Utility vehicles in India : ఎస్​యూవీలో రయ్​రయ్​.. చిన్న కార్లకు భారతీయులు గుడ్​ బై!

Utility vehicles growth in India : 2022లో భారత దేశ ఆటో పరిశ్రమ దుమ్మురేపింది! రికార్డు స్థాయి సేల్స్​తో దాదాపు అన్ని ఆటో సంస్థలు దూసుకెళ్లాయి. అయితే.. గతేడాది ఆటో సేల్స్​ డేటాను పరిశీలిస్తే.. భారతీయుల ఆలోచనలు, ఇష్టాలు మారుతున్నట్టు అర్థమవుతుంది. ఎస్​యూవీ- సబ్​కాంపాక్ట్​ ఎస్​యూవీలతో కూడిన యుటిలిటీ వెహికిల్స్​(యూవీ) సెగ్మెంట్​కు గతేడాది విపరీతమైన క్రేజ్​​ కనిపించింది. ఫలితంగా చిన్న- ఎంట్రీ లెవల్​ కార్ల డిమాండ్​ పడిపోయింది.

చిన్న కార్లపై ప్రేమ తగ్గిపోయిందా?

వాస్తవానికి చిన్న- ఎంట్రీ లెవల్​ వాహనాలే.. ఇండియా ఆటో మార్కెట్​ను ఎన్నో దశాబ్దాలుగా ఏలుతున్నాయి! అలాంటిది.. 2022లో యుటిలిటీ వెహికిల్స్​ నుంచి ఈ సెగ్మెంట్​కు గట్టిపోటీ ఎదురైంది. ఎన్నో ఏళ్ల నుంచి ఎస్​యూవీలకు డిమాండ్​ ఉన్నప్పటికీ.. గతేడాది అది భారీ స్థాయిలో పెరగడం, చిన్న కార్లకు ఆశించినంత సేల్స్​ రాకపోవడం ఆటో సంస్థను ఒకింత ఆశ్చర్యానికి గురిచేసింది.

TOP SUV's in India : ఎస్​ఐఏఎం (సొసైటీ ఆఫ్​ ఇండియన్​ ఆటోమొబైల్​ మేన్యుఫ్యాక్చరర్స్​) డేటా ప్రకారం.. గతేడాది ఎంట్రీ లెవల్​ కార్లతో.. దాదాపు సమానంగా యుటిలిటీ వెహికిల్స్​ ప్రొడక్షన్​ జరిగింది. యూవీల ప్రభావం ఏ రేంజ్​లో ఉందంటే.. చిన్న కార్లకు పెట్టింది పేరైన దేశీయ దిగ్గజ ఆటో సంస్థ మారుతీ సుజుకీ సైతం.. తన యూవీ సెగ్మెంట్​ను బలపరుచుకునేందుకు చర్యలు చేపట్టింది. ఈ క్రమంలోనే గ్రాండ్​ విటారా పేరుతో ఓ కాంపాక్ట్​ ఎస్​యూవీని లాంచ్​ చేసింది. చిన్న కార్లపైనే దృష్టిసారిస్తామని మారుతీ చెబుతున్నా.. పోటీని ఎదుర్కొనేందుకు అదొక్కటే సరిపోదని ఆ సంస్థకు కూడా అర్థమైందని నిపుణులు అభిప్రాయపడుతున్నారు.

రూ. 10లక్షలలోపు అందుబాటులో ఉన్న టాప్​ ఎస్​యూవీల వివరాలు తెలుసుకునేందుకు ఇక్కడ క్లిక్​ చేయండి.

TOP SUV's in India in 2022 : ఒక్క యుటిలిటీ వెహికిల్స్​ సెగ్మెంట్​తోనే మారుతీ సుజుకీ సేల్స్​లో 22.3శాతం వృద్ధి నమోదైంది! ఇక మహీంద్రా అండ్​ మహీంద్రా సంస్థ అయితే.. తన వ్యూహాలన్ని మొత్తంగా మార్చేసింది. 'ఎస్​యూవీ ఓన్లీ' స్ట్రాటజీతో భారీగా లాభాలు పొందుతోంది. ఎం అండ్​ ఎం సేల్స్​ 62.2శాతం పెరగడం విశేషం. వెరిటో, మరాజో, కేయూవీ100 వంటి వాహనాలకు ఎప్పుడో డిమాండ్​ పోయింది. వీటి స్థానాల్లో.. ఆకర్షణీయమైన డిజైన్​, ఫీచర్స్​తో.. థార్​, ఎక్స్​యూవీ700, బొలేరో, స్కార్పియో ఎన్​ వంటి వాహనాలను లాంచ్​ చేసి.. తన పోర్ట్​ఫోలియోను మరింత శక్తివంతంగా తీర్చిదిద్దుకుంది.

