Citroen Basalt Dark Edition : సూపర్​ స్టైలిష్​ సిట్రోయెన్​ బసాల్ట్​ డార్క్​ ఎడిషన్​ వచ్చేస్తోంది..

ఇటివలి కాలంలో ఇండియాలో “డార్క్​ ఎడిషన్​” కార్లకు మంచి డిమాండ్​ కనిపిస్తోంది. దీన్ని క్యాష్​ చేసుకునేందుకు ఆటోమొబైల్​ సంస్థలు తమ బెస్ట్​ సెల్లింగ్​ మోడల్స్​కి డార్క్​ ఎడిషన్​ని తీసుకొస్తున్నాయి. ఈ జాబితాలోకి సిట్రోయెన్​ కూడా చేరింది. బసాల్ట్​ కూపే ఎస్​యూవీకి డార్క్​ ఎడిషన్​ని సంస్థ ప్లాన్​ చేస్తోంది. ఇది త్వరలోనే లాంచ్​ అయ్యే సూచనలు సైతం కనిపిస్తున్నాయి. రాబోయే బసాల్ట్ డార్క్ ఎడిషన్​ని తన సోషల్ మీడియా హ్యాండిల్స్​లో సంస్థ ఇప్పటికే టీజ్ చేసింది. ఈ నేపథ్యంలో ఈ మోడల్​పై ఇప్పటివరకు ఉన్న వివరాలను ఇక్కడ తెలుసుకోండి..

సిట్రోయెన్​ బసాల్ట్​ డార్క్​ ఎడిషన్​..

సిట్రోయెన్ బసాల్ట్ గత సంవత్సరం ప్రారంభంలో ఇండియా స్పెసిఫిక్ సీ-క్యూబ్ ప్లాట్​ఫామ్ కింద మూడవ మోడల్​గా విడుదలైంది. ఇటీవల విడుదలైన టీజర్.. సిట్రోయెన్ బసాల్ట్ డార్క్ ఎడిషన్ మొత్తం నలుపు రంగు ఎక్స్​టీరియర్​ని పొందుతుందని, క్రోమ్ బిట్స్ స్థానంలో డార్క్ క్రోమ్ ఎలిమెంట్స్ ఉంటాయని సూచిస్తోంది. అంటే ఫ్రెంట్ గ్రిల్​లోని క్రోమ్ స్లాట్స్, సిట్రోయెన్, బసాల్ట్ బ్యాడ్జీలు డార్క్ క్రోమ్ కలర్ థీమ్​ను పొందుతాయి. ఇది కాకుండా, డ్యూయెల్ టోన్ 16 ఇంచ్​ అల్లాయ్ వీల్స్ యథాతథంగా ఉంటాయని టీజర్​ని చూస్తే తెలుస్తోంది.

సిట్రోయెన్ బసాల్ట్ డార్క్ ఎడిషన్: ఇంటీరియర్..

సిట్రోయెన్​ బసాల్ట్​ కూపే ఎస్​యూవీ డార్క్​ ఎడిషన్​ లోపల డార్క్ థీమ్ కొనసాగుతుంది. ఈ టీజర్​లో బ్లాక్ అప్​హోలిస్టరీతో కూడిన మొత్తం బ్లాక్ ఇంటీరియర్​ను చూపించారు. ఇది కాకుండా, బసాల్ట్ బ్లాక్ ఎలిమెంట్స్​తో అదే ఇంటీరియర్ లేఔట్​ను నిలుపుకుంటుందని భావిస్తున్నారు. దీని అర్థం డ్యాష్​బోర్డు గోధుమ- బ్రాంజ్ కలర్ థీమ్​కు బదులుగా సింగిల్ టోన్ బ్లాక్ లేఔట్​ను కలిగి ఉంటుందని భావిస్తున్నారు. ఏసీ కంట్రోల్ కోసం స్విచ్​లను కూడా డార్క్ క్రోమ్​ ఫినిష్ చేసే అవకాశం ఉంది.

కొత్త వాహనంలో ఫీచర్ల పరంగా ఎలాంటి మార్పులు చేసే అవకాశం లేదు! బసాల్ట్​లో వైర్​లెస్ యాపిల్ కార్​ప్లే, ఆండ్రాయిడ్ ఆటోతో కూడిన 10.25 ఇంచ్​ టచ్​స్క్రీన్ ఇన్ఫోటైన్​మెంట్ సిస్టెమ్, ఆటోమేటిక్ క్లైమేట్ కంట్రోల్ ఉన్నాయి. భద్రత విషయానికొస్తే.. ఈ కూపే ఎస్​యూవీలో స్టాండర్డ్​గా ఆరు ఎయిర్ బ్యాగులు, ఈఎస్​సీ, పార్కింగ్ సెన్సార్లతో కూడిన రేర్ పార్కింగ్ కెమెరా, టైర్ ప్రెజర్ మానిటరింగ్ సిస్టమ్ (టీపీఎంఎస్) ఉన్నాయి.

సిట్రోయెన్ బసాల్ట్ డార్క్ ఎడిషన్: స్పెసిఫికేషన్లు..

సిట్రోయెన్ బసాల్ట్ డార్క్ ఎడిషన్ టాప్ స్పెక్ వేరియంట్​కు పరిమితం కానుంది! అంటే బసాల్ట్ డార్క్ ఎడిషన్ 1.2-లీటర్ 3 సిలిండర్​, టర్బో పెట్రోల్ ఇంజిన్​తో వస్తుంది. ఇది 109 బీహెచ్​పీ పవర్​ని జనరేట్​ చేస్తుంది. ట్రాన్స్​మిషన్​ ఆప్షన్స్​లో 6-స్పీడ్ మాన్యువల్, టార్క్ కన్వర్టర్ ఆటోమేటిక్ ఉంటాయి. టర్బో పెట్రోల్ ఆటోమేటిక్ లీటరుకు 18.7 కిలోమీటర్ల మైలేజ్ ఇస్తుంది.

ఇక లాంచ్​ టైమ్​కి ఈ సిట్రోయెన్​ బసాల్ట్​ కూపే ఎస్​యూవీ డార్క్​ ఎడిషన్​పై మరిన్ని వివరాలు అందుబాటులోకి వస్తాయి. అంతేకాదు, సిట్రోయెన్ సీ3 ఎయిర్​క్రాస్, సీ3 కూడా ఈ ఏడాది చివరిలో డార్క్ ఎడిషన్​ని పొందే అవకాశం ఉందని తెలుస్తోంది.