేకింగ్ సిస్టమ్ ఆర్​సీ 390 బైక్​ నుంచి తీసుకోవడం జరిగింది. ఇది కొత్త, తేలికైన రొటార్లతో అమర్చి ఉంది. ముందు డిస్క్ 320 ఎంఎం, వెనుక డిస్క్ 240 ఎంఎం మెజర్​మెంట్స్​ కలిగి ఉంటుంది. అదనంగా, అల్యూమినియం చక్రాలు తేలికైనవిగా రూపొందించడం జరిగింది.

కేటీఎం 390 డ్యూక్ ప్రత్యర్థులు ఎవరు?

కేటీఎం 390 డ్యూక్ బైక్​.. ట్రయంఫ్ స్పీడ్ 400, రాయల్ ఎన్‌ఫీల్డ్ గెరిల్లా 450, బీఎండబ్ల్యూ జీ 310 ఆర్​, యమహా ఎంటీ-03, టీవీఎస్​ అపాచే ఆర్​టీఆర్​ 310లతో పోటీ పడుతుంది.