Hyundai Creta EV : హ్యుందాయ్ క్రెటా ఎలక్ట్రిక్ కారు టీజర్ విడుదల.. చూస్తే పడిపోతారు.. కత్తిలాంటి ఫీచర్లు!

హ్యుందాయ్ తన పవర్‌ఫుల్ ఎలక్ట్రిక్ ఎస్‌యూవీ క్రెటా ఈవీ మొదటి టీజర్‌ను విడుదల చేసింది. ఈ ఎలక్ట్రిక్ ఎస్‌యూవీని 2025 జనవరి 17న ఇండియా మొబిలిటీ గ్లోబల్ ఎక్స్ పోలో ప్రదర్శించనున్నారు. ఈ ఎలక్ట్రిక్ వాహనం హ్యుందాయ్ ప్రస్తుత ఐసిఇ (ఇంటర్నల్ కంబషన్ ఇంజిన్) క్రెటా ఆధారంగా ఉంటుంది. అయితే దీనికి అనేక కొత్త, ప్రత్యేక ఫీచర్లు ఇవ్వనున్నారు.

హ్యుందాయ్ క్రెటా ఈవీ లుక్

టీజర్ ప్రకారం క్రెటా ఈవీ డ్యూయల్-టోన్ అల్లాయ్ వీల్స్, రూఫ్ రైల్స్, విభిన్న రంగులతో కూడిన ఓఆర్వీఎమ్‌లను పొందుతుంది. ఇది కాకుండా ఎల్ఈడీ డీఆర్ఎల్‌లు, ముందు భాగంలో ఛార్జింగ్ పోర్ట్, వర్టికల్ హెడ్లైట్లు, బ్లాంక్-అవుట్ గ్రిల్ వంటి ప్రత్యేక మార్పులను ఈ ఎలక్ట్రిక్ వాహనంలో చూడవచ్చు.

హైటెక్ ఫీచర్లు

హ్యుందాయ్ క్రెటా ఈవీ ఇంటీరియర్ చాలా ప్రీమియం, అధునాతనంగా ఉంటుంది. ఇందులో ఎన్నో అద్భుతమైన ఫీచర్లు ఉంటాయి. త్రీ-స్పోక్ స్టీరింగ్ వీల్, రీడిజైన్ చేసిన సెంటర్ కన్సోల్, 360 డిగ్రీల కెమెరా, హెడ్స్-అప్ డిస్‌ప్లే, ట్విన్ 10.25-అంగుళాల స్క్రీన్లు వెంటిలేటెడ్ సీట్లు, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, ఏడీఏఎస్ (అడ్వాన్స్డ్ డ్రైవర్ అసిస్టెన్స్ సిస్టమ్) వంటి సేఫ్టీ ఫీచర్లు ఇందులో ఉన్నాయి.

హ్యుందాయ్ ఇంకా క్రెటా ఈవీ పవర్ట్రెయిన్ పూర్తి వివరాలను పంచుకోలేదు. కానీ ఇది 60 కిలోవాట్ల బ్యాటరీ ప్యాక్‌ను కలిగి ఉంటుందని భావిస్తున్నారు. ఇది ఒక్కసారి ఛార్జ్ చేస్తే 500 కిలోమీటర్ల రేంజ్ అందిస్తుంది. ఈ ఈవీ ఫ్రంట్ వీల్ డ్రైవ్ సిస్టమ్ తో వస్తుంది. దీని పనితీరు హై పెర్ఫార్మెన్స్ ఎలక్ట్రిక్ మోటార్ పై ఆధారపడి ఉంటుంది.

ధర అంచనా

హ్యుందాయ్ క్రెటా ఈవీ లాంచ్ అయిన తర్వాత మారుతి ఇ-విటారా, ఎంజీ జెడ్ఎస్ ఈవి, మహీంద్రా బీఈ 6, బీవైడీ అటో 3 వంటి వాటికి పోటీగా ఉంటుంది. హ్యుందాయ్ క్రెటా ఈవీ ధర రూ .18-25 లక్షల (ఎక్స్-షోరూమ్) మధ్య ఉంటుందని భావిస్తున్నారు. లాంచ్ తర్వాత, ఇది భారత ఈవి మార్కెట్లో మంచి పోటీ ఇవ్వనుంది

హ్యుందాయ్ భారత మార్కెట్లో ఎలక్ట్రిక్ వాహనాల విభాగంలో తన పట్టును బలోపేతం చేసుకోవడానికి ఈ ఎస్‌యూవీని ప్రవేశపెట్టబోతోంది. పవర్‌ఫుల్ ఫీచర్లు, ఆకర్షణీయమైన డిజైన్, లాంగ్ రేంజ్‌తో ఈ ఈవీ రానుంది.