Small savings schemes: చిన్న మొత్తాల పొదుపు పథకాల వడ్డీ రేట్లపై ప్రభుత్వం కీలక నిర్ణయం

Small savings schemes: పీపీఎఫ్, ఎన్ఎస్సీ సహా వివిధ చిన్న మొత్తాల పొదుపు పథకాలపై వడ్డీ రేట్లను ప్రభుత్వం యథాతథంగా ఉంచింది. గత మూడు త్రైమాసికాలుగా ఈ వడ్డీ రేట్లను ప్రభుత్వం మార్చలేదు. తాజాగా, 2024-25 ఆర్థిక సంవత్సరం నాలుగో త్రైమాసికానికి సంబంధించి వివిధ చిన్న మొత్తాల పొదుపు పథకాలపై వడ్డీ రేట్లలో ఎలాంటి మార్పు ఉండదని, 2024-25 ఆర్థిక సంవత్సరం మూడో త్రైమాసికానికి నోటిఫై చేసిన వడ్డీ రేట్లే యథాతథంగా కొనసాగుతాయని ఆర్థిక మంత్రిత్వ శాఖ మంగళవారం విడుదల చేసిన నోటిఫికేషన్ లో పేర్కొంది.

మార్చి 31, 2025 వరకు..

అంటే, ఈ ప్రభుత్వ నోటిఫికేషన్ ప్రకారం, చిన్న మొత్తాల పొదుపు పథకాలకు (small saving schemes) ప్రస్తుతం ఉన్న వడ్డీరేట్లే మార్చి 31, 2025 వరకు కొనసాగుతాయి.

• ప్రస్తుతం, సుకన్య సమృద్ధి (Sukanya Samriddhi yojana) పథకం కింద డిపాజిట్లపై 8.2 శాతం వడ్డీ రేటు ఉంది. మార్చి 31, 2025 వరకు కూడా అదే వడ్డీ రేటు కొనసాగుతుంది.
• అలాగే, మూడేళ్ల కాలపరిమితి డిపాజిట్లపై కూడా ప్రస్తుతం ఉన్న వడ్డీ రేటు (bank interest rates) అయిన 7.1 శాతం మరో మూడు నెలలు కొనసాగుతుంది.
• పబ్లిక్ ప్రావిడెంట్ ఫండ్ (PPF), పోస్టాఫీస్ సేవింగ్స్ డిపాజిట్ పథకాలపై వడ్డీ రేట్లు వరుసగా 7.1 శాతం, 4 శాతంగా ఉన్నాయి.
• కిసాన్ వికాస్ పత్రంపై (KVP) వడ్డీ రేటు 7.5 శాతంగా ఉంది. కిసాన్ వికాస్ పత్రంపై పెట్టుబడులు 115 నెలల్లో మెచ్యూరిటీ అవుతాయి.
• నేషనల్ సేవింగ్స్ సర్టిఫికేట్ (NSC) పై వడ్డీ రేటు 2025 జనవరి-మార్చి కాలానికి 7.7 శాతంగా ఉంటుంది.
• ప్రస్తుత త్రైమాసికం మాదిరిగానే మంత్లీ ఇన్కమ్ స్కీమ్ ఇన్వెస్టర్లకు 7.4 శాతం రాబడిని ఇస్తుంది.
• గత నాలుగు త్రైమాసికాలుగా వడ్డీ రేట్లను యథాతథంగా ఉంచారు. గత ఆర్థిక సంవత్సరం నాలుగో త్రైమాసికంలో ప్రభుత్వం కొన్ని పథకాల్లో మార్పులు చేసింది.
• ప్రధానంగా పోస్టాఫీసులు, బ్యాంకులు నిర్వహించే చిన్న మొత్తాల పొదుపు పథకాలపై (small saving schemes) వడ్డీ రేట్లను ప్రభుత్వం ప్రతి త్రైమాసికానికి నోటిఫై చేస్తుంది.