మీకు బ్యాంకులో ఫిక్స్‌డ్ డిపాజిట్ ఉందా? ఈ పని చేయకపోతే 20 శాతం ట్యాక్స్

మీకు బ్యాంకులో పెద్ద మొత్తంలో ఫిక్స్‌డ్ డిపాజిట్ ఉందా? దీని ద్వారా మీకు వడ్డీ ఆదాయం వస్తుందా? మీరు ఆదాయపు పన్ను పరిధిలోకి రాకపోయినా మీ వడ్డీ ఆదాయం నిర్దేశించిన పరిమితిని మించి ఉంటే 20 శాతం ట్యాక్స్ కట్టాల్సి ఉంటుంది. అయితే, ఈ పనిని పూర్తి చేయడం ద్వారా మీరు పన్నులను నివారించవచ్చు.

సెల్ఫ్ డిక్లరేషన్ ఫామ్స్

మీరు మీ ఎఫ్‌డీ ఉంచిన బ్యాంకుకు ఫారం 15G, ఫారం 15H సమర్పించడం ద్వారా వడ్డీ ఆదాయంపై టీడీఎస్‌ని నివారించవచ్చు. ఇవి సెల్ఫ్ డిక్లరేషన్ ఫామ్స్. ఈ ఫారమ్‌లను సమర్పించే వారికి టీడీఎస్ కట్ కాదు. మీ వడ్డీ ఆదాయం నిర్దేశించిన పరిమితి కంటే ఎక్కువగా ఉండి మీరు ఫారం 15G, ఫారం 15H దాఖలు చేయకపోతే అప్పుడు 20 శాతం పన్ను కట్టాలి.

ఈ పరిమితి మించితే

ఆదాయపు పన్ను చట్టంలోని సెక్షన్ 194A ప్రకారం 60 ఏళ్లు పైబడిన సీనియర్ సిటిజన్లకు ఆర్థిక సంవత్సరంలో రూ.50,000 వరకు వడ్డీ ఆదాయంపై టీడీఎస్ ఉండదు. 60 ఏళ్లలోపు వారికి రూ.40,000 వరకు వడ్డీ ఆదాయంపై టీడీఎస్ మినహాయింపు ఉంది. వడ్డీ ఆదాయం ఈ పరిమితిని మించితే బ్యాంకులు 20 శాతం వరకు టీడీఎస్ వసూలు చేస్తాయి. మీరు పన్ను పరిధిలో లేకుంటే, మీ వడ్డీ ఆదాయం నిర్దేశించిన పరిమితిని మించి ఉంటే బ్యాంకుకు ఫారం 15G లేదా ఫారం 15Hని సమర్పించాలి.

వీరు సబ్మిట్ చేయాలి

ఫారం 15G అనేది 60 సంవత్సరాల కంటే తక్కువ వయస్సు ఉన్న కస్టమర్లు, హిందూ అవిభాజ్య కుటుంబాలు, ట్రస్టులు దాఖలు చేయాల్సిన సెల్ఫ్ డిక్లరేషన్ ఫామ్. 60 ఏళ్లు పైబడిన సీనియర్ సిటిజన్లు ఫారం 15H దాఖలు చేయాలి. ఈ ఫారమ్‌ల ద్వారా తమ ఆదాయాలు ఆదాయపు పన్ను పరిమితిలో ఉన్నాయని ప్రకటించాలి. ఇలా చేస్తే మీ వడ్డీ ఆదాయంపై ఎటువంటి ట్యాక్స్ ఉండదు. ఆర్థిక సంవత్సరం ప్రారంభంలో బ్యాంకులకు ఈ ఫారమ్స్ సమర్పించాలి.