ఛానెల్​ క్లిక్​ అయితే లగ్జరీ లైఫే! ఈ యూట్యూబర్లు అసలు డబ్బులు ఎలా సంపాదిస్తున్నారో తెలుసా?

యూట్యూబ్​, ఇన్​స్టాగ్రామ్​, వాట్సాప్​, స్నాప్​చాట్​ వంటివి ఇప్పుడు మనిషి జీవితంలో ఒక భాగమైపోయాయి. ఈ నేపథ్యంలోనే పెద్ద సంఖ్యలో కంటెంట్​ క్రియేటర్లు కూడా పుట్టుకొస్తున్నారు. మరీ ముఖ్యంగా యూట్యూబ్​లో తమ కంటెంట్​ని పబ్లీష్​ చేస్తూ చాలా మంది యూట్యూబర్లు లక్షల్లో సంపాదిస్తున్నారు. మీరు ఫాలో అయ్యే వారి వార్షిక ఆదాయం గురించి మీకు తెలిసే ఉంటుంది! ప్రముఖ యూట్యూబర్​ రన్​వీణ్​ అల్లాబాదియా (బీర్​బైసెప్స్​) నెలకు సుమారు రూ. 35లక్షలు.. అంటే ఏడాదికి 4,20,00,000 లక్షలు సంపాదిస్తున్నాడు. ఛానెల్​ క్లిక్​ అయితే చాలు, చాలా మంది ఇలా లక్షల్లో సంపాదిస్తున్నరు. అయితే, యూట్యూబ్​ ద్వారా అసలు ఎన్ని విధాలుగా సంపాదించవచ్చో మీకు తెలుసా?

యూట్యూబ్​ ఛానెల్​ ద్వారా ఆదాయం..

యూట్యూబ్​ ఛానెల్​ ద్వారా సంపాదించడానికి అనేక మార్గాలు ఉన్నాయి. వాటి గురించి ఇక్కడ తెలుసుకుందాము..

1. యూట్యూబ్​ పార్ట్​నర్​ ప్రోగ్రామ్​- మీరు ఏదైనా వీడియో చూస్తున్నప్పుడు.. యాడ్​ ప్లే అయితే, కంటెంట్​ క్రియేటర్​కి కొంత మొత్తంలో ఆదాయం జనరేట్​ అవుతున్నట్టు అర్థం. కంపెనీలు యాడ్స్​ ప్లే చేసేందుకు యూట్యూబ్​కి డబ్బులు ఇస్తాయి. వాటిల్లో కొంత మొత్తాన్ని యూట్యూబ్​.. క్రియేటర్లకు ఇస్తుంది. దీనిని యూట్యూబ్​ పార్టనర్​ ప్రోగ్రామ్​ అంటారు. ఒకవేళ మీరు యూట్యూబ్​ ప్రీమియం తీసుకుంటే, యాడ్స్​ ప్లే అవ్వవు. కానీ మీరు కట్టిన ప్రీమియం మొత్తంలో కొంత భాగం క్రియేటర్​కి వెళుతుంది.

అయితే, ఛానెల్​ పెట్టిన వెంటనే యూట్యూబ్​ యాడ్స్​ ఆన్​ అవ్వవు! ఇందుకు కొన్ని రూల్స్​ ఉన్నాయి. 12 నెలల్లో మీకు 1000 మంది సబ్​స్క్రైబర్లు ఉండాలి. దానితో పాటు 4వేల వాచ్​ హవర్స్​ (లాంగ్​ వీడియోలు) లేదా 90 రోజుల్లో 10 మిలియన్​ షార్ట్స్​ వ్యూస్​ వచ్చి ఉండాలి. కొత్త ఛానెల్​ కాబట్టి దీనికి కాస్త సమయం పడుతుంది. ఒక్కసారి యాడ్స్​కి ఎలిజిబుల్​ అయితే, మీకు రెవెన్యూ స్టార్ట్​ అవుతుంది.

ఈ యూట్యూబ్​ పార్ట్​నర్​ ప్రోగ్రామ్​తో యాడ్స్​ మాత్రమే కాదు మరికొన్ని లాభాలు కూడా ఉన్నాయి. అవి.. సూపర్​ ఛాట్స్​, సూపర్​ థాంక్స్​, ఛానెల్​ మెంబర్​షిప్​ ఫీచర్స్​. సూపర్​ థ్యాంక్స్​ అంటే, మీ పని నచ్చి ఎవరైనా మీకు డబ్బులు గిఫ్ట్​ చేయడం. కొందరు కొన్ని వీడియోలను మెంబర్స్​ కోసమే పెడుతుంటారు. వాటిని చూడాలంటే మెంబర్​షిప్​ తీసుకోవాలి. ఈ మధ్య యూట్యూబ్​ షాపింగ్​ అన్న ఆప్షన్​ కూడా తీసుకొచ్చారు. మీ ప్రాడక్ట్స్​ని ఇక్కడ సేల్​ చేసుకోవచ్చు. ఇలా.. వీటి ద్వారా కూడా మీరు డబ్బులు సంపాదించొచ్చు.

