త్వరలోనే మార్కెట్​లోకి కొత్త స్టైలిష్​ స్కూటర్​- ఏప్రిలియా ఎస్​ఆర్​ 175 హైలైట్స్​ ఇవే..

ఇటాలియన్ టూ-వీలర్ తయారీ సంస్థ ఏప్రిలియా భారత మార్కెట్​లో తన స్పోర్టీ స్కూటర్‌ను త్వరలో అప్‌డేట్ చేయడానికి సిద్ధంగా ఉంది. భారతదేశంలో తయారు చేసిన మోటార్‌సైకిళ్లపై ఎక్కువగా దృష్టి సారించిన ఏప్రిలియా, ఈ నెలాఖరులో కొత్త ఏప్రిలియా ఎస్​ఆర్​ 175 స్కూటర్‌ను విడుదల చేయనుంది. ఇప్పటికే ఈ మోడల్ డీలర్‌షిప్‌లకు చేరుకోవడం ప్రారంభించింది. ఎస్​ఆర్​ 175 స్కూటర్​ ప్రస్తుత ఎస్​ఆర్​ 160 స్థానంలో రానుంది. ఇది మరింత శక్తివంతమైన ఇంజిన్‌తో పాటు అదనపు ఫీచర్లను కలిగి ఉంటుందని అంచనాలు ఉన్నాయి.

ఏప్రిలియా SR 175: ఏం ఆశించాలి?

రాబోయే ఏప్రిలియా ఎస్​ఆర్​ 175 స్కూటర్​.. కొత్త గ్రాఫిక్స్, కలర్​ ఆప్షన్స్​ మినహా ఎస్​ఆర్​ 160కి చాలా పోలి ఉంటుంది. కొత్త కలర్​ థీమ్ బ్రాండ్ ఆర్​ఎస్​ 457, ట్యూనో 457 మోటార్‌సైకిళ్ల నుంచి ప్రేరణ పొందినట్లు అనిపిస్తుంది. వీ- ఆకారపు హెడ్‌ల్యాంప్, షార్ప్‌గా డిజైన్ చేసిన ఫ్రంట్ ఏప్రాన్, సైడ్ ప్యానెల్స్‌పై యాంగులర్ లైన్‌లతో మొత్తం డిజైన్ పెద్దగా మారనట్లు కనిపిస్తుంది. ఈ మోడల్ 14-ఇంచ్​ వీల్స్​పైనే కొనసాగుతుంది. ఎక్స్‌పోజ్డ్ ఇంజిన్, రేర్​ సస్పెన్షన్ దాని స్పోర్టీ రూపాన్ని పెంచుతాయి.

ఏప్రిలియా ఎస్​ఆర్​ 175: అంచనా ఇంజిన్ సామర్థ్యం?

ఏప్రిలియా ఎస్​ఆర్​ 175 కొత్త 174.7 సీసీ సింగిల్ సిలిండర్, త్రీ-వాల్వ్ మోటారుతో వస్తుందని భావిస్తున్నారు. ఈ ఇంజిన్ సుమారు 12.7 బీహెచ్‌పీ పవర్​ని, 14.14 ఎన్ఎమ్ పీక్​ టార్క్‌ను ఉత్పత్తి చేస్తుందని అంచనా. 11.11 బీహెచ్‌పీ పవర్​ని, 13.44 ఎన్ఎమ్ గరిష్ట టార్క్‌ను అందించిన ఎస్​ఆర్​ 160తో పోలిస్తే ఇది గణనీయమైన అప్​గ్రేడ్​. సస్పెన్షన్, టైర్లు, బ్రేకింగ్ హార్డ్‌వేర్‌ సహా ఇతర భాగాలు యథావిధిగా కొనసాగుతాయని ఆశించవచ్చు.

ఎస్​ఆర్​ 457 నుంచి తీసుకున్న కొత్త డిజిటల్ కన్సోల్‌ను చూడవచ్చు. ఇది బ్లూటూత్ ద్వారా నావిగేషన్, జియోఫెన్సింగ్, కాల్, ఎస్​ఎంఎస్​ అలర్ట్‌లు వంటి మరిన్ని కనెక్టివిటీ ఎంపికలను అందిస్తుంది.

ఏప్రిలియా ఇంకా ఎస్​ఆర్​ 175 గురించి అధికారికంగా ప్రకటించలేదు. మోడల్ చిత్రాలు ఆన్‌లైన్‌లో వెలువడుతున్నప్పటికీ, బ్రాండ్ తన సోషల్ మీడియా ఛానెల్‌లలో కూడా నిశ్శబ్దంగా ఉంది.

ఏప్రిలియా ఎస్​ఆర్​ 175: అంచనా ధర?

ఏప్రిలియా ఎస్​ఆర్​ 160 స్కూటర్​ ధర రూ. 1.31 లక్షలు (ఎక్స్-షోరూమ్) ఉంది. రాబోయే ఎస్​ఆర్​ 175 స్వల్పంగా అధిక ధరతో ఉంటుందని భావిస్తున్నారు. కొత్త ఏప్రిలియా ఎస్​ఆర్​ 175 ప్రధానంగా యమహా ఏరోక్స్ 155, హీరో జూమ్ 160తో కూడా పోటీ పడనుంది.