Hyundai Creta EV : జనవరిలో రానున్న హ్యుందాయ్ క్రెటా ఎలక్ట్రిక్ కారు.. 500 కిలోమీటర్ల రేంజ్, అద్భుతమైన ఫీచర్లు!

హ్యుందాయ్ తన ఎలక్ట్రిక్ ఎస్‌యూవీ క్రెటా ఈవీ విడుదల తేదీని ప్రకటించింది. కార్ వాలే నివేదిక ప్రకారం.. జనవరి 17, 2025న జరగబోయే ఈవెంట్ భారత్ మొబిలిటీ ఎక్స్‌పో 2025లో ఈ ఎలక్ట్రిక్ కారును ప్రదర్శించనున్నారు. క్రెటా ఈవీ భారతదేశంలో ఈ బ్రాండ్ మూడో ఎలక్ట్రిక్ వాహనం, స్థానికంగా ఉత్పత్తి చేసిన మొదటి ఈవీ. దీని డిజైన్, పవర్, రేంజ్‌ గురించి చూద్దాం..

క్రెటా ఈవీ డిజైన్ ఇటీవల లాంచ్ చేసిన ఫేస్ లిఫ్ట్ పెట్రోల్, డీజిల్ వేరియంట్ల ఆధారంగా ఉంటుంది. అయితే ఇది ఎలక్ట్రిక్ వాహనాల కోసం ప్రత్యేక మార్పులను కూడా పొందుతుంది. దీని ఎక్స్‌టీరియర్‌‌లో కొన్ని ప్రధాన మార్పులు ఉండవచ్చు. ముందు, వెనుక బంపర్లతో కొత్త స్టైలింగ్‌తో చూడవచ్చు. ఇది కాకుండా క్లోజ్డ్ గ్రిల్(బ్లాంక్-అవుట్ గ్రిల్), కొత్త అల్లాయ్ వీల్స్ ఉండవచ్చు. ఇందులో ఏరో ఇన్సర్ట్స్ ఉంటాయి. లగ్జరీ ఇంటీరియర్స్, హైటెక్ ఫీచర్లతో వచ్చే అవకాశం ఉంది.

అదిరిపోయే ఫీచర్లు

2025 హ్యుందాయ్ క్రెటా ఈవీలో కొత్త 3-స్పోక్ స్టీరింగ్ వీల్, డ్యూయల్ 10.25-అంగుళాల డిజిటల్ స్క్రీన్లు, డ్యూయల్-జోన్ క్లైమేట్ కంట్రోల్, కొత్త సెంటర్ కన్సోల్ డిజైన్‌తో డ్యూయల్ కప్ హోల్డర్లు, ఎలక్ట్రానిక్ పార్కింగ్ బ్రేక్ (ఇపిబి), ఆటో-హోల్డ్ ఫంక్షన్, అడ్వాన్స్డ్ డ్రైవర్ అసిస్టెన్స్ సిస్టమ్(ఏడీఏఎస్), 360-డిగ్రీ కెమెరా, కొత్త రోటరీ డయల్ ఉన్నాయి.

రేంజ్ వివరాలు

హ్యుందాయ్ క్రెటా ఈవీ 60 కిలోవాట్ల బ్యాటరీ ప్యాక్‌ను కలిగి ఉంటుంది. ఇది సింగిల్ ఎలక్ట్రిక్ మోటార్‌తో జత అయి ఉంటుంది. ఈ వాహనాన్ని పూర్తిగా ఛార్జ్ చేస్తే 500 కిలోమీటర్ల రేంజ్ ఉంటుంది.

వీటితో పోటీ

హ్యుందాయ్ క్రెటా ఈవీ భారతదేశంలో ఎలక్ట్రిక్ వాహనాల విభాగంలో ఒక పెద్ద ముందడుగు. స్థానిక తయారీతో పోటీ ధరలకు వాహనాన్ని అందుబాటులోకి తీసుకురావడమే కాకుండా, దేశంలో ఎలక్ట్రిక్ మొబిలిటీని ప్రోత్సహించడం లక్ష్యంగా పెట్టుకుంది. స్టైలిష్ డిజైన్, అధునాతన సాంకేతికత, గొప్ప శ్రేణితో ఎలక్ట్రిక్ ఎస్‌యూవీ కోసం చూస్తున్న వినియోగదారులకు క్రెటా ఈవీ గురించి ఆలోచించవచ్చు.

హ్యుందాయ్ క్రెటా ఈవీని విడుదల చేసిన తరువాత.. ఎంజి జెడ్ఎస్ ఈవి, టాటా కర్వ్ ఈవి, మహీంద్రా బిఇ 6, బీవైడీ అటో 3, రాబోయే మారుతి ఇ-విటారాతో పోటీపడుతుంది.