సిటీ డ్రైవ్​కి ఈ ఎలక్ట్రిక్​ స్కూటర్లు బెస్ట్​- లాంగ్​ రేంజ్​ వల్ల డబ్బులు ఆదా!

నగరాల్లో రోజురోజుకు పెరిగిపోతున్న ట్రాఫిక్​ సమస్యలతో వాహనాలు సరైన మైలేజ్​ ఇవ్వడం లేదు. ఫలితంగా పెట్రోల్​ ఖర్చులు బాగా పెరిగిపోతున్నాయి. ఈ నేపథ్యంలో చాలా మంది ఎలక్ట్రిక్​ 2 వీలర్లవైపు అడుగులు వేస్తున్నారు. మరి మీరు కూడా ఒక మంచి ఎలక్ట్రిక్​ స్కూటర్​ కొనాలని ప్లాన్​ చేస్తున్నారా? అయితే ఇది మీకోసమే! సిటీ డ్రైవ్​ కోసం మార్కెట్​లో అందుబాటులో ఉన్న కొన్ని బెస్ట్​​ ఈ-స్కూటర్ల వివరాలను ఇక్కడ తెలుసుకోండి. రేంజ్​ ఎక్కువ ఉండటం వీటి ప్రత్యేకత!

సిటీ డ్రైవ్​కి ఈ ఎలక్ట్రిక్​ స్కూటర్లు బెస్ట్​..

బిగాస్​ సీ12ఐ- ఈ ఎలక్ట్రిక్​ స్కూటర్​లో 2 కేడబ్ల్యూహెచ్​ బ్యాటరీ ప్యాక్​ ఉంటుంది. దీనిని ఒక్కసారి ఛార్జ్​ చేస్తే దాదాపు 125 కి.మీ రేంజ్​ని ఇస్తుంది. ఈ ఈ-స్కూటర్​ టాప్​ స్పీడ్​ 60కేఎంపీహెచ్​. బ్యాటరీపై 36వేల కి.మీలు లేదా 3ఏళ్ల వారెంటీ లభిస్తోంది. ఈ బ్యాటరీని 0-80శాతం​ ఛార్జ్​ చేసేందుకు కనీసం 3 గంటల 15 నిమిషాల సమయం పడుతుంది. మూడు వేరియంట్లలో ఇది అందుబాటులో ఉంది. ఈ-స్కూటర్​ ఎక్స్​షోరూం ధర రూ. 99,990 నుంచి రూ. 1,29,990 వరకు అందుబాటులో ఉంది.

బజాజ్​ చేతక్​ 3501- బెస్ట్​ సెల్లింగ్​ బజాజ్​ చేతక్​ ఈవీ వేరియంట్స్​లో ఇదొకటి. ఇందులో 3.5 కేడబ్ల్యూహెచ్​ బ్యాటరీ ఉంటుంది. దీనిని 0-80శాతం ఛార్జ్​ చేసేందుకు 3 గంటల సమయం పడుతుంది. ఒక్కసారి ఛార్జ్​ చేస్తే ఇది సుమారు 155 కి.మీ రేంజ్​ని ఇస్తుంది. ఈ వేరియంట్​ ఎక్స్​షోరూం ధర రూ. 1.35 లక్షలుగా ఉంది. టాప్​ స్పీడ్​ 73 కేఎంపీహెచ్​.

టీవీఎస్​ ఐక్యూబ్​- ఇండియాలో సేల్స్​ పరంగా దూసుకెళుతున్న మరో ఎలక్ట్రిక్​ స్కూటర్​ ఈ టీవీఎస్​ ఐక్యూబ్​. టీవీఎస్​ నుంచి అందుబాటులో ఉన్న ఏకైక ఈవీ మోడల్​ ఇది. దీని ఎక్స్​షోరూం ధర రూ. 94,000 నుంచి రూ. 1.31లక్షల వరకు ఉంటుంది. ప్రారంభ ధరలో 94 కి.మీ రేంజ్​ని ఇచ్చే 2.2 కేడబ్ల్యూహెచ్​ బ్యాటరీ ప్యాక్​ మోడల్​ ఉంది. కాగా ఐక్యూబ్​ 3.5 కేడబ్ల్యూహెచ్​ వేరియంట్​ సింగిల్​ ఛార్జ్​తో 145 కి.మీ రేంజ్​ని ఇస్తుంది. దీని టాప్​ స్పీడ్​ 75 కేఎంపీహెచ్​. 0-80శాతం ఛార్జ్​ చేసేందుకు 2 గంటల 45 నిమిషాల సమయం పడుతుంది.

ఏథర్​ రిజ్టా- ఇండియాలో బెస్ట్​ ఫ్యామిలీ ఎలక్ట్రిక్​ స్కూటర్​గా పేరొందిన ఈ ఏథర్​ రిజ్టా.. సిటీ డ్రైవ్​కి కూడా ఉపయోగకరంగా ఉంటుంది. సెగ్మెంట్​లోనే అతిపెద్ద సీటింగ్​ ఫెసిలిటీతో వస్తోంది ఈ ఈ-స్కూటర్​. ఈ ఏథర్​ రిజ్టా ఎలక్ట్రిక్​ స్కూటర్​లో రెండు బ్యాటరీ ప్యాక్​లు​, మూడు వేరియంట్లు ఉన్నాయి. 2.9 కేడబ్ల్యూహెచ్​ బ్యాటరీతో కూడిన రిజ్టా వేరియంట్​ 123 కి.మీ రేంజ్​ని కలిగి ఉంది. ఇక 3.7 కేడబ్ల్యూహెచ్​ బ్యాటరీ ప్యాక్​ని ఒక్కసారి ఛార్జ్​ చేస్తే సుమారు 160 కి.మీ వరకు రేంజ్​ని అందిస్తుంది. ఏథర్​ రిజ్టా ఎక్స్​షోరూం ధర రూ. 1.04 లక్షల నుంచి రూ. 1.42లక్షల వరకు ఉంటుంది.

అల్ట్రావయొలెట్​ టెస్సెరాక్ట్​- ఇదొక లాంగ్​ రేంజ్​ ఎలక్ట్రిక్​ స్కూటర్​. ఇందులో 3 బ్యాటరీ ప్యాక్​ ఆప్షన్స్​ ఉన్నాయి. 3.5 కేడబ్ల్యూహెచ్​ బ్యాటరీతో 162 కి.మీ రేంజ్​ లభిస్తుంది. 5 కేడబ్ల్యూహెచ్​ బ్యాటరీ ప్యాక్​ని ఒక్కసారి ఛార్జ్​ చేస్తే 220 కి.మీ వరకు రేంజ్​ని ఇస్తుంది. ఇక 6 కేడబ్ల్యూహెచ్​ బ్యాటరీ ప్యాక్​ని ఛార్జ్​ చేస్తే 261 కి.మీ వరకు ప్రయాణించగలదు. ఈ మూడింటి ఎక్స్​షోరూం ధరలు వరుసగ రూ. 1.20లక్షలు, రూ. 1.70 లక్షలు, రూ. 2లక్షలు.