మొదటి కారు కొనే ముందు ఈ విషయాలు తెలుసుకోకపోతే నష్టపోతారు!

జీవితంలో సొంత కారు అనేది చాలా మంది కల! రూపాయి, రూపాయి కూడబెట్టి కొత్త కారు కొంటుంటారు. అయితే, ఒక్కోసారి కష్టార్జితంతో కొన్న మొదటి కారు తమకు సూట్​ అవ్వడం లేదని, కొనుగోలు చేసిన తర్వాత తెలుస్తుంటుంది. అటు అమ్మలేక, ఇటు ఇంకో కారు కొనలేక ఇబ్బంది పడుతుంటారు. ఇలాంటి సమస్యలు రాకూడదంటే, కారు కొనే ముందే కొన్ని జాగ్రత్తలు తీసుకోవాలి. కొన్ని టిప్స్​ పాటించి, మనకి నచ్చే, మనకి సూట్​ అయ్యే కారును ఎంపిక చేసుకోవాలి. అది ఎలా అంటే..

మొదటి కారు కొనే ముందు ఇవి తెలుసుకోండి..

1. బడ్జెట్​ ఫిక్స్​ చేసుకోండి- మార్కెట్​లో రూ. 3లక్షల నుంచి రూ. కోటి వరకు, అంత కన్నా ఎక్కువ ధరకు కూడా కార్లు అందుబాటులో ఉన్నాయి. వాటిల్లో ఒకటి ఎంపిక చేసుకోవాలంటే, ముందు మనం మన బడ్జెట్​ గురించి తెలుసుకోవాలి. ఎంత వరకు ఖర్చు చేయగలము? మన స్తోమత ఏంటి? అని చూసుకోవాలి. ఒక నెంబర్​ ఫిక్స్​ చేసుకుని, అప్పుడు ఆ ప్రైజ్​ పాయింట్​లో కార్లను చూడాలి. మరీ ముఖ్యంగా మీరు షోరూమ్​కి వెళితే, మీ ప్రైజ్​ పాయింట్​ కన్నా ఇంకాస్త ఎక్కువ ధర కలిగిన వాహనాలు చూపించి, వాటిల్లో ఇంకా ఫీచర్స్​ ఉంటాయని మీకు చెబుతుంటారు. తొందరపాటులో మీరు కొనేస్తారు. ఇలా జరగకూడదంటే, అనుకున్న బడ్జెట్​పైనే మీరు నిలబడాలి.

2. ఎలాంటి కారు కావాలి?- మార్కెట్​లో పెట్రోల్​, డీజిల్​, సీఎన్జీ, హైబ్రీడ్​, ఎలక్ట్రిక్​ వంటి ఆప్షన్స్​ ఉన్నాయి. మొదటి కారు కొనే ముందు అసలు మీ అవసరానికి ఏది సూట్​ అవుతుందో చూసుకోండి. డీజిల్​ ఆప్షన్​ కనుమరుగైపోతున్న కాలం ఇది. పెట్రోల్​ ధరలు ఎక్కువగానే ఉంటున్నాయి. రోజూ ఎక్కువ దూరాలు ప్రయాణిస్తారనిపిస్తే సీఎన్జీ ప్రిఫర్​ చేయొచ్చు అని నిపుణులు అంటున్నారు. పెట్రోల్​ కన్నా దీని మెయిన్​టైనెన్స్​, ఫ్యూయెల్​ ధరలు తక్కువ! ఇక మార్కెట్​లో ఇప్పుడు ఎలక్ట్రిక్​ వాహనాలకు సూపర్​ డిమాండ్​ కనిపిస్తోంది. మొదట్లో కాస్త ఎక్కువ ఖర్చు చేయాల్సి వచ్చినా, లాంగ్​ రన్​లో ఈవీలతో ఖర్చులు చాలా తక్కువగా ఉంటుండటం ఇందుకు కారణం. మీ దగ్గర ఛార్జింగ్​ ఇన్​ఫ్రాస్ట్రక్చర్​ మెరుగ్గా ఉంటే ఎలక్ట్రిక్​ కారును ప్రిఫర్​ చేయొచ్చు.

3. బాడీ టైప్​ ఏది ఇష్టం- మార్కెట్​లో హ్యాచ్​బ్యాక్​, సెడాన్​, ఎస్​యూవీ, ఎంపీవీ, క్రాసోవర్​, కూపే ఎస్​యూవీ వంటి అనేక ఆప్షన్స్​ ఉన్నాయి. మీకు, మీ కుటుంబానికి సరిపోయే విధంగా ఉండే ఆప్షన్​ని ఎంచుకోండి. హ్యాచ్​బ్యాక్​, చిన్న ఎస్​యూవీలకు పెద్దగా స్పేస్​ అవసరం లేదు. పెద్ద ఎస్​యూవీలు, సెడాన్​లకు కాస్త స్పేస్​ అవసరం పడుతుంది. సెడాన్​తో లగ్జరీ ఫీల్​ వస్తే, ఎస్​యూవీతో అగ్రెసివ్​, బోల్డ్​ లుక్​ వస్తుంది.