బ్రాండ్​ డీల్స్​- యూట్యూబ్​ పార్ట్​నర్​ ప్రోగ్రామ్​తో కన్నా ఈ బ్రాండ్​ డీల్స్​తోనే ఎక్కువ సంపాదించవచ్చు. ఇంకా చెప్పాలంటే, ఇన్​ఫ్లుయెంజర్లు విపరీతంగా డబ్బులు సంపాదిస్తోంది ఈ బ్రాండ్​ డీల్స్​తోనే! ఛానెల్​ ప్రారంభించి, మీకు మంచి వ్యూస్​ వస్తుంటే.. కొన్ని బ్రాండ్స్​ మీ దగ్గరికి వస్తాయి. తమ ప్రాడక్ట్స్​ని ప్రమోట్​ చేయమంటాయి. ఈ విధంగా కూడా డబ్బులు సంపాదించుకోవచ్చు. మీకు నచ్చే యూట్యూబర్లు.. వీడియో మధ్యలో ఇలాంటి కంటెంట్​ని పెడుతుండటం మీరు చూసే ఉంటారు. బ్రాండ్​ డీల్స్​తోనే లక్షల్లో సంపాదిస్తున్న వారు చాలా మంది ఉన్నారు.

అఫీలియేటెడ్​ ఇన్​కమ్​- మీ ఫేవరెట్​ యూట్యూబర్లు కొన్ని లింక్స్​ ఇచ్చి, మీకు ఆసక్తి ఉంటే కొనుగోలు చేసుకోవచ్చు అని చెబుతుండటం మీరు చూసే ఉంటారు. వీరికి అమెజాన్​, ఫ్లిప్​కార్ట్​ లేదా ఇతర ఈ-కామర్స్​ సంస్థలతో టై-అప్​ ఉంటుంది. మీరు ఆ లింక్​ క్లిక్​ చేసి ఏదైనా ప్రాడక్ట్​ కొంటే, అందులో కొంత మొత్తం క్రియేటర్​కి కూడా వస్తుంది.

కంటెంట్​ కోర్సులు- ఈ మధ్యకాలంలో యూట్యూబ్​ క్రియేటర్లు బాగా ఉపయోగించుకుంటున్న ఆప్షన్​ ఇది! 'హౌ టు స్టార్ట్​ యూట్యూబ్​', 'హౌ టు డూ డే ట్రేడింగ్​' అంటూ చాలా మంది కోర్సులను విక్రయిస్తున్నారు. మీరు ఆ కోర్సులు వాడాలంటే డబ్బులు కట్టి తీసుకోవాలి. ఇది కూడా యూట్యూబర్లకు మంచి రెవెన్యూ ఆప్షన్​.

మెర్చెండైజ్​- ఇంకొందరు క్రియేటర్లు తమ ప్రాడక్ట్స్​ని మెర్చెండైజ్​ చేస్తున్నారు. ఇది మంచి బిజినెస్​ మార్కెటింగ్​! దీని ద్వారా బ్రాండ్​ వాల్యూ పెరుగుతుంది. డబ్బులు కూడా జనరేట్​ అవుతాయి. బిజినెస్​ వృద్ధి చెందుతుంది.

కంటెంట్​ లైసెన్స్​- యూట్యూబర్ల వీడియో ఏదైనా వైరల్​ అయితే, దానిని వాడుకునేందుకు చాలా మంది (ముఖ్యంగా మీడియా) ముందుకొస్తారు. మీరు మీ వీడియోని లైసెన్స్​ చేసుకుని, డబ్బులు అడగొచ్చు.

నేటి సోషల్​ మీడియా యుగంలో ఇన్​ప్లుయెంజర్లు చాలా ఫేమస్​ అవుతున్నారు. చాలా డబ్బులు సంపాదిస్తున్నట్టు వీడియోలు చేస్తున్నారు. వారిలాంటి లైఫ్​స్టైల్​ కావాలని చాలా మంది కలలు కంటున్నారు. అయితే, యూట్యూబ్​ ఛానెల్​ ద్వారా డబ్బులు సంపాదించాలంటే, ముందు ఛానెల్​ క్లిక్​ అవ్వాలి. దానికి సమయం పడుతుందని గుర్తించాలి. ఇవాళ పెట్టి, రేపు ఆదాయం రావాలంటే కష్టం అని గుర్తుపెట్టుకోవాలి.