Bluesky: ‘ఎక్స్’ ను వదిలి ‘బ్లూస్కై’ కి తరలివెళ్తున్న యూజర్లు; ఎలాన్ మస్క్ కు గట్టి పోటీనే..

Bluesky vs X: మైక్రోబ్లాగింగ్ ప్లాట్ ఫామ్ బ్లూస్కై వేగంగా ప్రపంచ నెటిజనుల దృష్టిని ఆకర్షిస్తోంది. భారతదేశంలో కూడా ప్రస్తుతం అది ట్రెండింగ్ టాపిక్ ల ర్యాంకులను అధిరోహిస్తోంది. ఎలాన్ మస్క్ కు చెందిన ఎక్స్ (గతంలో ట్విట్టర్) పట్ల ప్రజల్లో అసంతృప్తి తీవ్రమవుతున్న నేపథ్యంలో , బ్లూస్కై వినియోగదారుల సంఖ్యలో గణనీయమైన పెరుగుదల నమోదవుతోంది.

ట్రంప్ గెలుపుతో..

మస్క్ రాజకీయ సంబంధాలు, ముఖ్యంగా ట్రంప్ ప్రచారంలో అతడు పోషించిన సలహాదారు పాత్ర, ట్రంప్ నకు ఆర్థికంగా అందించిన తోడ్పాటు చాలామంది అమెరికన్లకు నచ్చలేదు. అంతేకాదు, ఎక్స్ ప్లాట్ ఫామ్ లోని వివాదాస్పద కంటెంట్ మోడరేషన్ విధానాలపై కూడా వ్యతిరేకత వ్యక్తమవుతోంది. యూజర్ల ఆందోళనలలో నిషేధిత ఖాతాల పునరుద్ధరణ కూడా ఒకటి. ఇది ఎక్స్ మోడరేషన్ వ్యవస్థపై నమ్మకాన్ని బలహీనపరుస్తుందని చాలా మంది వాదిస్తున్నారు.

బ్లూస్కై అంటే ఏమిటి?

ట్విట్టర్ కు గట్టి ప్రత్యామ్నాయాన్ని ఏర్పాటు చేసే లక్ష్యంతో 2019 లో జాక్ డోర్సే బ్లూస్కై (Bluesky) ప్లాట్ ఫామ్ ని స్థాపించారు. మొదట్లో ఇది ‘ఇన్వైట్ - ఓన్లీ’ ప్లాట్ ఫామ్ గా మాత్రమే ఉండేది. ఈ సంవత్సరం 2024 ప్రారంభం నుంచి అందరికీ అందుబాటులోకి వచ్చింది. ‘‘సీఈఓ జే గ్రాబర్ నాయకత్వంలో, బ్లూస్కై ఒక పబ్లిక్ బెనిఫిట్ కార్పొరేషన్ గా పనిచేస్తుంది. సోషల్ మీడియాను యథాతథంగా అందించడంపై దృష్టి పెడుతుంది’’ అని జాక్ డోర్సే స్పష్టం చేశారు.

బ్లూస్కై ప్రత్యేకతలు

బ్లూస్కై ముఖ్య లక్షణాల్లో ఒకటి దాని వికేంద్రీకృత ఫ్రేమ్ వర్క్. కార్పొరేట్ యాజమాన్యంలోని సర్వర్లలో డేటాను కేంద్రీకరించే ఇతర సాంప్రదాయ సోషల్ మీడియా ప్లాట్ ఫామ్ ల మాదిరిగా కాకుండా, బ్లూస్కై (Bluesky) వినియోగదారు డేటాను నిల్వ చేయడానికి స్వతంత్ర సర్వర్లను ఉపయోగిస్తుంది. ఇది భాగస్వామ్య కమ్యూనిటీ విలువలు, కంటెంట్ నియమాల ఆధారంగా సర్వర్లలో చేరడానికి లేదా సృష్టించడానికి వినియోగదారులను అనుమతిస్తుంది. ఇది మరింత నియంత్రణ, గోప్యతను అందిస్తుంది.

కీలక ఫీచర్లు, డిజైన్

బ్లూస్కై ట్విట్టర్ ప్రారంభమైన మొదట్లో ఎలా ఉండేదో బ్లూస్కై ఇప్పుడు అలా ఉందని కొందరు వినియోగదారులు అభిప్రాయపడ్డారు. కానీ బ్లూస్కై సరళత, వినియోగదారు స్వయంప్రతిపత్తికి ప్రాధాన్యత ఇస్తుందని కంపెనీ చెబుతోంది. వినియోగదారులు ఈ ప్లాట్ ఫామ్ ద్వారా సంక్షిప్త సందేశాలు, ఫోటోలు, వీడియోలను పోస్ట్ చేయవచ్చు, అలాగే ప్రత్యక్ష సందేశాలను పంపవచ్చు. కంటెంట్ ను ప్రదర్శించడానికి అల్గారిథమిక్ ఫీడ్ లను ఉపయోగించే X మాదిరిగా కాకుండా, బ్లూస్కై లో వినియోగదారుల అనుసరించే ఖాతాల నుండి వచ్చే పోస్ట్ లు మాత్రమే ఆ వినియోగదారులకు కనిపిస్తాయి. X అల్గోరిథం ఆధారిత కంటెంట్, దాని అధిక ఫీడ్ తో విసుగు చెందిన వినియోగదారులకు బ్లూస్కై మంచి ప్రత్యామ్నాయంగా కనిపిస్తోంది.

యూజర్లు ఎందుకు మారుతున్నారు?

ముఖ్యంగా 2024 అమెరికా ఎన్నికల సమయంలో ట్రంప్ (Donald trump) కు మస్క్ బహిరంగంగా మద్దతు ఇచ్చిన నేపథ్యంలో ఎక్స్ పై యూజర్లలో అసంతృప్తి పెరగడం ప్రారంభమైంది. అది బ్లూస్కై (Bluesky) యూజర్ బేస్ పెరగడానికి దోహదపడుతోంది. ఎక్స్ (X) విధానాలు, మస్క్ (elon musk) తీరు నచ్చని వారు ఇప్పుడు బ్లూస్కై యాప్ ను ప్రమోట్ చేస్తున్నారు. ఎక్స్ రాజకీయ పక్షపాతం, అస్థిరమైన మోడరేషన్ విధానాల వల్ల యూజర్లు ఎక్స్ కు దూరమవుతున్నారు. సింగర్ లిజ్జో, నటులు బెన్ స్టిల్లర్, జామీ లీ కర్టిస్ వంటి హై-ప్రొఫైల్ వినియోగదారులు బ్లూస్కై లో చేరారు. ఇది దాని విజిబిలిటీ, ఆకర్షణను పెంచింది. ప్రైవసీ, పారదర్శకత, యూజర్ కంట్రోల్ కు ఈ ప్లాట్ ఫామ్ ప్రాధాన్యమిస్తున్నందున యూజర్ బేస్ పెరుగుతూనే ఉంటుందని భావిస్తున్నారు.