ఈ సెట్టింగ్స్ ఆన్లో ఉంటే మీ స్మార్ట్ఫోన్కి అదనపు భద్రత! దొంగతనానికి గురైనా డేటా సేఫ్..
మీ ఆండ్రాయిడ్ స్మార్ట్ఫోన్లోని గూగుల్ థేఫ్ట్ ప్రొటెక్షన్ ఫీచర్ గురించి మీకు తెలుసా? దీని వల్ల చాలా ఉపయోగాలు ఉన్నాయి. సెట్టింగ్స్లో కొన్ని మార్పులు చేస్తే మీ డివైజ్కి అదనపు భద్రత లభిస్తుంది.
ఆండ్రాయిడ్ స్మార్ట్ఫోన్స్లో చాలా సేఫ్టీ ఫీచర్స్ ఉంటాయి. కానీ వీటి గురించి మనకి తెలియకపోవడం సమస్య! ఈ ఫీచర్స్ మనకి చాలా రకలుగా ఉపయోగపడతాయి. మరీ ముఖ్యంగా గూగుల్ థెఫ్ట్ ప్రొటెక్షన్తో మీ స్మార్ట్ఫోన్, అందులోని డేటా చాలా సేఫ్గా ఉంటుంది. రిమోట్ లాకింగ్, ట్రాకింగ్, డేటా ప్రొటెక్షన్ వంటి ఫీచర్లతో కూడిన గూగుల్ థెఫ్ట్ ప్రొటెక్షన్కి సంబంధించిన పూర్తి వివరాలను ఇక్కడ తెలుసుకోండి..
గూగుల్ థెఫ్ట్ ప్రొటెక్షన్ అంటే ఏంటి?
గూగుల్ థెఫ్ట్ ప్రొటెక్షన్ అనేది మీ పరికరం దొంగతనానికి గురైతే మీ వ్యక్తిగత డేటాను రక్షించడానికి రూపొందించిన సేఫ్టీ సర్వీస్. ఆండ్రాయిడ్ 10, ఆపైన వర్షెన్లో లభ్యమయ్యే ఈ సర్వీస్.. ఫోన్ దొంగతనం జరిగినప్పుడు మీ స్మార్ట్ఫోన్ను సురక్షితంగా ఉంచే విధంగా అనేక ఫీచర్లను అందిస్తుంది.
థెఫ్ట్ ప్రొటెక్షన్ని ఇలా యాక్టివేట్ చేయండి..
- మీ స్మార్ట్ఫోన్లో సెట్టింగ్స్ యాప్ ఓపెన్ చేయండి.
- కిందకు స్క్రోల్ చేయండి. సెక్యూరిటీ అండ్ ప్రైవసీ ఆప్షన్ మీద ట్యాప్ చేయండి.
- భద్రతా సెట్టింగ్ల కింద డివైజ్ అన్లాక్ ఆప్షన్ని ఎంచుకోండి.
- డివైజ్ అన్లాక్ సెక్షన్లో, థెఫ్ట్ ప్రొటెక్షన్ మీద క్లిక్ చేయండి.
- ఇందులో థెఫ్ట్ డిటెక్షన్ లాక్, ఆఫ్లైన్ డివైజ్ లాక్, రిమోట్ లాక్, ఫైండ్ మై డివైజ్ వంటి ఆప్షన్లు కనిపిస్తాయి.
- ఈ ఫీచర్లను టాగ్లింగ్ చేయడం ద్వారా వాటిని ఎనేబుల్ చేయండి. అదనపు రక్షణ కోసం, వినియోగదారులు బయోమెట్రిక్ డేటాను ఉపయోగించి ధృవీకరించాలి.
గూగుల్ థెఫ్ట్ ప్రొటెక్షన్ ఫీచర్లు:
- థెఫ్ట్ డిటెక్షన్ లాక్: ఎవరైనా మీ స్మార్ట్ఫోన్ని దొంగిలించడానికి ప్రయత్నించడం వంటి అనుమానాస్పద కార్యకలాపాలను గుర్తించినప్పుడు ఈ ఫీచర్ మీ ఫోన్ను ఆటోమేటిక్గా లాక్ చేస్తుంది.
- ఆఫ్లైన్ డివైజ్ లాక్: ఈ ఆప్షన్.. మీ స్మార్ట్ఫోన్ స్క్రీన్ ఆఫ్లైన్లోకి వెళ్లగానే ఆటోమేటిక్గా లాక్ అవుతుంది. నెట్వర్క్ కనెక్షన్ పోయినా పరికరం సురక్షితంగా ఉండేలా చూస్తుంది.
- రిమోట్ లాక్: రిమోట్ లాక్తో, మీరు android.com/lock సందర్శించడం ద్వారా మీ పరికరాన్ని రిమోట్గా లాక్ చేయవచ్చు. డివైజ్ ఆన్లైన్లో ఉన్నప్పుడు మాత్రమే ఇది పనిచేస్తుంది! కానీ ఫోన్ ఆఫ్లైన్లోకి వెళితే, అది తిరిగి కనెక్ట్ అయినప్పుడు ఆటోమేటిక్గా లాక్ అవుతుంది.
- ఫైండ్ అండ్ ఎరేజ్ డివైజ్ : ఈ ఫీచర్ ఫైండ్ మై డివైజ్ నెట్వర్క్కు లింక్ చేస్తుంది. యాక్టివేట్ అయిన తర్వాత, ఇది మీ పరికరం దొంగతనానికి గురైతే మొత్తం డేటాను రిమోట్గా తుడిచివేయడానికి మిమ్మల్ని అనుమతిస్తుంది. సున్నితమైన సమాచారాన్ని సురక్షితంగా ఉంచుతుంది.
ఇది తెలుసుకోండి..
"మీ డివైజ్ వై-ఫై లేదా బ్లూటూత్కు కనెక్ట్ చేసి ఉంటే థెఫ్ట్ డిటెక్షన్ లాక్ యాక్టివేట్ కాకపోవచ్చు," అని గూగుల్ సపోర్ట్ డాక్యుమెంట్స్ సూచిస్తున్నాయి. బ్లూటూత్ యాక్ససరీలను తరచుగా ఉపయోగించే వినియోగదారులకు ఇది సమస్యాత్మకంగా ఉంటుంది. అదనంగా, అనేక క్విక్-లాక్ ప్రయత్నాలు ఉంటే థెఫ్ట్ డిటెక్షన్ లాక్ నిలిచిపోతుంది.
సంబంధిత కథనం