Maruti Suzuki : కార్లను ఎగబడి కొనేశారు! జీఎస్టీ ఎఫెక్ట్తో మారుతీ సుజుకీకి ‘ది బెస్ట్ ఫెస్టివల్ సీజన్’
Maruti Suzuki Sales : జీఎస్టీ రేట్ల తగ్గింపు అనంతరం మొదలైన పండుగ సీజన్లో తమ వాహనాలకు విపరీతమైన డిమాండ్ కనిపించిందని మారుతీ సుజుకీ సంస్థ ప్రకటించింది. దశాబ్ద కాలంలోనే ది బెస్ట్ ఫెస్టివల్ సీజన్ అని పేర్కొంది.
గత దశాబ్దంలో ఎన్నడూ లేని విధంగా మారుతీ సుజుకీ సంస్థ ఈ పండుగ సీజన్లో అద్భుతమైన అమ్మకాలు నమోదు చేసింది! జీఎస్టీ కారణంగా ధరలపై ఏర్పడిన సానుకూలత, వినియోగదారుల నుంచి బలమైన డిమాండ్ తోడవ్వడం ఇందుకు ప్రధాన కారణం. దేశంలోనే అతిపెద్ద కార్ల తయారీ సంస్థ అయిన మారుతీ సుజుకీ మునుపటి డెలివరీ రికార్డులను అధిగమించడమే కాకుండా.. బుకింగ్స్, ఎగుమతుల్లో కూడా భారీ వృద్ధిని నమోదు చేసింది. ఇది భారతదేశ ఆటోమొబైల్ రంగంలో విస్తృత స్థాయి పునరుజ్జీవనాన్ని సూచిస్తోంది.
పండుగ రద్దీతో మునుపెన్నడూ లేని విధంగా అమ్మకాలు..
ఈ ఏడాది నవరాత్రి సీజన్ మారుతీ సుజుకీకి ఒక కీలక మలుపుగా మారింది. నవరాత్రి మొదటి ఎనిమిది రోజుల్లో కంపెనీ ఏకంగా 1.65 లక్షల వాహనాలను డెలివరీ చేసింది. దసరా పండుగ నాటికి ఈ డెలివరీలు 2 లక్షలకు చేరాయి. ఈ సంఖ్య గత ఏడాది నవరాత్రి సీజన్ డెలివరీల (సుమారు 1 లక్ష) కంటే రెట్టింపు కావడం విశేషం! మరోవైపు, బుకింగ్స్ 2.5 లక్షల యూనిట్లకు చేరి, సరికొత్త రికార్డు సృష్టించాయి.
"ఈ పండుగ సీజన్లో డిమాండ్ ఊహించని విధంగా ఉంది," అని మారుతీ సుజుకీ మార్కెటింగ్ అండ్ సేల్స్ సీనియర్ ఎగ్జిక్యూటివ్ ఆఫీసర్ పార్థో బెనర్జీ తెలిపారు. "గత ఏడాదితో పోలిస్తే మా విక్రయాలు దాదాపు రెట్టింపు అయ్యాయి. ఇది జీఎస్టీ సంస్కరణ కొనుగోలుదారులలో సృష్టించిన సానుకూల దృక్పథానికి నిదర్శనం," అని అన్నారు.
ప్రభుత్వం జీఎస్టీ రేటును తగ్గించడం మార్కెట్లో కొత్త ఉత్సాహాన్ని నింపిందని బెనర్జీ పేర్కొన్నారు. "జీఎస్టీ కౌన్సిల్ ప్రకటన (సెప్టెంబర్లో) తర్వాత, వేచి చూస్తున్న అనేక మంది కస్టమర్లు కార్లను బుక్ చేయడం ప్రారంభించారు," అని ఆయన వివరించారు. "ఈ విశ్వాసం నేరుగా షోరూమ్ కార్యకలాపాల పెరుగుదలకు, రికార్డు బుకింగ్స్కు దారితీసింద"ని వివరించారు.
ఈ సీజన్లో మారుతీ విజయంలో ఎగుమతులు కూడా కీలక పాత్ర పోషించాయి! విదేశీ రవాణా 50 శాతం పెరిగి సుమారు 42,000 యూనిట్లకు చేరింది. డిమాండ్ను అందుకోవడానికి, మారుతీ ఉత్పత్తి బృందాలు ఆదివారాలు, సెలవు దినాల్లో కూడా పనిచేస్తూ డెలివరీ లక్ష్యాలను పూర్తి చేయడానికి కృషి చేస్తున్నాయి.
డీలర్లు, ఆర్థిక సంస్థల సహకారం..
ఈ రికార్డు సంఖ్యల వెనుక సంస్థ భాగస్వాముల నుంచి అంతే దూకుడుగా ప్రయత్నాలు జరిగాయి. వాహనాలను వినియోగదారులకు త్వరగా అందించడానికి డీలర్లు "పగలు రాత్రి కష్టపడుతున్నారు," అని బెనర్జీ తెలిపారు. అదే విధంగా ఫైనాన్స్ భాగస్వాములు కూడా లోన్లను మంజూరు చేయడానికి, డెలివరీ ఆర్డర్లను త్వరగా జారీ చేయడానికి ప్రయత్నిస్తున్నారు.
గతంలో రోజుకు సుమారు 10,000గా ఉన్న బుకింగ్స్ ఇప్పుడు దాదాపు 18,000కు పెరిగాయి. ఆసక్తికరంగా, అత్యధిక స్పందన భారతదేశంలోని మొదటి 100 నగరాల వెలుపల నుండే వచ్చింది! చిన్న మార్కెట్లే ఈ డిమాండ్కు నాయకత్వం వహిస్తున్నాయని ఇది సూచిస్తుంది.
చిన్న కార్లదే హవా..
ఈ వృద్ధిలో అత్యధిక భాగం చిన్న కార్ల నుంచే వచ్చిందని బెనర్జీ వెల్లడించారు. చిన్న కార్ల విక్రయాలు గత ఏడాదితో పోలిస్తే 100 శాతం పెరిగాయి. "మెట్రోపాలిటన్ నగరాల్లో 35–40 శాతం వృద్ధిని చూస్తున్నాం, కానీ మెట్రోల వెలుపల స్పందన అద్భుతంగా ఉంది," అని ఆయన వివరించారు.
పండుగ ఉత్సాహం ఉరకలేస్తుండటం, జీఎస్టీ సంస్కరణలు ఉత్ప్రేరకంగా పనిచేయడం వంటి అంశాల నేపథ్యంలో, మారుతీ సుజుకీ అక్టోబర్ నెలలో కూడా అదే స్థాయిలో అమ్మకాలను లక్ష్యంగా పెట్టుకుంది. ఇంకా 2.5 లక్షల పెండింగ్ బుకింగ్స్ ఉండటంతో, సంస్థకు డిమాండ్ గురించి కాకుండా, వాటిని అందించడంలో ఎదురయ్యే సవాళ్లే కీలకం కానున్నాయి.
"ప్రతిచోటా సానుకూలత ఉంది. మార్కెట్ మళ్లీ సజీవంగా ఉంది. అందుకే, వినియోగదారుల ముఖాల్లో చిరునవ్వును త్వరగా అందించడానికి మేము చేయగలిగినదంతా చేస్తున్నాము," అని బెనర్జీ ముగించారు.
సంబంధిత కథనం