Electric cars : రెండు దిగ్గజ సంస్థల నుంచి కొత్త ఈవీలు- రేంజ్​లో ఏ ఎలక్ట్రిక్​ కారు బెస్ట్​?

హ్యుందాయ్​ క్రేటా ఎలక్ట్రిక్​ కోసం ఎదురుచూపులు కొనసాగుతున్నాయి. ఈ నెల 17న ప్రారంభంకానున్న భారత్​ మొబిలిటీ గ్లోబల్​ ఎక్స్​పో 2025లో ఈ ఎలక్ట్రిక్​ కారును సంస్థ ప్రపంచానికి పరిచయం చేయనుంది. భారీ అంచనాల మధ్య అడుగుపెడుతున్న హ్యుందాయ్​ క్రేటా ఈవీ.. ఇప్పటికే మార్కెట్​లో అందుబాటులో ఉన్న కొత్త టాటా కర్వ్​ ఈవీ మధ్య విపరీతమైన పోటీ ఉంటుందని అంచనాలు ఉన్నాయి. ఒకటి ఎస్​యూవీ మోడల్​, మరొకటి కూపే ఎస్​యూవీ అయినప్పటికీ, దిగ్గజ బ్రాండ్స్​ నుంచి వస్తుండటంతో వీటిపై ప్రజల ఆసక్తి ఎక్కువగా ఉంటుంది. ఈ నేపథ్యంలో ఈ రెండింటినీ పోల్చి, ఏది బెస్ట్​? అన్నది ఇక్కడ తెలుసుకుందాము..

హ్యుందాయ్ క్రేటా ఎలక్ట్రిక్ వర్సెస్ టాటా కర్వ్ ఈవీ: డిజైన్..

హ్యుందాయ్​ క్రేటా, టాటా కర్వ్​ ఈవీలు వాటి ఐసీఈ ఇంజిన్​ వర్షెన్లను పోలి ఉంటాయి. డిజైన్​ పరంగా పెద్దగా మార్పులు చోటుచేసుకోలేదు. హ్యుందాయ్​ క్రేటా ఎస్​యూవీ ఇండియాలో బెస్ట్​ సెల్లింగ్​ మోడల్స్​లో ఒకటి. ఇక టాటా కర్వ్​ ఎస్​యూవీ కూపే, సెగ్మెంట్​లోనే తొలి ఎంట్రీల్లో ఒకటిగా నిలిచింది.

ఇక రెండు ఈవీల్లోనూ ఫ్యూచరిస్టిక్​ డిజైన్​ని చూడవచ్చు.

హ్యుందాయ్ క్రేటా ఎలక్ట్రిక్ వర్సెస్ టాటా కర్వ్ ఈవీ: స్పెసిఫికేషన్లు

హ్యుందాయ్​ క్రేటా ఈవీకి టాటా కర్వ్​ ఈవీకి మధ్య రేంజ్​ విషయంలో బలమైన పోటీ ఉంటుంది! ఎందుకంటే వీటి బ్యాటరీ ఆప్షన్స్​ ఒకే విధంగా ఉన్నాయి. హ్యుందాయ్​ క్రేటా ఎలక్ట్రిక్​లో 42 కిలోవాట్​, 51.4 కిలోవాట్​ బ్యాటరీ ప్యాక్​ ఉంది. టాటా కర్వ్​ ఈవీలో 45 కిలోవాట్​, 55 కిలోవాట్​ బ్యాటరీ ప్యాక్​ ఉంది.

క్రేటా ఎలక్ట్రిక్ పెద్ద బ్యాటరీ ప్యాక్​ని ఒక్కసారి ఛార్జ్ చేస్తే 473 కిలోమీటర్ల రేంజ్​ని ఇస్తుందని తెలుస్తోంది. చిన్నది 390 కిలోమీటర్ల పరిధిని అందిస్తుంది. ఇక టాటా కర్వ్ ఈవీ రేంజ్​ 430 కిలోమీటర్ల నుంచి 502 కిలోమీటర్ల వరకు ఉంటుంది.

హ్యుందాయ్ క్రేటా ఎలక్ట్రిక్ వర్సెస్ టాటా కర్వ్ ఈవీ: ఫీచర్లు..

క్రేటా ఎలక్ట్రిక్.. క్రేటా ఎస్​యూవీ కంటే ప్రీమియం ఆఫర్​గా వస్తోంది. అందువల్ల కొన్ని అదనపు సాంకేతికతను ఈ ఎలక్ట్రిక్​ ఎస్​యూవీ పొందుతుంది. క్రేటా ఎలక్ట్రిక్ డ్యూయెల్ 10.25 ఇంచ్​ స్క్రీన్​తో లెథరెట్ డ్యాష్​బోర్డ్​ని పొందుతుంది. ఒకటి వైర్లెస్ ఆండ్రాయిడ్ ఆటో, యాపిల్ కార్​ప్లేతో ఇన్​ఫోటైమెంట్​ సెటప్​తో పనిచేస్తుంది. మరొకటి ఇన్​స్ట్రుమెంట్ క్లస్టర్​గా పనిచేస్తుంది. హ్యుందాయ్ అయోనిక్ 5 లో ఉన్న దానిని పోలిన 3 స్పోక్ లేఅవుట్, 4 డాట్​ స్టీరింగ్ వీల్​ని రీడిజైన్ చేయడం జరిగింది.. కారును పోర్టెబుల్ పవర్ సోర్స్​గా మార్చే వెహికల్-టు-లోడ్ (వి2ఎల్) టెక్నాలజీ ద్వారా వినియోగదారులు కారు లోపల, వెలుపల పరికరాలను ఛార్జ్ చేయవచ్చు.

టాటా కర్వ్ ఈవీ ఇంటీరియర్స్ చాలా మోడ్రన్​గా కనిపిస్తాయి. డ్యూయల్ టోన్ డ్యాష్​బోర్డ్, వెంటిలేటెడ్ ఫ్రెంట్ సీట్లు ఉన్నాయి. 12.3 ఇంచ్​ ఫ్లోటింగ్ ఇన్​ఫోటైన్​మెంట్ సిస్టెమ్, 10.25 ఇంచ్​ డిజిటల్ డ్రైవర్ డిస్​ప్లేతో సాంకేతిక పరిజ్ఞానాన్ని పెంపొందించుకోవచ్చు. ఇన్-కార్ ఎక్స్​పీరియెన్స్​ని పెంచే మరికొన్ని ఫీచర్లు ( పనోరమిక్ సన్​రూఫ్, ఎయిర్ ప్యూరిఫైయర్, యాంబియంట్ లైటింగ్) కూడా ఇందులో ఉన్నాయి.