ఎస్​యూవీల దూకుడు..!

Kia Motors SUV cars : ఇక దేశీయ ఆటో పరిశ్రమలో అత్యంత వేగంగా వృద్ధిచెందుతున్న సంస్థల్లో కియా మోటార్స్​, ఎంజీ మోటార్స్​లు ముందు వరుసలో ఉన్నాయి. వీటి మోడల్స్​కు ఉన్న డిమాండ్​ను చూస్తేనే.. యూవీలకు ఎంతటి క్రేజ్​​ ఉందో అర్థమైపోతుంది. సెల్టోస్​ కాంపాక్ట్​ ఎస్​యూవీతో ఇండియాలో తన ప్రస్థానాన్ని ప్రారంభించిన కియా మోటార్స్​.. ఇప్పుడు సబ్​ కాంపాక్ట్​ ఎస్​యూవీ సోనెట్​తో పాటు కార్నివాల్​, కారెన్స్​ వంటి ఎంపీవీలతో భారతీయులను ఆకర్షిస్తోంది. ఎంజీ హెక్టార్​ కూడా ఇదే విధంగా ఆస్టర్​తో పాటు ఇతర ఎస్​యూవీలతో పోటీపడుతోంది.

ఇక టాటా మోటార్స్​కు.. నెక్సాన్​ సబ్​-కాంపాక్ట్​ ఎస్​యూవీ మోడల్​ బెస్ట్​ సెల్లింగా ఉంది. హారియర్​, సఫారీకి సైతం మంచి డిమాండ్​ కనిపిస్తోంది. 2021 చివర్లో లాంచ్​ అయిన టాటా పంచ్​ సైతం దూసుకెళుతోంది.

2022లో అత్యధికంగా అమ్ముడుపోయిన ఎస్​యూవీల వివరాల కోసం ఇక్కడ క్లిక్​ చేయండి.

టయోటా, హ్యుందాయ్​ వంటి సంస్థలు కూడా ఎస్​యూవీ సెగ్మెంట్​పై అధిక దృష్టిని సారించాయి. హోండా సంస్థ మాత్రమే ఇప్పటివరకు ఒక్క ఎస్​యూవీని కూడా లాంచ్​ చేయలేదు. ఈ సంస్థ కూడా త్వరలోనే ఓ యుటిలిటీ వెహికిల్​ను వదులుతున్నట్టు నివేదికలు వస్తున్నాయి.

Tata motors SUV cars list : లగ్జరీ కార్ల సెగ్మెంట్​లో మాత్రం.. సెడాన్​, ఎస్​యూవీల మధ్య తీవ్ర పోటీ కనిపిస్తోంది. మెర్సెడీస్​ ఈ-క్లాస్​ ఎల్​డబ్ల్యూబీ మోడల్​ ఆ సంస్థకు బెస్ట్​ సెల్లింగా ఉంది. ఆడీకి కూడా.. అప్డేటెడ్​ క్యూ3, కయూ5 ఎస్​యూవీలతో పాటు ఆడీ ఏ8ఎల్​కు మంచి డిమాండ్​ కనిపిస్తోంది.

వీటన్నింటిని చూస్తే.. సామాన్య భారతీయుడి ఆలోచనలు మారాయా? రూ. 10లక్షలు- రూ. 20లక్షల ప్రైజ్​ బ్రాకెట్​పై ప్రజలు ఎక్కువగా దృష్టిపెడుతున్నారా? అన్న ప్రశ్నలకు అవుననే సమాధానం లభిస్తోంది. 2023లో ఈ వ్యవహారంపై మరింత క్లారిటీ వస్తుంది. చిన్న కార్ల ఉనికి ఏవిధంగా మారుతోందో తెలిసిపోతుంది!