ఇండియాలో బెస్ట్​ సెల్లింగ్​ కార్లు- వాటిపై పండుగ ఆఫర్లు ఇలా..

భారతదేశంలో పండుగ సీజన్ అనేది కార్ల కొనుగోలుదారులకు ఎప్పుడూ ఒక స్వీట్ స్పాట్! అయితే 2025 పండుగ సీజన్‌ మరింత ప్రత్యేకం! ఈసారి ఆఫర్లు, డిస్కౌంట్లతో పాటు జీఎస్టీ 2.0 ధరల హేతుబద్ధీకరణ కూడా తోడైంది. శాశ్వతమైన జీఎస్టీ తగ్గింపులు ఇప్పుడు డీలర్ల తాత్కాలిక పండుగ ఆఫర్లతో కలిసి వస్తున్నాయి. ఈ రెండూ కూడా ఇండియాలో బెస్ట్​ సెల్లింగ్​ హ్యాచ్‌బ్యాక్‌లు, కాంపాక్ట్ సెడాన్‌లు, ఎస్‌యూవీలను అమాంతం తగ్గించేశాయి. వీటి వల్ల ఇటీవలి సంవత్సరాలలో ఎన్నడూ లేనంత భారీ పొదుపు పొందవచ్చు. ఈ నేపథ్యంలో బెస్ట్​ సెల్లింగ్​ కార్లు, వాటిపై పండుగ డిస్కౌంట్లను ఇక్కడ తెలుసుకోండి..

భారీ తగ్గింపులు అందిస్తున్న ప్రముఖ కార్లు..

1. టాటా నెక్సాన్- రూ. 2 లక్షల వరకు ప్రయోజనాలు

టాటా నెక్సాన్​పై ఏకంగా రూ. 2 లక్షల వరకు భారీ ప్రయోజనాలు లభిస్తున్నాయి! ఇందులో ప్రధానంగా రూ. 1.55 లక్షలు జీఎస్టీ-సంబంధిత తగ్గింపు రూపంలో, దాని అసలు ధరను సమర్థవంతంగా తగ్గించింది. దీనికి అదనంగా, డీలర్లు రూ. 45,000 వరకు నగదు తగ్గింపులు, స్క్రాపేజ్ ప్రోత్సాహకాలు, కార్పొరేట్ ఆఫర్ల రూపంలో అందిస్తున్నారు. సిటీ కొనుగోలుదారుల ఫేవరెట్‌గా ఉన్న ఈ కారుపై ఇంత మొత్తంలో ప్రయోజనం ఉండడం వల్ల, నెక్సాన్‌ను అసలు విస్మరించలేం.

2. హోండా ఎలివేట్- రూ. 1.22 లక్షల వరకు పొదుపు

తరువాత స్థానంలో హోండా ఎలివేట్ ఎస్​యూవీ ఉంది. దీనిపై రూ. 1.22 లక్షల వరకు ఆదా చేసుకోవచ్చు. ఇందులో రూ. 91,100 నేరుగా జీఎస్టీ ప్రయోజనాల ద్వారా తగ్గించగా, అదనంగా రూ. 31,000 ఎక్స్​ఛేంజ్​ బోనస్‌లు, యాక్సెసరీలు, లాయల్టీ ప్యాక్‌ల ద్వారా కవర్ అవుతుంది.

3. హోండా అమేజ్​- కొత్త మోడల్‌పై రూ. 1.60 లక్షల వరకు ఆఫర్

హోండా ఈ పండుగ సీజన్‌లో అమేజ్‌తో రెండు విధాలుగా ప్రజలను ఆకర్షిస్తోంది.

పాత తరం అమేజ్‌: మార్కెట్ నుంచి తొలగిపోతున్న రెండవ తరం అమేజ్‌పై రూ. 97,200 వరకు ప్రయోజనాలు అందిస్తున్నారు. ఇందులో ఎక్కువ భాగం జీఎస్టీ తగ్గింపులు (రూ. 72,800), డీలర్-స్థాయి ఎక్స్​ఛేంజ్​ బోనస్‌ల ద్వారా లభిస్తోంది.

కొత్త తరం అమేజ్‌: అసలు కథ మూడవ తరం అమేజ్‌ సెడాన్​తోనే ఉంది. ఈ సరికొత్త మోడల్ మరింత దూకుడుగా ఆఫర్లను కలిగి ఉంది: టాప్-ఎండ్ జెడ్​ఎక్స్​ సీవీటీ వేరియంట్‌పై ఏకంగా రూ. 1.60 లక్షల వరకు ప్రయోజనాలు. ఇది రూ. 1.20 లక్షల అత్యధిక డైరెక్ట్ జీఎస్టీ ధర తగ్గింపు, రూ. 40,000 ఎక్స్​ఛేంజ్​ బోనస్‌తో కూడి ఉంది. సరికొత్త ఉత్పత్తిపై ఇంత భారీ ప్రయోజనాలను ఇవ్వడం ద్వారా, హోండా తన ఉద్దేశాన్ని స్పష్టంగా సంకేతాలు ఇస్తోంది. పాత కాంపాక్ట్ సెడాన్ యజమానులు త్వరగా అప్‌గ్రేడ్ అయ్యేలా ప్రేరేపించడం, కొత్తగా మార్కెట్‌లోకి వచ్చినా అమేజ్‌ను బలమైన విలువైన ఎంపికగా నిలబెట్టడం దీని వెనుక ఉన్న ఆలోచన.

