ఎంత ప్రయత్నించినా డబ్బు ఆదా కావడం లేదా? మీరు ఈ 5 విషయాలు ఫాలో కావట్లేదేమో

డబ్బును ఆదా చేయడంలో, పెట్టుబడి పెట్టడంలో చాలా మంది అనేక సమస్యలను ఎదుర్కొంటారు. జీవితంలో ఆర్థిక స్థిరత్వాన్ని సాధించడం చాలా ముఖ్యం. మీరు చేసే ఆర్థిక తప్పుల కారణంగా మీరు డబ్బు ఆదా చేయడం కష్టంగా మారుతుంది. బడ్జెట్ నిర్వహణ సరిగా లేకపోవడం, అధిక క్రెడిట్ కార్డ్ వాడకం, పెట్టుబడుల సరైన సమయంలో పెట్టకపోవడం కారణంగా మీరు ఆదా చేయలేకపోవచ్చు. మీ పొదుపుకు ఆటంకం కలగకుండా ఐదు విషయాలు ఉన్నాయి. అవేంటో చూద్దాం..

1. క్రెడిట్ కార్డులను అతిగా వాడటం తప్పు. క్రెడిట్ కార్డ్ సౌకర్యవంతంగా ఉన్నా.. దానిని అతిగా ఉపయోగించడం వల్ల రుణ భారం ఎక్కువ అవుతుంది. అధిక వడ్డీ రేట్లు, మానసిక ఒత్తిడి, ఆర్థిక నష్టం సంభవించవచ్చు. క్రెడిట్ కార్డులను బాధ్యతాయుతంగా వాడాలి. మీ బిల్లులను సకాలంలో చెల్లించాలి. లేదంటే జరిమానా పడుతుంది.
2. సరైన బడ్జెట్ తయారు చేసుకోవడం చాలా ముఖ్యం. బడ్జెట్ లేకుండా డబ్బు ఖర్చు చేస్తే అది ఎలా పోయిందో ఎక్కడకు పోయిందో మీకు అర్థం కాదు. ఆదాయం, ఖర్చులు, పొదుపుల గురించి స్పష్టమైన అవగాహన ఉండాలి. అప్పుడే డబ్బును సరిగ్గా నిర్వహించగలం. బడ్జెట్ అంటే మీ డబ్బు ఎక్కడికి పోతుందో నిర్ణయించాలి.
3. పెట్టుబడి పెట్టడంలో ఆలస్యం చేయడం తప్పు. మీకు దీర్ఘకాలిక ఆర్థిక లక్ష్యాలు ఉంటే స్టాక్ మార్కెట్, మ్యూచువల్ ఫండ్లలో పెట్టుబడి పెట్టడం మంచిది. తక్కువ వయసులోనే పెట్టుబడి పెట్టడం ప్రారంభిస్తే.. మీరు సద్వినియోగం చేసుకోవచ్చు. మీకు చిన్న వయసులోనే ఎక్కువ మెుత్తంలో డబ్బు తిరిగి వస్తుంది.
4. బీమా కలిగి ఉండటం చాలా ముఖ్యం. ఆరోగ్య, జీవిత బీమా లేకుండా ఉండకూడదు. ఊహించని సంఘటనలు జరిగినప్పుడు మీ పొదుపు ఖాళీ అయిపోతుంది. తీవ్రమైన అనారోగ్యాలు లేదా ఇతర దురదృష్టకర సంఘటనలు సంభవించినప్పుడు బీమా మిమ్మల్ని ఆర్థికంగా రక్షిస్తుంది.
5. ఎమర్జెన్సీ ఫండ్ కలిగి ఉండటం చాలా ముఖ్యం. అత్యవసర పరిస్థితుల్లో ఈ నిధి సహాయం చేస్తుంది. మీ దగ్గర అత్యవసర నిధి లేకపోతే అవసరమైన సమయాల్లో డబ్బు అప్పుగా తీసుకోవలసి ఉంటుంది. వడ్డీ మీ ఆర్థిక భారాన్ని పెంచుతుంది.

పైన చెప్పిన విషయాలు సరిదిద్దుకోవాలి. క్రమశిక్షణతో కూడిన బడ్జెట్ మిమ్మల్ని కష్టాల్లోకి నెట్టదు. క్రెడిట్ కార్డులను తెలివిగా ఉపయోగించడం, పెట్టుబడి ప్రణాళిక మీ ఆర్థిక భద్రతను పెంచుతాయి.