Subsidy spends: 9 నెలల్లో సబ్సిడీల కోసం కేంద్రం పెట్టిన ఖర్చులో సగానికి పైగా ఆహార సబ్సీడీకే..

Subsidy spends: 2025 ఆర్థిక సంవత్సరంలో ఇప్పటివరకు ప్రభుత్వం సబ్సిడీల కోసం మొత్తం రూ .3.07 లక్షల కోట్లు ఖర్చు చేసింది. అందులో ఆహార సబ్సిడీలే 50 శాతం పైగా ఉన్నాయి. బ్యాంక్ ఆఫ్ బరోడా నివేదిక ప్రకారం, 2025 ఆర్థిక సంవత్సరం మొదటి తొమ్మిది నెలల్లో ప్రభుత్వం చేసిన మొత్తం సబ్సిడీ వ్యయంలో ఆహార సబ్సిడీ 50 శాతానికి పైగా ఉంది.

గత సంవత్సరం కన్నా ఎక్కువ

ఈ ఆర్థిక సంవత్సరం మొదటి 9 నెలల్లో మొత్తం సబ్సీడీ వ్యయం రూ.3.07 లక్షల కోట్లు. గత ఆర్థిక ఏడాది ఇదే సమయంలో కేంద్రం ఖర్చు చేసిన దానికంటే ఇది చాలా ఎక్కువ. 2024 ఆర్థిక సంవత్సరం మొదటి తొమ్మిది నెలల్లో కేంద్ర ప్రభుత్వ సబ్సిడీ వ్యయం రూ.2.77 లక్షల కోట్లుగా ఉంది. అయితే, 2022 ఆర్థిక సంవత్సరం ఏప్రిల్-డిసెంబర్ లో ఖర్చు చేసిన రూ .3.51 లక్షల కోట్ల కంటే ఇది తక్కువగానే ఉంది.

ఆహార సబ్సిడీల ఖర్చు

ప్రభుత్వం మొత్తం సబ్సిడీ వ్యయంలో ఆహార సబ్సిడీల ఖర్చు చాలా ఎక్కువ. బ్యాంక్ ఆఫ్ బరోడా నివేదిక ప్రకారం 2025 ఆర్థిక సంవత్సరంలో ఇప్పటివరకు కేంద్రం ఆహార సబ్సిడీల కోసం రూ .1.64 లక్షల కోట్లు కేటాయించింది. ఇది గత ఏడాది ఇదే కాలంలో వెచ్చించిన రూ .1.34 లక్షల కోట్లతో పోలిస్తే ఎక్కువ, కానీ 2022 ఏప్రిల్-డిసెంబర్లో నమోదైన రూ .1.68 లక్షల కోట్ల కంటే కొంచెం తక్కువ.

తగ్గిన ఎరువుల సబ్సిడీ వ్యయం

ప్రభుత్వం ఆహార సబ్సిడీలపై వ్యయాన్ని పెంచినప్పటికీ, ఎరువుల విషయంలో పరిస్థితి భిన్నంగా ఉంది. 2025 ఆర్థిక సంవత్సరంలో ఇప్పటివరకు ఎరువుల సబ్సిడీలపై వ్యయం కొద్దిగా తగ్గింది. 2024 ఏప్రిల్-డిసెంబర్ మధ్య ప్రభుత్వం ఎరువుల సబ్సిడీల కోసం రూ .1.36 లక్షల కోట్లు ఖర్చు చేసింది. అంతకుముందు సంవత్సరంలో రూ .1.41 లక్షల కోట్లు, 2022 ఏప్రిల్-డిసెంబర్ లో రూ .1.81 లక్షల కోట్లు కేంద్రం ఖర్చు చేసింది.

నివేదికలోని ఇతర ముఖ్యాంశాలు

• ఆస్తుల అమ్మకాలు, పెట్టుబడుల ఉపసంహరణ ద్వారా వచ్చే ఆదాయంతో సహా ప్రభుత్వ రుణేతర మూలధన రాబడులు క్షీణించాయి.
• ఈ రాబడులు 2024 డిసెంబర్ నాటికి రూ .27,296 కోట్లుగా ఉంది. 2023 ఆర్థిక సంవత్సరంలో డిసెంబర్ నాటికి వచ్చిన రాబడి రూ .29,650 కోట్ల కన్నా, 2022 ఆర్థిక సంవత్సరం డిసెంబర్ నాటికి వచ్చిన రాబడి రూ. 55,107 కోట్ల కంటే చాలా తక్కువగా ఉంది. ఇది బలహీనమైన ఆదాయాలను, రుణేతర వనరుల ద్వారా నిధులను సృష్టించలేకపోవడాన్ని సూచిస్తుంది.
• భారత్ లోకి విదేశీ ప్రత్యక్ష పెట్టుబడుల (FDI) ప్రవాహం బలహీనపడింది. 2024 అక్టోబర్ లో 4.3 బిలియన్ డాలర్ల ఎఫ్ డీఐ లు రాగా, 2024 నవంబర్లో 2.4 బిలియన్ డాలర్ల ఎఫ్డీఐలు వచ్చాయి. భారత స్టాక్ మార్కెట్ నుంచి విదేశీ ఇన్వెస్టర్ల అమ్మకాలు పెరగడం, దేశంలోకి వచ్చే మొత్తం పెట్టుబడులపై ఒత్తిడిని పెంచిందని నివేదిక పేర్కొంది.