ప్రతి ఆర్డర్​పై క్యాష్​బ్యాక్​, ఫ్రీ యూట్యూబ్​ ప్రీమియం​- Flipkart Black Membershipతో భారీగా డబ్బులు ఆదా!

భారతదేశంలో ప్రముఖ ఈ-కామర్స్ దిగ్గజం ఫ్లిప్‌కార్ట్ కొత్త సబ్‌స్క్రిప్షన్ ప్రోగ్రామ్ ‘ఫ్లిప్‌కార్ట్ బ్లాక్’ని తాజాగా ప్రారంభించింది. ఇది అమెజాన్ ప్రైమ్ మెంబర్‌షిప్‌కు గట్టి పోటీ ఇస్తుందని భావిస్తున్నారు. ఈ సబ్‌స్క్రిప్షన్‌లో భాగంగా వినియోగదారులకు సేల్ ఈవెంట్లకు ముందుగానే యాక్సెస్, ప్రత్యేక డిస్కౌంట్లు, ఇంకా ప్రాధాన్యతా కస్టమర్ సపోర్ట్ వంటి ప్రయోజనాలు లభిస్తాయి. ఫ్లిప్‌కార్ట్‌కు ఇప్పటికే ఫ్లిప్‌కార్ట్ వీఐపీ, అలాగే రెండు విభాగాలుగా ఉండే ఫ్లిప్‌కార్ట్ ప్లస్ (సిల్వర్, గోల్డ్) అనే లాయల్టీ ప్రోగ్రామ్‌లు ఉన్నాయి. అయితే, ఫ్లిప్‌కార్ట్ బ్లాక్ వీటన్నింటికంటే ప్రీమియం సబ్‌స్క్రిప్షన్ అని కంపెనీ చెబుతోంది.

ఫ్లిప్‌కార్ట్ బ్లాక్ ధర, ప్రయోజనాలు- వీఐపీ, ప్లస్‌తో పోలిస్తే ఎలా ఉన్నాయి?

ఫ్లిప్‌కార్ట్ బ్లాక్ మెంబర్‌షిప్ వార్షిక ధర రూ. 1,499. అయితే, ప్రస్తుతం పరిమిత కాల ఆఫర్‌లో భాగంగా దీనిని రూ. 990కే అందిస్తున్నారు. ఫ్లిప్‌కార్ట్ వీఐపీ మెంబర్‌షిప్ వార్షిక ధర రూ. 799. దీనితో పోలిస్తే, బ్లాక్ దాదాపు రెట్టింపు ధరతో ప్రీమియం సబ్‌స్క్రిప్షన్‌గా మార్కెట్‌లోకి వచ్చింది. ఫ్లిప్‌కార్ట్ ప్లస్ లాయల్టీ ప్రోగ్రామ్ రెండు విభాగాలుగా ఉంటుంది. ఇందులో ఒక వినియోగదారుడు ఏడాదిలో 10 ఆర్డర్లు చేస్తే ప్లస్ సిల్వర్ స్థాయికి, 20 ఆర్డర్లు చేస్తే ప్లస్ గోల్డ్ స్థాయికి చేరుకుంటారు.

ఫ్లిప్‌కార్ట్ బ్లాక్ సబ్‌స్క్రిప్షన్ తీసుకున్న వారికి ప్రతి ఆర్డర్‌పై 5శాతం సూపర్‌కాయిన్స్ క్యాష్‌బ్యాక్ లభిస్తుంది (గరిష్టంగా రూ. 100 వరకు). క్విక్-కామర్స్ ప్లాట్‌ఫామ్ అయిన ఫ్లిప్‌కార్ట్ మినిట్స్‌లో కూడా ఈ ప్రయోజనం వర్తిస్తుంది. దీనితో పాటు మెంబర్లు నెలకు గరిష్టంగా 800 సూపర్‌కాయిన్స్ సంపాదించుకోవచ్చు! సూపర్‌కాయిన్స్‌తో ఆర్డర్ చెల్లిస్తే, రూ. 1,000 వరకు ప్రతి ఆర్డర్‌పై 5 శాతం అదనపు డిస్కౌంట్ కూడా లభిస్తుంది.

సూపర్‌కాయిన్స్ అనేది ఫ్లిప్‌కార్ట్ రివార్డ్ కరెన్సీ. దీని విలువ రూపాయితో సమానం. ఉదాహరణకు, 50 సూపర్‌కాయిన్స్ ఉంటే, వినియోగదారుడు రూ. 50 క్యాష్‌బ్యాక్ లేదా డిస్కౌంట్‌ పొందవచ్చు.

ఫ్లిప్​కార్ట్​ బ్లాక్​ మెంబర్​షిప్​- ఫ్రీ యూట్యూబ్ ప్రీమియం!

ఫ్లిప్‌కార్ట్ బ్లాక్ సబ్‌స్క్రిప్షన్‌లో అత్యంత ఆకర్షణీయమైన ఫీచర్ ఏంటంటే.. ఇందులో సంవత్సరానికి సరిపడా యూట్యూబ్ ప్రీమియం సబ్‌స్క్రిప్షన్ ఉచితంగా వస్తుండటం. దీనితో ఎలాంటి యాడ్స్​ లేకుండా వీడియోలు చూడవచ్చు. సంవత్సరానికి యూట్యూబ్ ప్రీమియం సబ్‌స్క్రిప్షన్ ధర రూ. 1,490 కాబట్టి, ఈ డీల్ చాలా విలువైనదని చెప్పవచ్చు. ఈ సబ్‌స్క్రిప్షన్ ఒక సంవత్సరం వరకు చెల్లుబాటు అవుతుంది. దీనిని బదిలీ చేయడానికి వీలు లేదు, ఒక యూట్యూబ్ అకౌంట్‌కు మాత్రమే లింక్ చేయగలరు.

దీనితో పాటుగా, బ్లాక్ సబ్‌స్క్రైబర్లకు ప్రత్యేక డిస్కౌంట్లు, సేల్స్‌కు ముందుగానే యాక్సెస్, 24x7 ప్రాధాన్యతా కస్టమర్ సపోర్ట్ వంటి ప్రయోజనాలు లభిస్తాయి. అంతేకాకుండా, క్లియర్‌ట్రిప్ ద్వారా ఫ్లైట్ క్యాన్సిలేషన్, రీషెడ్యూలింగ్ సేవలు కేవలం రూ. 1కే పొందవచ్చు. అయితే, ఒక్కసారి సబ్‌స్క్రిప్షన్ కోసం చెల్లించిన తర్వాత, దానిని రద్దు చేసుకోవడానికి లేదా చెల్లించిన డబ్బును తిరిగి పొందడానికి వీలు ఉండదని గుర్తుపెట్టుకోవాలి.

ఫ్లిప్‌కార్ట్ బ్లాక్ ప్రారంభం అనేది సంవత్సరానికి రూ. 1,499 ధర ఉండే అమెజాన్ ప్రైమ్ సబ్‌స్క్రిప్షన్‌కు పోటీ ఇచ్చే ప్రయత్నంగా కనిపిస్తోంది. అలాగే, ఫ్లిప్‌కార్ట్ వీఐపీ ప్లాన్ అమెజాన్ ప్రైమ్ లైట్ ప్లాన్‌కు పోటీ ఇస్తోంది. అమెజాన్ ప్రైమ్ మెంబర్లు సేల్స్‌కు ముందుగానే యాక్సెస్ పొందడంతో పాటు అమెజాన్ ప్రైమ్ వీడియో స్ట్రీమింగ్ సేవను కూడా పొందుతారు.