4. మారుతీ సుజుకీ వాగన్ఆర్ - రూ. 75,000 వరకు లాభం

మరింత సరసమైన ఎండ్‌లో, మారుతీ సుజుకీ వాగన్ఆర్ రూ. 75,000 వరకు ప్రయోజనాలను అందిస్తోంది. ఇది రూ. 45,000 నగదు పొదుపులు, రూ. 25,000 స్క్రాపేజ్, చిన్న మొత్తంలో రూ. 5,000 కార్పొరేట్ ఆఫర్‌గా విభజించారు. ముఖ్యంగా మొదటిసారి కారు కొనుగోలు చేయాలనుకునే వారికి, విలువను కోరుకునే వారికి, పండుగ ఆఫర్ల లైనప్‌లో ఇది అత్యంత అందుబాటులో ఉండే ప్యాకేజీలలో ఒకటి.

5. హ్యుందాయ్ ఎక్స్‌టర్- రూ. 60,000 వరకు తగ్గింపులు

హ్యుందాయ్ ఎక్స్‌టర్​పై రూ. 60,000 వరకు ప్రయోజనాలు అందుబాటులో ఉన్నాయి. ఇందులో రూ. 35,000 నగదు తగ్గింపు, రూ. 25,000 స్క్రాపేజ్ బోనస్‌గా విభజన స్పష్టంగా ఉంది. హ్యుందాయ్ ఈ ఆఫర్‌లను ప్రధానంగా ఏఎంటీ, సీఎన్జీ వేరియంట్లపై కేంద్రీకరిస్తోంది. వీటి డిమాండ్ వేగంగా పెరుగుతోంది. బడ్జెట్ ఎస్‌యూవీ కొనుగోలుదారులకు, ఎక్స్‌టర్ పండుగ ధర ఇప్పటికే రద్దీగా ఉన్న విభాగంలో మరింత పోటీతత్వాన్ని జోడిస్తుంది.

6. మారుతీ సుజుకీ బ్రెజా- వ్యూహాత్మక ఆఫర్లు

మారుతీ సుజుకీ బ్రెజాపై రూ. 45,000 వరకు ప్రయోజనాలను అందిస్తున్నారు. ఇందులో ప్రధానంగా రూ. 25,000 స్క్రాపేజ్ బోనస్, చిన్న నగదు- కార్పొరేట్ ఆఫర్లు ఉన్నాయి. సంఖ్యలు కొన్ని ప్రత్యర్థులంత పెద్దవి కాకపోవచ్చు, కానీ ఈ వ్యూహం ఉద్దేశపూర్వకమైనది. బ్రెజాకు ఉన్న స్థిరమైన డిమాండ్ కారణంగా మారుతీ సుజుకీ ధరలను స్థిరంగా ఉంచగలుగుతోంది. పాత కార్లను మార్చుకోవాలనుకునే కొనుగోలుదారులను ఆకర్షించడానికి అవసరమైన ప్రోత్సాహకాలను మాత్రం అందిస్తోంది.

7. మారుతీ సుజుకీ బాలెనో - వేరియంట్ ప్రకారం ఆఫర్లు

మారుతీ సుజుకీ బాలెనోపై పండుగ ఆఫర్లు వేరియంట్, ఇంధన రకం- ప్రాంతాన్ని బట్టి విస్తృతంగా మారుతున్నాయి. సాధారణంగా, కొనుగోలుదారులు మొత్తం రూ. 70,000 వరకు ప్రయోజనాలను ఆశించవచ్చు. ఇది కొన్నిసార్లు ప్రత్యక్ష నగదు తగ్గింపుగా లేదా రూ. 55,000 విలువైన రీగల్ కిట్ వంటి యాక్సెసరీ ప్యాకేజీగా మారుతాయి.

సాధారణంగా ఈ బ్రేకప్ ఇలా ఉంటుంది:

నగదు తగ్గింపు: రూ. 25,000–రూ. 40,000 వరకు

ఎక్స్​ఛేంజ్​ బోనస్: రూ. 15,000, రూ. 30,000 మధ్య (మూడేళ్ల లోపు బాలెనో లేదా స్విఫ్ట్ నుంచి అప్‌గ్రేడ్ చేస్తున్నప్పుడు కొన్నిసార్లు ఎక్కువగా ఉంటుంది)

స్క్రాపేజ్ డిస్కౌంట్: ప్రత్యామ్నాయంగా రూ. 25,000 వరకు

కార్పొరేట్/రూరల్ ఆఫర్: సుమారు రూ. 2,500 చిన్న ఆఫర్ కూడా వర్తించవచ్చు.

ముఖ్యంగా.. ఈ తాత్కాలిక పండుగ ఆఫర్‌లు బాలెనో వంటి చిన్న కార్లపై ఉన్న శాశ్వత జీఎస్టీ 2.0 ధర తగ్గింపుపై అదనంగా లభిస్తున్నాయి. ఇది కస్టమర్లకు డబుల్​ బెనిఫిట్ అని చెప్పుకోవాలి.