క్రెడిట్ కార్డ్ లిమిట్ ఎలా పెంచుకోవాలి? అప్లై చేసే ముందు ఇవి తెలుసుకోండి!

ఇటీవల ఏదైనా కొనేందుకు క్రెడిట్ కార్డులను ఎక్కువగా ఉపయోగిస్తున్నారు. క్రెడిట్ కార్డు చెల్లింపులు కావాలంటే ఈఎంఐ ద్వారా చేసుకోవచ్చు. దీంతో ఇబ్బంది లేకుండా ఉంటుంది. కొంతమంది అధిక క్రెడిట్ లిమిట్ కావాలి అనుకుంటారు. మీ క్రెడిట్ పరిమితిని ఎలా పెంచుకోవాలో మీకు కూడా గందరగోళం ఉండవచ్చు. మన క్రెడిట్ పరిమితిని పెంచడం ఆర్థికంగా ప్రయోజనకరంగా ఉంటుంది. అయితే ఇది సమస్యలను కూడా కలిగిస్తుందని గుర్తుంచుకోవాలి. మనం పెంచే ఏదైనా క్రెడిట్ పరిమితిని ఎలా నిర్వహించాలో తెలుసుకోవాలి.

క్రెడిట్ కార్డులో మీకు కావలసినంత డబ్బును ఉపయోగించవచ్చు. కానీ కొంతమంది తమ క్రెడిట్ లిమిట్ పెంచుకోవాలని అనుకుంటారు. ఇది వారికి పెద్ద మొత్తంలో వస్తువులను కొనడానికి డబ్బును ఇస్తుంది. ఇది వారికి అత్యవసర ఖర్చులను తీర్చడానికి లేదా అందుబాటులో ఉన్న ఉత్తమ ఆఫర్‌లను సద్వినియోగం చేసుకోవడానికి సాయపడుతుంది. క్రెడిట్ పరిమితిని పెంచేముందు చాలా జాగ్రత్తలు తీసుకోవాలి. ఎందుకంటే అనవసరమైన ఖర్చు, రుణ సమస్యలకు దారితీస్తుంది.

ఈ విషయాలు గుర్తుంచుకోండి

మీ క్రెడిట్ పరిమితిని పెంచడం వల్ల మీ క్రెడిట్ వినియోగ నిష్పత్తి తగ్గుతుంది. ఇది మీ క్రెడిట్ స్కోర్‌ను ప్రభావితం చేస్తుంది.

అత్యవసర పరిస్థితులు, ప్రయాణం లేదా పెద్ద కొనుగోళ్లు జరిగినప్పుడు క్రెడిట్ పరిమితి పెరుగుదల మీకు ఆర్థిక సహాయం అందిస్తుంది.

మంచి క్రెడిట్ స్కోరు కలిగి ఉండటం వల్ల మీరు గృహ రుణం లేదా వ్యక్తిగత రుణం పొందవచ్చు. ఏదైనా బ్యాంకు లేదా ఆర్థిక సంస్థ మీకు రుణం ఇచ్చేటప్పుడు మీ క్రెడిట్ హిస్టరీ, క్రెడిట్ స్కోర్‌ను చెక్ చేస్తుంది.

క్రెడిట్ కార్డ్ కంపెనీలు తరచుగా ప్రీమియం రివార్డ్ ప్రోగ్రామ్‌లు, క్యాష్‌బ్యాక్ వంటి ప్రయోజనాలను అందిస్తాయి. క్రెడిట్ పరిమితిని పెంచడం ద్వారా వీటిని పొందవచ్చు.

మీ ప్రస్తుత క్రెడిట్ లిమిట్, సగటు నెలవారీ ఖర్చు, క్రెడిట్ వినియోగ నిష్పత్తిని మీరు తెలుసుకోవాలి. మీరు ఈ సమాచారాన్ని మీ క్రెడిట్ కార్డ్ స్టేట్‌మెంట్, మొబైల్ యాప్ లేదా బ్యాంక్ వెబ్‌సైట్‌లో కనుగొనవచ్చు.

క్రెడిట్ లిమిట్ కోసం ఎప్పుడు అప్లై చేయాలి?

మీ క్రెడిట్ లిమిట్‌ను పెంచుకోవడానికి కనీసం 6 నుండి 12 నెలల పాటు మంచి చెల్లింపు హిస్టరీని నిర్వహించడం చాలా ముఖ్యం. అప్పుడే మీరు క్రెడిట్ పరిమితి అభ్యర్థన కోసం బ్యాంకుకు దరఖాస్తు చేసుకోవచ్చు. మీరు మొబైల్ యాప్, ఆన్‌లైన్ బ్యాంకింగ్ లేదా ఫోన్ కాల్ ద్వారా రిక్వెస్ట్ పంపవచ్చు. మీ క్రెడిట్ లిమిట్ పెంచడానికి బ్యాంకులు మీ ఆదాయం, క్రెడిట్ స్కోర్, చెల్లింపు చరిత్ర ఆధారంగా నిర్ణయాలు తీసుకుంటాయి.