LPG cylinder : నూతన ఆర్థిక ఏడాది మొదటి రోజే గుడ్​ న్యూస్​! తగ్గిన ఎల్​పీజీ సిలిండర్​ ధర..

నూతన ఆర్థిక సంవత్సరం మొదటి రోజే ప్రజలకు గుడ్​ న్యూస్​ అందింది! ఎల్​పీజీ గ్యాస్​ సిలిండర్​ ధరలను చమురు మార్కెటింగ్​ సంస్థలు తగ్గించాయి. తాజా ప్రకటన ప్రకారం.. 19 కిలోల కమర్షియల్ ఎల్​పీజీ సిలిండర్ ధర రూ .41 దిగొచ్చింది. ఫలితంగా నేడు దేశవ్యాప్తంగా ఈ సిలిండర్ చౌకగా మారింది.

ఇండియన్ ఆయిల్ విడుదల చేసిన తాజా ప్రకటన ప్రకారం, దేశ రాజధాని దిల్లీలో 19 కిలోల ఎల్​పీజీ సిలిండర్ ఏప్రిల్ 1 నుంచి రూ .41 తగ్గి రూ .1762కు చేరుకుంది. అంతకుముందు మార్చ్​లో ఇది రూ.1803గా ఉంది. అదే సమయంలో పాట్నాలో రూ.2031గా ఉంది. 

కోల్​కతాలో మార్చ్​లో 19 కేజీల కమర్షియల్ సిలిండర్ ధర రూ.1913గా ఉంది. నేడు రూ.44.50 తగ్గి రూ.1868.50కి చేరింది. ముంబైలో ఎల్​పీజీ సిలిండర్ ధర రూ.1755.50 నుంచి రూ.1713.50కి తగ్గింది.

మరోవైపు చెన్నైలో కమర్షియల్​ సిలిండర్​ ధర రూ. 1965.50 నుంచి రూ. 1924.50కి దిగొచ్చింది.

ఇక హైదరాబాద్​లో 19 కేజీల కమర్షియల్​ సిలిండర్​ ధర రూ. 44 తగ్గి, రూ. 1,985.50కి చేరింది.

కాగా ఇళ్లల్లో వినియోగించే డొమెస్టిక్​ సిలిండర్​ ధర తగ్గలేదు, పెరగలేదు. స్థిరంగా ఉంది. ఫలితంగా హైదరాబాద్​లో 14.2 కేజీల ఎల్​పీజీ సిలిండర్​ ధర రూ. 855 వద్ద స్థిరంగా కొనసాగుతోంది.

19 కేజీల కమర్షియల్​ ఎల్​పీజీ గ్యాస్​ సిలిండర్​ని రెస్టారెంట్లతో పాటు వాణిజ్య అవసరాల కోసం ఉపయోగిస్తుంటారు. ఈ ధరలు తగ్గితే రెస్టారెంట్లపై భారం తగ్గుతుంది. ఫలితంగా రేట్లు తగ్గించే అవకాశం ఉంటుంది. ఇది కస్టమర్స్​కి మంచి చేస్తుంది.

అంతర్జాతీయ డిమాండ్​ ప్రకారం ఎల్​పీజీ సిలిండర్​ రేట్లను ప్రతి నెల మొదటి రోజున చమురు మార్కెటింగ్​ సంస్థలు సవరిస్తుంటాయి. మార్చ్​ నెలలో 19 కేజీల సిలిండర్​ ధర రూ. 6 పెరిగింది. అంతకముందు నెలలో 9 కేజీల కమర్షియల్​ ఎల్​పీజీ గ్యాస్​ సిలిండర్​ ధరను రూ. 7 తగ్గించాయి.

ఎల్​పీజీ ధరలు రాష్ట్రాన్ని బట్టి మారవచ్చు. ప్రధానంగా స్థానిక పన్నులు, రవాణా ఖర్చులలో వ్యత్యాసం ఇందుకు కారణం.