Electric cars : మతిపోయే డిజైన్​తో హోండా కొత్త ఎలక్ట్రిక్​ కార్లు- రేంజ్​ ఎంతంటే..

ప్రపంచవ్యాప్తంగా ఎలక్ట్రిక్​ వాహనాలకు ఉన్న డిమాండ్​ని క్యాష్​ చేసుకునేందుకు ఆటోమొబైల్​ సంస్థలు ప్రయత్నిస్తున్న విషయం తెలిసిందే. ఈ నేపథ్యంలో పోటీని తట్టుకునేందుకు సరికొత్త టెక్నాలజీ, సరికొత్త డిజైన్​తో కస్టమర్స్​ని ఈ​ కంపెనీలు ఆకర్షిస్తన్నాయి. ఇక ఇప్పుడు దిగ్గజ ఆటోమొబైల్​ సంస్థ హోండా రెండు కొత్త ఎలక్ట్రిక్​ వాహనాలను సిద్ధం చేస్తోంది. హోండా ‘0’ సిరీస్​లో ఇవి భాగంగా ఉన్నాయి. వచ్చే ఏడాది జనవరిలో జరగనున్న కన్స్యూమర్ ఎలక్ట్రానిక్స్ షో (సీఈఎస్) 2025లో ఈ 0 సిరీస్​లోని ఎలక్ట్రిక్ ఎస్​యూవీ, ఎలక్ట్రిక్​ సెడాన్​ కాన్సెప్ట్స్​ని ఆవిష్కరించనున్నట్టు హోండా వెల్లడించింది. ఈ దశాబ్దం చివరి నాటికి బ్రాండ్ ప్రవేశపెట్టాలని లక్ష్యంగా పెట్టుకున్న 7 0 సిరీస్ ఎలక్ట్రిక్ కార్లలో ఈ ఎలక్ట్రిక్ ఎస్​యూవీ, సెడాన్ భాగం కానున్నాయి. 2026లో ఇవి ప్రొడక్షన్​ స్టేజ్​కి వెళతాయి. అయితే, కాన్సెప్ట్​ వర్షెన్​ లాంచ్​కి ముందు, ఆటో మేజర్ ఈ రెండు ఎలక్ట్రిక్ కార్లకు సంబంధించిన టీజర్​ని విడుదల చేసింది.

హోండా టీజ్​ చేసిన ఈ రెండు ఎలక్ట్రిక్ కార్లు ఫ్యూచరిస్టిక్ లుక్స్​తో వస్తాయి. ఎలక్ట్రిక్ ఎస్​యూవీ, సెడాన్ రెండూ కొత్త బీస్పోక్ ప్లాట్​ఫామ్​పై ఆధారపడి ఉంటాయి. ఆసక్తికరంగా.. హోండా 0 సిరీస్ సెడాన్ కాన్సెప్ట్​ని గతంలో ప్రదర్శించడం జరిగింది. రాబోయే ఎస్​యూవీ కాన్సెప్ట్ టీజర్ చిత్రం సూచించినట్లుగా దాని డిజైన్ ఫిలాసఫీని పంచుకుంటుంది. ఫ్లాట్ ఫ్రంట్, రేర్ ప్రొఫైల్​తో పాటు స్లీక్ ఎల్​ఈడీ లైట్లు రెండు కాన్సెప్ట్ ఎలక్ట్రిక్ వాహనాల్లోని డిజైన్ అంశాలు.

హోండా 0 సిరీస్: స్పెసిఫికేషన్లు..

హోండా ఇప్పటికే 0 సిరీస్ ఎలక్ట్రిక్​ వాహనల ప్లాట్​ఫామ్​కు సంబంధించిన టెక్నికల్ స్పెసిఫికేషన్స్​ వివరాలను వెల్లడించింది. హోండా 0 సిరీస్ మోడళ్లు సింగిల్, డ్యూయల్-మోటార్ ఇంజిన్స్​తో అందుబాటులో ఉంటాయి. కొత్తగా అభివృద్ధి చేసిన కాంపాక్ట్ ఈ-యాక్సిల్స్​ కలిగి ఉంటాయి. ఈ-యాక్సిల్స్​ ద్వారా కారులో స్పేస్​ పెరుగుతుందని, వాహనం ఫ్రెంటల్​ ఏరియా తగ్గుతుందని సంస్థ పేర్కొంది. ఇది ఏరోడైనమిక్ సామర్థ్యాన్ని మెరుగుపరుస్తుందని, ఫలితంగా మెరుగైన రేంజ్​ని అందిస్తుందని హోండా వెల్లడించింది.

హోండా 0 సిరీస్ ఎలక్ట్రిక్ వాహనాల ఎంట్రీ లెవల్ వేరియంట్లు.. రేర్​ యాక్సిల్​లో 245 బీహెచ్​పీ మోటార్​తో వస్తాయి. రేర్ వీల్ డ్రైవ్​ వీటిల్లో ఉంటాయి. అలాగే, రెండు డ్యూయల్-మోటార్ ఫోర్-వీల్ డ్రైవ్ వేరియంట్లు ఉన్నాయి. ఇది 245 బీహెచ్​పీ రేర్ మోటార్​ని 68 బీహెచ్​పీ ఫ్రంట్ మోటార్​తో కనెక్ట్​ చేసి ఉంటుంది. ఇతర ఎలక్ట్రిక్ కార్ల మాదిరిగానే ఈ ఎలక్ట్రిక్ వాహనాలు నికెల్-మాంగనీస్-కోబాల్ట్ (ఎన్ఎంసి) బ్యాటరీ ప్యాక్లను ఉపయోగిస్తాయి.

ఈ బ్యాటరీ ప్యాక్​లు 80 కిలోవాట్ల నుంచి 90 కిలోవాట్ల మధ్య సామర్థ్యాన్ని కలిగి ఉంటాయి. వీటిని ఒకసారి ఛార్జ్ చేస్తే సుమారు 480 కిలోమీటర్ల రేంజ్​ని అందిస్తాయి. ఈ బ్యాటరీ ప్యాక్లను సాధ్యమైనంత సన్నగా చేయడమే తమ లక్ష్యమని హోండా పేర్కొంది. జపాన్ ఆటో ఓఈఎం 0 సిరీస్ ఎలక్ట్రిక్ వాహనాల బ్యాటరీ ప్యాక్లు ప్రత్యర్థి వాహన తయారీదారుల ఎలక్ట్రిక్ వాహనాల బ్యాటరీల కంటే 8ఎంఎం సన్నగా ఉంటాయని పేర్కొంది.