Kia Carens EV : ఇండియాలోకి మరో లాంగ్​ రేంజ్​ ఎలక్ట్రిక్​ కారు- కియా క్యారెన్స్​ ఈవీ రేంజ్​ 500 కి.మీ?

కియా క్యారెన్స్​కి ఈవీ టచ్​ ఇచ్చేందుకు దిగ్గజ ఆటోమొబైల్​ సంస్థ ఏర్పాట్లు చేసుకుంటున్న విషయం తెలిసిందే. ఈ మోడల్​ ఇప్పుడు దక్షిణ కొరియాలో దర్శనమిచ్చింది. ఆల్-ఎలక్ట్రిక్ ఎంపీవీ భారీ క్యామోఫ్లాజ్​లో కెమెరాలకు చిక్కింది. ఈ నేపథ్యంలో ఈ ఎలక్ట్రిక్​ వెహికిల్​పై మరిన్ని వివరాలు బయటకు వచ్చాయి. వాటి గురించి ఇక్కడ తెలుసుకోండి..

కియా క్యారెన్స్​ ఈవీ..

భారత ప్యాసింజర్ వాహన మార్కెట్లో ఎలక్ట్రిక్ వాహనాలకు డిమాండ్ వేగంగా పెరుగుతోంది. ఇప్పటికే పలు ఆటోమొబైల్ కంపెనీలు తమ ఎలక్ట్రిక్ వాహనాలను మార్కెట్లోకి విడుదల చేశాయి. కియా కూడా ఈవీ6, ఈవీ9 వంటి మోడళ్లతో ఈ జాబితాలో చేరింది. అయితే ఈ రెండూ ప్రీమియం సెగ్మెంట్​లో ఉన్నాయి. ఇప్పుడు, హ్యుందాయ్ గ్రూప్ ఆధ్వర్యంలోని దక్షిణ కొరియా ఆటో దిగ్గజం మాస్-మార్కెట్ విభాగంలోని అవకాశాలను అందిపుచ్చుకోవాలని లక్ష్యంగా పెట్టుకుంది. ఇందులో భాగంగానే కియా కారెన్స్ ఈవీని సిద్ధం చేస్తోంది. ఈ క్యారెన్స్​ ఈవీ.. దేశంలో అత్యంత ఆసక్తిగా ఎదురుచూస్తున్న ఎలక్ట్రిక్ కార్లలో ఒకటిగా మారింది.

దక్షిణ కొరియాలో కనిపించిన కియా కారెన్స్ ఈవీ ప్రోటోటైప్ కొన్ని కీలక డిజైన్ వివరాలను వెల్లడించింది. నోస్​కి కనెక్టెడ్ ఎల్ఈడీ డేటైమ్ రన్నింగ్ లైట్ (డీఆర్ఎల్) స్ట్రిప్​తో త్రిభుజాకార ఆకారంలో ఉండే ఎల్ఈడీ హెడ్​ల్యాంప్స్ ఇందులో ఉన్నాయి. లైటింగ్ డిజైన్ చూడటానికి కియా ఈవీ6ను పోలి ఉంటుంది. కానీ ఛార్జింగ్ పోర్ట్ పొజిషనింగ్ కారెన్స్ ఈవీలో భిన్నంగా ఉంటుంది. ఈ ఏడాది ప్రారంభంలో భారతదేశంలో లాంచ్ అయిన హ్యుందాయ్ క్రెటా ఎలక్ట్రిక్​ని ఇది పోలి ఉంటుంది.

కారెన్స్ ఈవీలో అడ్వాన్స్​డ్​ డ్రైవర్ అసిస్టెన్స్ సిస్టమ్స్ (ఏడీఏఎస్) లభ్యతను తాజా స్పై షాట్స్ సూచిస్తున్నాయి. విండ్ షీల్డ్​లో ఒక కెమెరా ఉంది. ఇది ఏడీఏఎస్ లభ్యతను ధృవీకరిస్తుంది. అలాగే, బంపర్​లో ఫ్రెంట్ పార్కింగ్ సెన్సార్లు ఉన్నాయి. ఇటీవల లాంచ్ చేసిన కియా సైరోస్​లో పరిచయం చేసిన సైడ్ సెన్సార్లు రాబోయే కియా కారెన్స్ ఈవీలో కూడా ఉంటాయని భావిస్తున్నారు. కియా కారెన్స్ ఐసీఈలో లభించే వాటితో పోలిస్తే అల్లాయ్ వీల్స్​కు భిన్నమైన డిజైన్ ఉండొచ్చు. ఎలక్ట్రిక్ కారు కావడంతో, ఈవీ అల్లాయ్ వీల్స్ ఏరోడైనమిక్ డిజైన్ ఎలిమెంట్స్​తో వస్తాయి.

కియా కారెన్స్ ఈవీలో 12.3 ఇంచ్​ డ్యూయెల్ డిజిటల్ డిస్​ప్లే సెటప్, 12.3 ఇంచ్​ టచ్​స్క్రీన్​ ఇన్ఫోటైన్​మెంట్ సిస్టమ్, 12.3 ఇంచ్​ ఫుల్లీ డిజిటల్ ఇన్​స్ట్రుమెంట్ క్లస్టర్ వంటి ఫీచర్లు ఉండనున్నాయి. వైర్లెస్ ఫోన్ ఛార్జర్, డ్యూయల్ జోన్ ఆటో ఏసీ, పనోరమిక్ సన్​రూఫ్ కూడా ఇందులో ఉండనున్నాయి.

సేఫ్టీ ఫీచర్ విషయానికొస్తే కియా కారెన్స్ ఈవీ లెవల్ 2 ఏడీఎఎస్ సూట్, ఫ్రెంట్- రేర్ పార్కింగ్ సెన్సార్లు, స్టాండర్డ్​గా ఆరు ఎయిర్ బ్యాగులు, 360 డిగ్రీల సరౌండ్ వ్యూ కెమెరాను పొందుతుంది.

కియా క్యారెన్స్​ ఈవీ- 500 కి.మీ రేంజ్​?

పవర్​ట్రెన్ గురించి కియా ఎటువంటి సమాచారాన్ని వెల్లడించలేదు. కానీ ఇది వివిధ బ్యాటరీ ప్యాక్ ఆప్షన్స్​తో వస్తుందని భావిస్తున్నారు. కియా క్యారెన్స్​ ఈవీ రేంజ్​ 400 కి.మీ నుంచి 500 కి.మీ మధ్యలో ఉంటుందని తెలుస్తోంది.

కియా క్యారెన్స్​ ఈవీ ఇండియా లాంచ్​, ఫీచర్స్​, ధరతో పాటు ఇతర వివరాలు తెలియాలంటే మరికొన్ని రోజులు ఎదురుచూడాల్సిందే.