4. ఇంజిన్​- ఇది కారుకు గుండె లాంటిది. పవర్​, టార్క్​ ఎక్కువ ఉన్న ఇంజిన్​ ఎంచుకుంటే, అప్​లో మూమెంట్​ బాగుంటుంది, బండి స్పీడ్​ ఎక్కువ ఉంటుంది. తక్కువ కెపాసిటీ ఇంజిన్​లో మైలేజ్​ ఎక్కువగా ఉంటుంది అన్నది నిజం కాదు. అన్ని సమస్యలను తీర్చేందుకు ఈ మధ్య టర్బోఛార్జ్​డ్​ ఇంజిన్​లు వస్తున్నాయి.

5. ట్రాన్స్​మిషన్​- మొదటి కారు కొనే ముందు కచ్చితంగా చూడాల్సిన విషయాల్లో ట్రాన్స్​మిషన్​ ఒకటి. మీకు మేన్యువల్​ కారు కావాలా? లేక ఆటోమెటిక్​ కావాలా? అన్నది తెలుసుకోండి. నగరాల్లో జీవిస్తుంటే, ట్రాఫిక్​ సమస్యలతో ఇబ్బంది పడకూడదంటే ఆటోమెటిక్​ బెస్ట్​! కానీ డ్రైవింగ్​ ఫీల్​ కోసం చాలా మంది మేన్యువల్​ని ప్రిఫర్​ చేస్తుంటారు.

6 క్యాబిన్​ ఫీచర్స్​- ఎంత ఎక్కువ ఖర్చు చేస్తే, అంత ఎక్కువ కంఫర్ట్​ లభిస్తుంది. ఇటీవలి కాలంలో కారు క్యాబిన్​లో అనేక కంఫర్ట్​ ఫీచర్స్​ వస్తున్నాయి. అవన్నీ కావాలనుకుంటే టాప్​-ఎండ్​ మోడల్​ ఎంచుకోవాలి. కొన్నింటిని, అవసరం లేని ఫీచర్స్​ని వదులుకోగలిగితే, వాల్యూ ఫర్​ మనీ వేరియంట్లను ప్రిఫర్​ చేయొచ్చు. ఫీచర్స్​ అనేవి మీ ఇష్టాలపై ఆధారపడి ఉంటాయి. కొన్ని కచ్చితంగా ఉండాలి, కొన్ని అవసరం లేదు.

7. సేఫ్టీ ఫీచర్స్​- మొదటి కారు కొనే ముందు ఏం చూసినా, చూడకపోయినా.. సేఫ్టీ ఫీచర్స్​ని కచ్చితంగా చూడాలి. ఇది చాలా చాలా ముఖ్యం. కుంటుబంతో లేదా ఫ్రెండ్స్​తో లేదా సొంతంగా ప్రయాణిస్తున్నా.. మన భద్రత చాలా కీలకం. ఎయిర్​బ్యాగులు,ఏడీఏఎస్​ ఫీచర్స్​ని చెక్​ చేయండి. ఇతర కార్లతో కంపేర్​ చేయండి.

8. ఓనర్​షిప్​ కాస్ట్​- రీసేల్​ వాల్యూ- ఈ రెండూ చాలా ముఖ్యం. కారు కొనడమే కాదు, దాని తర్వాత, దాని మెయిన్​టైనెన్స్​కి ఎంత ఖర్చు అవుతోందో కూడా లెక్కేసుకోవాలి. రెండు కార్లను కంపేర్​ చేసే సమయంలో దీనిని కచ్చితంగా పరిగణలోకి తీసుకోవాలి. అంతేకాదు, బండి రీసేల్​ వాల్యూ ఎంత ఉంటుంది అనేది కూడా పరిగణలోకి తీసుకోవాలి. ఇది కారు మేన్యుఫ్యాక్చరర్​ బట్టీ మారుతుంటుంది.

9. టెస్ట్​ డ్రైవ్​- చివరిగా.. కారు కొనే ముందు షోరూమ్​కి వెళ్లి కచ్చితంగా టెస్ట్​ డ్రైవ్​ చేయాలి. మీరు కంఫర్ట్​గా ఉన్నారా? లేదా? అనేది చూసుకోవాలి. ఆ కారు మీకు సూట్​ అవుతుందా? లేదా? అనేది తెలుసుకోవాలి.