కేఎల్ రాహుల్ కార్ల కలెక్షన్ మామూలుగా లేదుగా.. ఈ క్రికెటర్ గ్యారేజ్‌లో లగ్జరీ కార్లు!

భారత క్రికెట్ జట్టులో అత్యుత్తమ ఆటగాళ్లలో ఒకడు కేఎల్ రాహుల్. తన ఆటతో అందరికీ దగ్గరయ్యాడు. తన వ్యక్తిత్వంతో లక్షలాది మంది అభిమానులను కూడా సంపాదించుకున్నాడు. బ్యాటింగ్, వికెట్ కీపింగ్‌తో ఆకట్టుకునే ఈ స్టార్ క్రికెటర్‌కు చాలా మంది ఫ్యాన్స్ ఉన్నారు. ప్రస్తుతం ఐపీఎల్‌లో దిల్లీ క్యాపిటల్స్ తరఫున ఆడుతున్నాడు కేఎల్ రాహుల్. ఈ ఆటగాడికి లగ్జరీ కార్లు అంటే చాలా ఇష్టం. అతని గ్యారేజ్‌లో ఏమేం ఉన్నాయో చూద్దాం..

రేంజ్ రోవర్ వెలార్

చాలా మంది సెలబ్రిటీల మాదిరిగానే కేఎల్ రాహుల్ కూడా ఎస్‌యూవీల పట్ల ప్రత్యేక అభిమానాన్ని కలిగి ఉన్నాడు. రేంజ్ రోవర్ వెలార్‌లో 5.0-లీటర్ సూపర్‌ఛార్జ్డ్ V8 ఇంజన్, 8-స్పీడ్ ఆటోమేటిక్ ట్రాన్స్‌మిషన్ ఉన్నాయి. ఈ కారు చాలా బాగుంటుంది.

మెర్సిడెస్ C43 AMG

రాహుల్ తన తొలి లగ్జరీ కార్ల జాబితాలో జర్మన్ మెర్సిడెస్-AMG C43ని కూడా చేర్చాడు. ఈ కారు సి-క్లాస్ మోడల్, 3.0 లీటర్ వీ6 బిటుర్బో ఇంజన్ కలిగి ఉంది. దాదాపు 385 బిహెచ్‌పీ పవర్, 520 ఎన్ఎమ్ టార్క్ ఉత్పత్తి చేస్తుంది. ఈ కారు 0 నుండి 100 కి.మీ/గం వేగాన్ని చేరుకోవడానికి కేవలం 4.7 సెకన్లు పడుతుంది. దాని ధర దాదాపు రూ.75 లక్షలు.

లంబోర్గిని హురాకాన్ స్పైడర్

రాహుల్ గ్యారేజీలో ప్రధాన ఆకర్షణలలో ఒకటి లంబోర్గిని హురాకాన్ స్పైడర్. ఈ రెండు సీట్ల ఐకానిక్ స్పోర్ట్స్ కారు 5.2-లీటర్ V10 ఇంజన్, 7-స్పీడ్ డ్యూయల్-క్లచ్ ట్రాన్స్‌మిషన్‌తో పనిచేస్తుంది. దాని వేగం, డిజైన్, ధ్వనితో ఈ కారు చాలా మందికి ఇష్టం. దీని ధర కూడా కోట్లలోనే ఉంటుంది.

బీఎండబ్ల్యూ ఎక్స్7

రాహుల్ లగ్జరీ ఎస్‌యూవీలలో మరొక ప్రసిద్ధ ఎంపిక బీఎండబ్ల్యూ ఎక్స్7. ఈ కారులోని 3.0-లీటర్ డీజిల్, పెట్రోల్ ఎం స్పోర్ట్ ట్రిమ్‌లలో ఒకదాన్ని రాహుల్ కలిగి ఉన్నాడు. డీజిల్ వెర్షన్ 265 హెచ్‌పి పవర్, 620 ఎన్ఎమ్ టార్క్ ఉత్పత్తి చేయగా పెట్రోల్ వెర్షన్ 340 హెచ్‌పీ పవర్, 450 ఎన్ఎమ్ టార్క్ ఉత్పత్తి చేస్తుంది. రెండు కార్లు 8-స్పీడ్ ఆటోమేటిక్ గేర్‌బాక్స్‌తో వస్తాయి.

ఆస్టన్ మార్టిన్ డీబీ11

రాహుల్ గ్యారేజీలో ఉన్న అత్యంత క్లాసీ, శక్తివంతమైన కార్లలో ఇది ఒకటి. బ్రిటిష్ కంపెనీ నుండి వచ్చిన ఈ డీబీ11 కారు 5.2-లీటర్ ట్విన్-టర్బోచార్జ్డ్ వీ12 ఇంజిన్‌తో పనిచేస్తుంది. 8-స్పీడ్ ఆటోమేటిక్ ట్రాన్స్‌మిషన్‌ను కలిగి ఉంది. ఈ కారు దాని శక్తి, డిజైన్, విలాసవంతమైన ఇంటీరియర్‌తో అద్భుతంగా ఉంటుంది. దీని ధర దాదాపు రూ.3.79 కోట్లు.

ఆడి ఆర్8

ఈ ఆడి ఆర్‌8 కూడా కేఎల్ రాహుల్ కార్ల సేకరణలో ప్రత్యేక స్థానాన్ని కలిగి ఉంది. పెద్ద వీ10 ఇంజిన్ కలిగినది ఈ కారు. దాని డ్యూయల్-క్లచ్ ట్రాన్స్మిషన్, క్వాట్రో సిస్టమ్ కలయిక కారణంగా ఇది 600 హెచ్‌పీ కంటే ఎక్కువ శక్తిని ఉత్పత్తి చేస్తుంది.